Read west central oromo Seera Lakkoobsaa 15 Bible Online

Seera Lakkoobsaa 15 - west central oromo bible

Seera Lakkoobsaa 15

¹Waaqayyo yommus Museedhaan,

²?Ati Israa'elootatti dubbadhu, isaaniin, ?Waaqayyo akkan jedha:- Biyya isa akka isin keessa jiraattaniif ani isiniif kennutti yommuu galtan,

³ana Waaqayyoof aarsaa gubamu, qalma gubamus bushaayee keessaa, saawwan keessaa, akkasumas aarsaa wareegaa, kennaa fedha keessaniin kennitan, kennaa gaafa ayyaanaas foolii urgaa'aa ana Waaqayyotti toluuf dhi'eessaa*!

⁴Namni kennaa anaaf dhi'eessu, kennaa midhaanii daakuu qamadii ba'eessa kiiloo tokko, isa dhadhaa ejersaa liitrii tokkoon sukkuumame haa dhi'eessu*!

⁵Tokkon tokkon xobbaallaa hoolaa qalma gubamuuf yookiis aarsaadhaaf dhi'aatuu wajjin daadhii waynii liitrii tokko tokko kennaa dhugaatiitiif haa qopheessu*!

⁶Korbeessa hoolaas yommuu dhi'eessu, isaa wajjin kennaa midhaaniitiif daakuu qamadii ba'eessa kiiloo lama, dhadhaa ejersaa akka liitrii tokkoo fi walakkaatiin kan sukkuumame haa dhi'eessu!

⁷Daadhiin waynii liitriin tokkoo fi walakkaan immoo kennaa dhugaatii isa urgaan foolii isaa tolu ana Waaqayyoof haa dhi'aatu![46]

⁸? ?Qalma gubamuu fi kennaa wareegaatii fi qalma araaraatiifis ana Waaqayyoof tuntunoo yommuu dhi'eessitu,

⁹tuntunichaa wajjin kennaa midhaaniif, daakuun qamadii ba'eessi isaa inni dhadhaa ejersaa rubii liitriitiin waliin makame haa dhi'aatu!

¹⁰Akkasumas kennaa dhugaatiif daadhii waynii rubii liitrii akka aarsaa gubamu isa urgaan foolii isaa ana Waaqayyotti tolutti dhi'eessi!

¹¹Tokkon tokkon tuntunootiif tokkon tokkon korbeessa hoolaaf tokkon tokkon xobbaallaa hoolaa fi xobbaallaa reettiif akkuma kanatti haa qophaa'u!

¹²Akkuma lakkoobsa horii qalmaaf qopheessitan hundumaatti tokkon tokkon isaaniif akkuma kana godhaa!

¹³? ?Dhaloota biyyaa kan ta'an hundinuu aarsaa gubamu isa urgaan foolii isaa ana Waaqayyotti tolu yommuu dhi'eessan akka kanatti haa dhi'eessan!

¹⁴Namni galaan yookiis namumti isin gidduu jiraatu dhaloota dhufu hundumaa keessatti aarsaa gubamu isa urgaan foolii isaa anatti tolu yoo dhi'eesse, akkuma isin dhi'eessitanitti haa dhi'eessu!

¹⁵Waldicha keessatti isinii fi galaa isin gidduu jiraatuuf seerranni tokkichuma haa ta'u! Kunis dhaloota dhufuuf seerrata bara baraa ti; namni galaan ana duratti akkuma isin taatan haa ta'u*!

¹⁶Isinii fi galaa isin gidduu jiraatuuf seerrii fi firdiin tokkichi haa jiraatu!? jedhi!? jedhe.[47]

¹⁷Waaqayyo ammas Museette dubbatee,

¹⁸?Ati Israa'elootatti dubbadhu; isaaniin, ?Waaqayyo akkana jedha:- Yommuu biyya isa ani itti isin geessutti galtan,

¹⁹nyaata biyya sanaas yommuu nyaattan, isa irraa ana Waaqayyoof aarsaa sochoofamu dhi'eessaa!

²⁰Bukoo midhaan keessanii isa jalqabaa irraa bixxillee tokko aarsaa sochoofamuuf dhi'eessaa! Isas akka aarsaa midhaan oobdii keessaa fuudhamee sochoofamutti in dhi'eessitu*.

²¹Dhaloota dhufu hundumaa keessatti bukoo midhaan keessanii isa jalqabaa irraa anaaf aarsaa sochoofamu in dhi'eessitu.[48]

²²? ?Isin irra ceetanii abboommii ani Waaqayyo Museetti kenne kana hundumaa yoo eeguu dhiiftan,

²³abboommii isa ani karaa Musee isin abboome kana hundumaas gaafa ani Museetti kennee jalqabee dhalootaa hamma dhalootaatti iyyuu yoo irra ceetan,

²⁴waldaanis utuu hin beekin yoo irra ce'e, guutummaatti tuntunoo tokko qalma gubamu isa urgaan foolii isaa ana Waaqayyotti toluuf haa dhi'eessu! Isaa wajjinis akka seerrata isaatti kennaa midhaanii fi kennaa dhugaatii, aarsaa sababii cubbuutiif dhi'aatuufis korbeessa reettii tokko haa dhi'eessu!

²⁵Waldaan utuu hin beekin waan irra ce'e, isa irra ce'eefis aarsaa gubamu aarsaa sababii cubbuutiif dhi'aatus ana Waaqayyoof waan fideef, lubichi guutummaa waldaa Israa'eliif haa araarsu, innis isaaniif in dhiifama.

²⁶Sabni achi keessa jiru guutummaatti waan irra ce'eef, waldaa Israa'elootaa hundumaa fi galaa isaan gidduu jiraatuufis in dhiifama*.[49]

²⁷? ?Garuu namni tokko utuu hin beekin cubbuu yoo hojjete immoo xobbaallaa reettii dhaltuu waggaa tokkoo aarsaa sababii cubbuutiif dhi'aatuuf haa fidu*!

²⁸Lubichi namicha isa utuu hin beekin cubbuu hojjete sanaaf ana Waaqayyo duratti haa araarsu! Namichaafis in dhiifama.

²⁹Warra Israa'el keessaa nama utuu hin beekin cubbuu hojjetuuf, dhaloota biyyaa fi galaa isaan gidduu jiraatuufis seerri tokkicha haa ta'u!

³⁰Dhaloonni biyyaa namni galaanis beekaa cubbuu yoo hojjete garuu, kun ana Waaqayyoon arrabsuu waan ta'eef, namni akkasii saba isaa keessaa haa balleeffamu*!

³¹Inni dubbii koo waan tuffateef, abboommii koos waan cabseef, kan akkasii raawwatee haa balleeffamu, yakki isaas isuma irratti haa hafu!? jedhi!? jedhe.[50]

³²Israa'eloonni yeroo lafa onaa keessa turan, namni tokko guyyaa Sanbataatti qoraan utuu bu'uu in argan*.

³³Warri utuu inni qoraan bu'uu arganis gara Musee fi gara Aaronitti, gara guutummaa waldaattis isa in dhi'eessan;

³⁴maal isa gochuun akka ta'u waan hin beekaminiifis akka inni eegamu in godhan.

³⁵Waaqayyo yommus Museedhaan, ?Namichi haa du'u! Guutummaan waldaa iddoo buufataa duubatti dhagaadhaan isa haa rukutu!? jedhe.

³⁶Kana irratti guutummaan waldaa iddoo buufataa duubatti isa baasee akkuma Waaqayyo Musee abboometti dhagaadhaan rukutee in ajjeese.[51]

³⁷Waaqayyo ammas Museedhaan,

³⁸?Ati Israa'elootatti dubbadhu; isaaniin, ?Waaqayyo akkana jedha:- Isin fiixee uffata keessaniitti shaashara baafadhaa! Tokkon tokkon shaashara golee uffata keessaniittis fo'aa bifa waaqaa fakkaatu itti hidhadhaa! Dhaloonni isin booddee hundinuus kana haa godhan*!

³⁹Innis shaashara isa isin ilaaltanii abboommii koo hundumaa ittiin yaadattanii akka isaatti akka hojjettan, isa hawwii garaa keessanii fi hawwii ija keessanii isa karaa irraa isin kaachisu duukaa akka isin hin buune godhuu dha.

⁴⁰Egaa isin abboommii koo hundumaa ittiin in yaadattu, in eegdus; ana Waaqayyo keessaniifis in qulqullooftu.

⁴¹Ani Waaqayyo gooftaa keessan isa Waaqayyo keessan ta'uudhaaf biyya Gibxii isin baasee dha; ani Waaqayyo gooftaa keessan? jedhi!? jedhe*.[52]