Read west central oromo Macaafa Zakaariyaas Raajichaa 14 Bible Online

Macaafa Zakaariyaas Raajichaa 14 - west central oromo bible

Macaafa Zakaariyaas Raajichaa 14

¹Yaa Yerusaalem, kunoo guyyaan Waaqayyoo inni itti wanti si irraa saamame ijuma namoota keetii duratti hirmaatamu in dhufa*.

²Waaqayyo guyyaa sanatti sabni hundinuu Yerusaalemin akka lolaniif walitti isaan in qaba; mandarattiin in qabamti, manneetiin in saamamu, dubartoonnis in yeellaasifamu; walakkaan namoota mandarattii booji'amanii in adeemu, namoonni warri hafan immoo mandarattii keessaa hin balleeffaman*.

³Ergasii garuu Waaqayyo gad in bu'a akkuma yeroo lola loluutti saba sana in lola*.

⁴Guyyaa sanatti miilli isaa tulluu ejersaa isa Yerusaalem irraa gara ba'a-biiftuu jiru irra in dhaabata; tulluun ejersaas gara ba'a-biiftuuttii gara lixa-biiftuutti, iddoo lamatti gargar in dho'a; walakkaan tullichaa gara bitaatti, walakkaan isaa immoo gara mirgaatti in hiiqa, gidduu isaattis dachaan guddaan in uumama.

⁵Yaa namoota Yerusaalem, isin immoo gara dachaa tulloota koo isa hamma Azelitti bal'atuutti in baqattu; akkuma bara Uziyaa mootii Yihudaatti, socho'a lafaa jalaa baqattan ammas in baqattu; yommus Waaqayyo gooftaan koo in dhufa, qulqulloonni isaa hundinuus isinii[44] wajjin in dhufu.[45]

⁶Guyyaa sanatti ifni, dhaamochi, qorris hin jiru.

⁷Guyyaan biraa tokko in ta'a; isas Waaqayyotu beeka, gaafas yeroo galgalaa'u ifatu ta'a malee, guyyaan hin ta'u, halkanis hin ta'u*.

⁸Guyyaa sanatti Yerusaalem keessaa bishaan jireenyaa in burqa; walakkaan isaa gara galaana ba'a-biiftuutti, walakkaan isaa immoo gara galaana lixa-biiftuutti bonaa fi ganna in yaa'a*.

⁹Yommus Waaqayyo guutummaa biyya lafaa irratti mootii in ta'a; gaafas Waaqayyo isuma tokkicha, maqaan isaas tokkichuma*.[46]

¹⁰Biyyichis guutummaatti Gebaadhaa hamma Rimoon isa Yerusaalem irraa gara mirgaa jirutti lafa diriiraa in ta'a; Yerusaalem garuu karra Benyaamiinii hamma karra isa duraatti, hamma golee karrichaatti, riqaa Hanaani'elii hamma iddoo cuunfaa daadhii waynii isa kan mootichaatti ol jettee iddoo isheetti in hafti*.

¹¹Namni ishee keessa in jiraata, si'achis deebitee hin balleeffamtu; bir'aa malees in jiraatti*.[47]

¹²Dha'ichi inni Waaqayyo saba warra Yerusaalemin lolan ittiin rukutu kanatti fufee jira; utuma miilla isaaniitiin dhaabatanii dhagni isaanii in tortora, iji isaanii boolluma isaa keessatti in tortora, arrabni isaaniis afaan isaanii keessatti in tortora*.

¹³Guyyaa sanatti wanti guddaa isaan naasisu Waaqayyo biraa isaanitti in dhufa; inni tokko isa kaan harkaan in qabata, walis in reebu.

¹⁴Warri Yihudaas Yerusaalemitti in lolu; badhaadhummaan saba naannoo sanaa hundumaa warqee baay'ee fi meetiin, uffannis walitti in qabama.

¹⁵Dha'ichi kana fakkaatus fardeen irratti, gaangolii irratti, gaalota irratti, harroota irratti, horii buufata sana keessa jiran hundumaa irrattis in dhufa.[48]

¹⁶Yommus saba warra Yerusaalemin rukutan hundumaa keessaa warri hafan immoo Waaqayyo gooftaa maccaa isa mootichaaf sagaduudhaaf, ayyaana gordommaas ayyaaneffachuudhaaf, waggaa waggaatti achitti ol in ba'u*.

¹⁷Gosoota biyya lafaa irra jiran keessaa, Waaqayyo gooftaa maccaa isa mootichaaf sagaduudhaaf gara Yerusaalemitti kan ol hin baaneef bokkaan hin roobu.

¹⁸Gosi warra Gibxiis achitti ol ba'ee hin ayyaaneffatu yoo ta'e, bokkaa hin argatu; Waaqayyo dha'icha isa warra gara Yerusaalemitti ol ba'anii ayyaana gordommaa ayyaaneffachuu didan irratti fide isaan irrattis in fida.

¹⁹Egaa adabni warra Gibxii fi saba warra achitti ol ba'anii ayyaana gordommaa ayyaaneffachuu didan hundumaa irratti dhufu isa kana.[49]

²⁰Guyyaa sanatti bilbila fardeenii irratti, ?Waaqayyoof kan qulqullaa'ee dha? jedhamee in caafama; xuwween mana qulqullummaa keessatti waa itti affeelan akka waciitii isa iddoo aarsaa dura dhaabatuutti in ilaalama*.

²¹Xuwween Yerusaalem keessaa fi Yihudaa keessaa hundinuu, Waaqayyo gooftaa maccaatiif qulqulluu in ta'u; warri aarsaa dhi'eessuu dhufan hundinuus isaan keessaa muraasa fudhatanii waa itti in affeellatu; guyyaa sanatti warri nagadan mana Waaqayyo gooftaa maccaa keessa deebi'anii hin jiraatan*.[50]