Read west central oromo Macaafa Miilkiyaas Raajichaa 2 Bible Online

Macaafa Miilkiyaas Raajichaa 2 - west central oromo bible

Macaafa Miilkiyaas Raajichaa 2

¹Waaqayyo gooftaan maccaa, ?Yaa lubootaa! Abboommiin kun isiniif ba'e;

²isin yoo anaaf dhaga'uu diddan, maqaa kootiif ulfina kennuudhaaf yoo itti yaaduu dhiiftan, ani immoo abaarsa isin irratti nan erga, eebba keessanis abaarsatti nan geddara; sababii isin ulfina anaaf kennuudhaaf itti yaaduu dhiiftaniif, dhuguma ani ammuma iyyuu abaareera*.

³Kunoo ani sababii keessaniif jedhee, sanyii keessan nan ifadha, fuula keessanitti dhoqqee nan diba; dhoqqee horii isa yeroo ayyaanaa qaltanii aarsaa dhi'eessitan keessaa ba'u wajjinis diidatti in gatamtu.

⁴Yommus kakuun koo inni ani Lewwiidhaaf gale akka itti fufuuf jedhee, abboommii kana akkan kenne in beektu; kana ana Waaqayyo gooftaa maccaatu dubbate.

⁵Kakuun koo inni isaa wajjin ture sun kakuu jireenyaa fi kakuu nagaa ti; kanas akka inni ana safeeffatuufan isaaf kenne; innis ana sodaatee maqaa kootiif ulfina kenneera.

⁶Barsiisa dhugaa in barsiisa ture, dubbiin jal'aanis afaan isaa keessaa hin baane, nagaadhaa fi qajeelummaadhaan anaa wajjin jiraateera, namoota baay'ees yakkattii deebiseera*.[5]

⁷?Lubni beekumsa isa dhugaa in eega; inni ergamaa Waaqayyo gooftaa maccaa waan ta'eef, namni afaan isaa keessaa barumsa in barbaada*.

⁸Isin garuu karaa irraa jal'attanii namoota baay'ees barsiisa keessaniin gufachiiftaniittu, kakuu ani Lewwiidhaaf gales cabsitaniittu; kana ana Waaqayyo gooftaa maccaatu dubbate.

⁹Sababii isin abboommii koo eeguu diddanii seera koo yommuu barsiiftanis nama wal caalsiftaniif, ani immoo saba hundumaa duratti akka tuffatamtaniif akka gad deebitan nan godha? jedha.[6]

¹⁰Hundumti keenya abbaa tokkicha qabna mitii ree? Waaqayyo isa tokkichatu hunduma keenya uume mitii ree? Maaliif nuyi walii walii keenyaaf amanamuu dhabnee, wal irratti ka'uudhaan kakuu abboota keenyaa cabsina ree*?

¹¹Namoonni Yihudaa amanamummaa in dhaban; Israa'elii fi Yerusaalem keessattis wanta ciiggaasisaatu hojjetame; namoonni Yihudaa durboota waaqayyolii ormaa fuudhuudhaan iddoo qulqullaa'aa isa Waaqayyo jaallatu sana in xureessan*.

¹²Waaqayyo nama wanta xuraa'aa akkasii hojjetu, nama isaaf aarsaa dhi'eessu illee yoo ta'e sanyii Yaaqoob keessaa raawwatee isa haa balleessu![7]

¹³Wanti lammaffaan isin gootan immoo, isa isin imimmaaniin iddoo aarsaa Waaqayyoo dhiqxanii dha; sababii Waaqayyo gara aara aarsaa keessanii ilaaluu didee, gammachuudhaan isin harkaa fudhachuu dhiiseef isin in iyyitu, in wawwaattus*.

¹⁴Isin, ?Kun maaliif ta'e?? jettanii in gaafattu; Waaqayyo isiniif haadha manaa isin qerrummaadhaan fuutan gidduutti dhuga-baatuu dha; isheen hidhata keessan, haadha manaa kakuu keessanii taatee utuma jirtuu, isin isheedhaaf amanamuu dhiiftanii ishee in gowwoomsitan.[8]

¹⁵Waaqayyo foonitti, lubbuuttis tokko isaan hin goonee ree? Maaliifis tokko isaan godhe? Sanyii ofii isaatiif kaafachuudhaaf kana godhe; kanaafis jireenya keessan eeggadhaa! Haadha manaa qerrummaa keessan irraas amanamummaa hin dhabinaa!

¹⁶Waaqayyo gooftaan inni kan Israa'el, ?Namni haadha manaa isaa gad dhiisuun humnaan ishee irratti ka'uu akka uffataatti uffachuu isaa waan ta'uuf, wanta akkasii baay'isee nan jibba; kanaafis isin jireenya keessan eeggadhaa, amanamummaas hin dhabinaa!? jedha*.

¹⁷Isin dubbii keessanin Waaqayyoon dadhabsiiftaniittu; garuu, ?Attamitti isa dadhabsiifne?? jettanii in gaafattu; isin, ?Warri wanta hamaa hojjetan hundinuu fuula Waaqayyoo duratti gaarii dha, innis isaanitti in gammada; yookiis immoo Waaqayyo abbaan firdii dhugaa eessa jira?? jettanii gaafachuudhaan isa in dadhabsiiftu*.[9]