Read west central oromo WANGEELA MAATEWOS 14 Bible Online

WANGEELA MAATEWOS 14 - west central oromo bible

WANGEELA MAATEWOS 14

¹Yeroo sanatti Herodis abbaan biyyaa oduu Yesus dhaga'ee,

²hojjetoota isaatiin immoo, ?Kun Yohannis cuuphaa dha, isatu du'aa kaafame; kanaaf hojiin aangoo kun hundinuu isaan hojjetamaa jiru? jedhe.

³Herodis waa'ee Herodiyaas haadha manaa obboleessa isaa Filiphosiif jedhee, Yohannisin qabsiisee fuuncaadhaan hiisisee, mana hidhaatti galchisiisee ture*.

⁴Yohannis yommus Herodisiin, ?Ati ishee fuudhuun kee seera miti? in jedha ture*.

⁵Inni Yohannisin ajjeesisuu barbaade ture, garuu namoota warra Yohannisin akka raajiitti ilaalan sodaate*.[109]

⁶Guyyaan seenaa dhaloota Herodis geenyaan, intalli Herodiyaas keessummoota sana duratti sirbitee Herodisin gammachiifte.

⁷Kana irratti inni waanuma isheen gaafatte isheedhaaf kennuudhaaf kakaadhaan abdachiise.

⁸Intalattiin immoo haadha isheetiin gorfamtee, ?Asitti mataa Yohannis cuuphaa gabateetti anaaf kenni? jette.

⁹Mootichi yommus in gadde, garuu sababii kakaa isaatiif, keessummoota isaatiifis jedhee akka inni isheedhaaf kennamu in abboome.

¹⁰Itti erges, mana hidhaa keessatti mataa Yohannis mormatti irraa kuchisiise.

¹¹Mataan isaa sun gabateetti fidamee intalattiidhaaf in kenname; isheen immoo haadha isheetti in geessite.

¹²Yommus bartoonni Yohannis dhufanii reeffa isaa fuudhanii awwaalan; dhaqaniis Yesusitti in himan.

¹³Yesus kana yommuu dhaga'e kophaa isaa bidiruudhaan achii ka'ee gara iddoo qoofniitti sokke; tuuti sun immoo adeemuu isaa dhaga'anii mandarootaa miillaan isa duukaa bu'an.

¹⁴Yesus qarqara bishaaniitti yommuu bu'e tuuta gobbuu argee, isaaniif oo'ee, dhukkubsatoota isaaniis in fayyise*.

¹⁵Yeroo galgalaa'e immoo bartoonni gara isaa dhufanii, ?Kun lafa onaa dha, guyyichis sokkeera; egaa tuuti kun gara gandeenii dhaqanii nyaata ofii isaaniitiif haa bitataniif gad isaan dhiisi!? jedhan.

¹⁶Yesus immoo, ?Dhaquu isaan hin barbaachisu, ofii keessanii waan isaan nyaatan kennaaf!? isaaniin jedhe.

¹⁷Isaan garuu deebisanii, ?Nuyi buddeena shanii fi qurxummii lama duwwaa asii qabna? jedhaniin.

¹⁸Inni immoo, ?As gara kootti fidaa!? jedhe.[110]

¹⁹Kana booddee marguma sana irra akka taa'aniif tuuta sana abboomee, buddeenan shananii fi qurxummii lamaan fuudhee, gara waaqaatti ol ilaalee, eebbisee cabsees, buddeenan sana bartoota isaatti kekkenne; bartoonni immoo tuuta sanaaf in dhi'eessan*.

²⁰Isaan hundumtinuu nyaatanii in quufan; ergasii bartoonni hurraa isaan irraa hafe gundoo kudha lama guutuu fuudhan*.

²¹Warri nyaatanis dubartootaa fi ijoollee malee dhiirri akka kuma shanii turan.[111]

²²Yesus hamma ofii isaatii tuuta sana gad dhiisutti, bidiruu yaabbatanii isa dura gamatti akka ce'aniif bartoota isaa in giddisiise.

²³Tuuta sana erga gad dhiisee booddees, kophaa isaatti kadhachuudhaaf gara gaaraatti ol ba'e; yommuu galgalaa'es kophaa isaa achi ture*.

²⁴Bidirichi garuu yeroo kana qarqara irraa baay'ee fagaate; sababii qilleensi fuula duraan itti qilleensa'uufis dha'aa bishaaniitiin asii fi achi daddarbatamaa ture.

²⁵Halkan keessaa gara iyya indaanqoo isa lammaffaattis Yesus bishaan gubbaa adeemaa gara isaanii dhufe.

²⁶Bartoonni garuu bishaan irra utuu inni adeemuu arganii baay'ee na'anii, ?Innoo ekeraa dha? jechaa, sodaachuu isaanii irraa kan ka'e iyyan*.

²⁷Yesus immoo achumaan isaanitti dubbatee, ?Jabaadhaa, innoo anaa, hin sodaatinaa!? jedhe.

²⁸Phexros deebisee, ?Gooftaa! Si erga ta'ee, bishaan irra gara kee akkan dhufu na abboomi!? jedheen.

²⁹Inni immoo, ?Kottu!? jedhe; yommus Phexros bidiricha keessaa ba'ee bishaan gubbaa gara Yesusitti adeemuutti ka'e.

³⁰Qilleensi jabaan sun yeroo isatti dhaga'ame garuu in sodaate; gad liqimfamuu jalqabnaanis iyyee, ?Gooftaa! Na oolchi!? jedhe.

³¹Yesus achumaan harka isaa hiixatee isa qabee, ?Yaa namicha amantii hir'uu! Maaliif mamte?? jedheen*.

³²Yeroo isaan bidiruu yaabbatanitti qilleensichi in dhaabate.

³³Kana irratti warri bidiricha keessaa Yesusiif sagadanii, ?Ati dhuguma ilma Waaqayyoo ti!? jedhaniin*.[112]

³⁴Yommuu ce'anis bakkee Genesaarexitti lafatti ba'an.

³⁵Namoonni iddoo sanaa immoo isa ta'uu baranii, naanna'aa sana hundumaatti erganii, warra dhukkubsachaa turan hundumaa gara isaatti fidan.

³⁶Warri dhukkubsatan kun shaashara wayyaa isaattii duwwaa illee akka tuqaniif isa in kadhatu turan; hammi shaashara wayyaa isaa tuqan hundinuus in fayyan*.[113]