Read west central oromo WANGEELA LUQAAS 1 Bible Online

WANGEELA LUQAAS 1 - west central oromo bible

WANGEELA LUQAAS 1

¹Yaa ulfaataa fi jaallatamaa Tewofilos! Waa'ee dubbii nu gidduutti raawwatame kanaa namoonni baay'een odeessuu yaalaniiru*.

²Kanas immoo qopheessuun isaanii akka warri jalqabaa jalqabanii duukaa turan, ija isaaniitiin kan argan, dubbichaafis kan hojjetan nutti dabarsanitti*.

³Anis immoo dubbii kana jalqaba isaatii jalqabee, keessa lixee qoraa waanan tureef, tarreetti galchee siif caafuun gaarii fakkaatee anatti mul'ate*.

⁴Kana gochuun koos, dubbiin sitti himame kun dhugaadhaa fi amanamaa ta'uu isaa akka hubattuuf*.[1]

⁵Bara Herodis biyya Yihudaa bulchaa turetti, balbala lubootaa kutata Abiiyaa keessaa lubni Zakaariyaas jedhamu tokko ture; haati manaa isaas sanyii lubootaa keessaa, maqaan ishees Elsaabex jedhama*.

⁶Lachuun isaanii abboommii gooftaatii fi seera isaa raawwachaa fuula Waaqayyoo duratti jireenya qajeelaa jiraatan*.

⁷Haa ta'u iyyuu malee, Elsaabex dhabduu waan turteef, dhala hin godhanne; lachanuu immoo lafa guuraniiru turan*.[2]

⁸Darabeen balbala isaatii geenyaanis, gaaf tokko Zakaariyaas warra kaanii wajjin fuula Waaqayyoo duratti hojii lubummaa isaa hojjechuudhaaf dhi'aate.

⁹Akka amala hojii hirmaachuu isaaniitti Zakaariyaas aarsaa akka dhi'eessuuf, buufata mukaatiin irra buunaan, gara mana qulqullummaatti ol gale*.

¹⁰Yeroo aarsaa ixaanaa kanattis sabni baay'een alaa in kadhata ture.[3]

¹¹Yommus ergamaan Waaqayyoo iddoo itti ixaanni aarfamu gara mirgaatiin dhaabatee, Zakaariyaasitti mul'ate*.

¹²Zakaariyaas yommuu isa arge, na'ee sodaate.

¹³Ergamichi immoo itti dubbatee, ?Yaa Zakaariyaas hin sodaatin! Waaqayyo kadhannaa kee dhaga'eera'o, Elsaabex haati manaa kee ilma siif in deessi, maqaa isaas Yohannis jettee in moggaafta.

¹⁴Ati guddaa in gammadda, dhalachuun isaas namoota baay'eetiif gammachuu in ta'a.

¹⁵Inni guddaa in ta'a, daadhii waynii yookiis dhugaatii macheessu hundumaa matumaa hin dhugu, garaa haadha isaatii jalqabees hafuura qulqulluudhaan in guutama*.

¹⁶Saba Israa'el keessaas danuu gara Waaqayyo gooftaa isaaniitti deebisee isaan in fida.

¹⁷Inni hafuuraa fi humna, Eliyaas raajichi qaba ture in argata; yaada abbootaatii fi kan ijoollotaa walitti deebisuudhaaf, kan warra hin abboomamnees gara warra tolootaatti harkisuudhaaf, saba isaa gooftaa isaaniitiif kan qophaa'an gochuudhaafis gooftaa dura in adeema? jedhe*.[4]

¹⁸Zakaariyaas yommus ergamichaan, ?Kun akka ta'u attamittan beeka? Anoo dulloomeera, haati manaa koos barri ishee darbeera? jedhe*.

¹⁹Ergamichi immoo, ?Ani Gabri'elii dha, fuula Waaqayyoo dura kanan dhaabadhu, misraachoo kana sitti himuudhaafan ergame*.

²⁰Ati garuu ergaa ani sitti himee yeroo isaatti isa raawwatamuuf jiru hin amanne; kanaafis hamma kun ta'utti arrabni kee didaa in ta'a? jedhee deebiseef.[5]

²¹Sabni gad ba'uu Zakaariyaas eeggachaa ture sun, mana qulqullummaa keessa hamma kana waan inni tureef in dinqifate.

²²Yommuu gad ba'es inni dubbachuu dadhabnaan, mana qulqullummaa keessatti mul'ata argee akka ture hubatan; arrabni isaa didaa waan ta'eef, harka isaatiin milikkita duwwaa isaanii kennuu danda'e.

²³Guyyoonni darabee isaa raawwatamnaan, Zakaariyaas gara mana isaatti deebi'e.

²⁴Kana booddees haati manaa isaa Elsaabex ulfooftee, hamma ji'a shaniitti manaa hin baane turte.

²⁵Isheen, ?Kun hojii gooftaa ti, amma gara booddeetti na yaadatee, namoota gidduutti ceephoo na irra ture ana irraa fageesse? jette*.[6]

²⁶Elsaabex ulfooftee ji'a ja'affaatti, ergamichi Gabri'el Waaqayyo biraa kutaa biyya Galiilaa mandara Naazireet jedhamutti ergame.

²⁷Ergaan isaas gara durba Maariyaam jedhamtu tokkotti ture; isheen nama Yoseef jedhamu, sanyii Daawit keessaa dhalate tokkoof, kaadhimatamtee turte*.[7]

²⁸Ergamichi isheetti mul'atee, ?Waaqayyo gooftaan sii wajjin jira'o, nagaan siif haa ta'u, yaa ayyaana-qabeettii!? ittiin jedhe.

²⁹Maariyaam nagaa kana yommuu dhageesse, yaadaan dhiphattee, ?Kun maal jechuu dha?? jettee of gaafatte.

³⁰Yommus ergamichi isheedhaan, ?Yaa Maariyaam Waaqayyo biraa ayyaana argatteetta hin sodaatin*!

³¹Kunoo in ulfoofta ilmas in deessa, maqaa isaa immoo Yesus jedhii moggaasi*!

³²Inni guddaa in ta'a ilma aabbaas jedhamee in waamama, Waaqayyo gooftaanis teessoo abaabilii isaa Daawit in kennaaf.

³³Mana Yaaqoob irratti bara baraan in mo'a, barri mootummaa isaas dhuma hin qabu? jedhe*.[8]

³⁴Maariyaam yommus, ?Anoo amma illee durba, kun attamitti ta'uu danda'a?? jettee ergamicha gaafatte.

³⁵Ergamichi immoo, ?Hafuurri qulqulluun si irra in bu'a, humni aabbaas si golbooba, kanaafis mucichi si irraa dhalatu kun qulqulluudhaa fi ilma Waaqayyoo jedhamee in waamama*.

³⁶Kunoo firri kee isheen sitti aantu Elsaabex, dhabduu jedhamaa kan turte, bara dulluma isheetti ilma godhachuudhaaf erga ulfooftee, ji'a ja'affaa ishee ti.

³⁷Waaqayyoof wanti dadhabamu hin jiru? jedhee deebiseef*.[9]

³⁸Kana irratti Maariyaam, ?Ani garbittiin gooftaa kunoo asan jira, akka ati dubbatte anaaf haa ta'u!? jetteen. Kana booddee ergamichi iddoo dhufetti in deebi'e.

³⁹Kana booddee utuu hin turin Maariyaam kaatee ariifattee baddaatti ol baate, gara mandara Yihudaa dhaqxe.

⁴⁰Mana Zakaariyaasitti ol galtee, Elsaabexin nagaa gaafatte.

⁴¹Yeroo Elsaabex nagaa Maariyaam dhageessetti, mucichi gammachuudhaan garaa ishee keessa burraaqe. Elsaabex yommus hafuura qulqulluudhaan in guutamte.

⁴²Sagalee ishee ol fudhattee dhageessiftees, ?Ati dubartoota hundumaa irra eebbifamtuu dha; mucaan ati garaatti baattus eebbifamaa dha*.[10]

⁴³?Amma garuu haati gooftaa kootii dhuftee akka na dubbiftuuf, ulfinni hammana ga'u eessaa anaaf ta'e?

⁴⁴Akkuma sagaleen nagaa kee gurra koo keessa bu'een, mucichi gammachuudhaan garaa koo keessa burraaqe.

⁴⁵Abdiin gooftaan kenne akka raawwatamu beektee, kan amante, attam kan ayyaanomtee dha!? jette*.[11]

⁴⁶Maariyaam yommus, ?Garaan koo gooftaa kootiif hooqubaa dhi'eessa;

⁴⁷hafuurri koos Waaqayyo fayyisaa kootti in ililcha*.

⁴⁸Inni gad deebii garbittii isaa yaadateera'o; egaa, ammaa jalqabee dhaloonni hundinuu ayyaana-qabeettii anaan jedhu*.

⁴⁹Waaqayyo inni danda'aan, waan guddaa anaaf godhe; maqaan isaa qulqulluu dha*.

⁵⁰Araarri isaa dhalootaa hamma dhalootaatti, warra isa sodaatan irratti*.

⁵¹Irree isaatiin aangoo isaa mul'ise; warra kooranis yaada garaa isaanii wajjin bittimse*.

⁵²Gooftota ol of qaban teessoo isaanii irraa isaan buuse; warra gad deebi'anis ol isaan kaase*.

⁵³Warra beela'an waan gaariidhaan quufse; sooressota harka duwwaa isaan gad dhiise*.

⁵⁴Garbicha isaa Israa'elin gargaaruufis birmate, araara gochuudhaaf qopheesse, in yaadate*;

⁵⁵abboota keenya isa abdachiise, Abrahaamii fi ijoollee, ijoollee isaatiifis bara baraan eege? jette faarfatte*.

⁵⁶Maariyaam ji'a sadii kan ga'u Elsaabex bira turtee, kana booddee gara mana isheetti deebite.[12]

⁵⁷Elsaabex yeroon da'umsa ishee geenyaan, ilma deesse.

⁵⁸Olloonni isheetii fi firoonni ishee araara guddaa gooftaan isheedhaaf buuse yommuu dhaga'an, ishee wajjin gammadan.

⁵⁹Guyyaa saddeettaffaa isaatti mucicha dhagna qabuudhaaf warri dhufan, akka maqaa abbaa isaatti Zakaariyaas jedhanii moggaasuuf turan*.

⁶⁰Haati isaa Elsaabex garuu, ?Waawuu, maqaan isaa Yohannis haa jedhamu malee? jettee didde.

⁶¹Isaan immoo, ?Firoota kee keessaa maqaa kanaan tokko illee hin waamamne? jedhan.

⁶²Rakkannaanis mucicha eenyu jedhee waamuu akka fedhu abbaa isaa milikkitaan gaafatan.

⁶³Zakaariyaasis waan irratti caafu akka isaaf kennaniif gaafatee maqaan isaa Yohannis jedhama, jedhee caafnaan, hundumti isaanii raajeffatan*.

⁶⁴Achumaan Zakaariyaas arrabni isaa hiikamnaan dubbachuu danda'e, hundumaa duras Waaqayyoon galateeffachuu jalqabe.

⁶⁵Olloonni isaaniis hundinuu in na'an; dubbiin kun baddaa Yihudaa guutummaatti dhaga'amee, bal'aattis dubbatame.

⁶⁶Warri kana dhaga'an hundinuu immoo dubbicha garaatti qabatanii, ?Mucaan kun maal ta'inna laata? Dhugumaan harki Waaqayyoo hamma ammaatti isaa wajjin ture? jechaa turan*.[13]

⁶⁷Zakaariyaas abbaan mucichaa hafuura qulqulluudhaan guutamee raajii dubbate;

⁶⁸?Waaqayyo gooftaan Israa'el, kan galateeffamuu dha, saba isaa furuudhaaf dhufe*;

⁶⁹fayyisaa aango-qabeessas[14] nuuf kaase, lataa garbicha isaa Daawit keessaa*.

⁷⁰Afaan qulqulloota raajota isaatiin dubbachaa akka ture, bara durii duriitii jalqabee*,

⁷¹harka diinota keenyaa akka nu oolchu, qabaa warra nu jibban hundumaa keessaas akka nu baasu*;

⁷²abboota keenyaafis araara akka godhuuf, kakuu isaa isa qulqullaa'aa akka yaadatuuf*;

⁷³abbaa keenya Abrahaamiif isa dhaabe nuuf kennuudhaaf, kakuudhaan akka jabeesse;

⁷⁴harka diinota keenyaa nu oolchuudhaaf, nus sodaa malee akka isaaf hojjennu gochuudhaaf*;

⁷⁵qulqullummaa fi tolatti fuula isaa dura jiraachuudhaaf, bara jireenya keenya hundumaatti*.

⁷⁶Ati immoo yaa mucaa nana, raajii aabbaa in jedhamta; karaa isaa qopheessuudhaaf fuula gooftaa dura in adeemta*;

⁷⁷beekumsa fayyinaa saba Waaqayyoof kennuudhaaf, dhiifamuu cubbuu isaaniis argachiisuudhaaf*;

⁷⁸Waaqayyo keenya, araara isaa isa oo'aan guuteen, barii fayyinaa nuuf bariisisa*;

⁷⁹warra dukkanaa fi gaaddisa du'aa keessatti argamanitti mul'achuudhaaf, miilla keenyas daandii nagaa irra geggeessuudhaaf? jedhe*.

⁸⁰Mucichi guddachaa, hubachaas in adeema ture; hamma guyyaa mul'inatti hojii isaa saba Israa'el keessatti jalqabettis, lafa onaa keessa in jiraata ture*.[15]