Read west central oromo WANGEELA LUQAAS 12 Bible Online

WANGEELA LUQAAS 12 - west central oromo bible

WANGEELA LUQAAS 12

¹Namoonni hamma wal irra ejjetanitti kumaatama baay'ee ta'anii, yeroo walitti qabamanitti, Yesus duraan dursee bartoota isaatiin, ?Raacitii warra Fariisotaa irraa, kana jechuun koos ?Of arguu dhabuu isaanii irraa? of eeggadhaa*.

²Waan haguugamee jiru hundinuu in mul'ifama, waan dhoksaatti eegamaa jirus in beeksifama*.

³Kanaafis waan isin dukkana keessatti dubbattan, ifa guyyaatti ba'ee in dhaga'ama; mana cufamaa keessatti gurra namaatti kan hasaaftan, iddoo ol jedhaa irratti lallabamee in dhageessifama? jedhe.[111]

⁴Itti fufees, ?Yaa firoota ko, ani isinittan hima, isin ajjeesanii isa booddee isa irra kan hammaatu waan godhan warra hin qabne hin sodaatinaa.

⁵Sodaachuun kan isiniif ta'u isinittan mul'isa; erga ajjeesee booddee adaba bara baraatiif qililleetti darbachuudhaaf aboo isa qabu sodaadhaa; eyyee, isinittan hima isa sodaadhaa!

⁶Simbirroonni shan akka saantiima lamaatti in gurguramu mitii? Garuu isaan keessaa tokko iyyuu Waaqayyo duratti kan dagatamu hin jiru.

⁷Rifeensi mataa keessanii hundinuu iyyuu lakkaa'amaa dha; kanaafis hin sodaatinaa, isinoo simbirroota baay'ee irra guddaa in caaltu*.[112]

⁸?Ani isinittan hima, eenyu illee namoota duratti eenyu akkan ta'e dhugaa ba'ee yoo mul'ise, anis ilmi namaa ergamoota Waaqayyoo duratti akkasuma dhugaa nan ba'aaf.

⁹Garuu namoota duratti kan na ganu, ergamoota Waaqayyoo duratti in ganama*.

¹⁰Ittiin mormee ilma namaa irratti waa kan dubbatu hundinuu, dhiifama in argata; hafuura qulqulluu salphisee kan arrabsu garuu dhiifama hin argatu*.

¹¹?Mana sagadaatti yookiis abboota biyyaatti, yookiis warra biyya seerrattanitti yoo isin geessan, attamitti falmanna? Yookiis maal jenna? jettanii hin yaadda'inaa!

¹²Yeroodhuma sanatti maal jechuun akka isiniif ta'u, hafuurri qulqulluun isin in barsiisa? jedhe*.[113]

¹³Tuuta jaraa keessaa namni tokko, ?Yaa barsiisaa, dhaala abbaan keenya nuuf dhiise du'ee, anaaf haa hiruuf obboleessa kootti anaaf himi!? jedheen.

¹⁴Yesus immoo deebiseefii, ?Namicha nana, eenyutu isin lamaan gidduutti abbaa firdii ta'uutti yookiis dhaala hir'uutti na fo'e?? jedhe*.

¹⁵Kanatti fufee hunduma isaaniitiin, ?Ilaaladhaa, sassata hundumaattiis of eeggadhaa! Jireenyi eenyuu illee baay'ina qabeenya isaa irra hin dhaabatu? jedhe*.

¹⁶Kana booddee Yesus fakkeenya kana isaanitti himee, ?Kunoo namni sooressi, midhaan isaa baay'isee toleef tokko ture.

¹⁷Inni, ?Midhaan koo lafan itti galfadhu hin qabu'o maal godhu?? jedhee of gaafate.

¹⁸?Akkasan godha, gombisaa koo hundumaa jigsee, midhaan koo hundumaa mi'a biraas akkan itti naqadhutti guddisee nan ijaara.

¹⁹Ofiinis, yaa namummaa ko, waggaa baay'eedhaaf kan si ga'u waan gaarii hundumaa lafaa qabda; amma egaa dhimma hin qabaatin, taa'ii, nyaadhuu, dhugii, gammadis!? nan jedhaan.

²⁰Waaqayyo garuu ?Yaa gowwaa, edana lubbuu kee si duraa fudhachuuf jiru; egaa kan ati qopheessite kun hundinuu eenyuuf ta'a ree?? ittiin jedhe.

²¹Namni badhaadhummaa ofii isaatiif tuullatee, Waaqayyo biratti immoo badhaadhaa hin ta'in, kunoo akkas in ta'a? jedhe*.[114]

²²Ergasii Yesus bartoota isaatiin, ?Kanaafis isinittan hima jireenya keessaniif waan nyaattaniif, yookiis dhagna keessanitti waan uffattaniif hin yaadda'inaa!

²³Jireenyi nyaata irra guddaa in caala, dhagnis uffata irra guddaa in caala.

²⁴Qurruu ilaalaa hin facaasan, hin haamanis; gombisaa hin qaban, gumbiis, garuu Waaqayyo isaan in soora; isin immoo allaattii irra guddaa in caaltu*.

²⁵Isin keessaa namni tokko hammam yaadda'u illee, bara jireenya isaatiitti yeroo gabaabaa[115] kan dabalachuu danda'u jiraa ree?

²⁶Egaa waan xinnoo akkasii iyyuu godhachuu erga hin dandeenyee, isa kaaniif maaliif yaaddoftu ree?

²⁷Daraaronni bakkee attamitti akka biqilanii guddatan ilaalaa! Hin soqan hin fo'anis; haa ta'u iyyuu malee, Solomoon mootichi inni ulfina guddaa qaba ture illee, isaan keessaa hamma isa tokkoo akka hin uffatin isinittan hima*.

²⁸Egaa Waaqayyo biqiltuu har'a bakkeetti argamee, bor ibiddatti nam'utti akkana bareechee itti uffisa erga ta'ee, isinitti immoo hammam caalchisee haa uffisu ree! Isin warra amantiin itti hir'atee dha malee.

²⁹Isinoo, yaada keessan waan nyaattanii fi waan dhugdan barbaaduutti hin hidhinaa! Yaaddoodhaanis hin dhiphatinaa!

³⁰Warri biyya lafaa irraa Waaqayyoon hin beekne hundinuu, yaada isaanii isaan kanatti hidhanii jiru; soora kana argachuun akka isin barbaachisu abbaan keessan in beeka.

³¹Duraan dursitanii yaada keessan mootummaa isaa barbaaduutti hidhaa! Kana malees kan barbaachisu hundinuu immoo isiniif in kennama? jedhe.[116]

³²Yesus itti dabalee, ?Isin yaa warra karra xinnayyoo nana! Kana keessaa hin sodaatinaa; abbaan keessan mootummaa isaa isiniif kennuu jaallateera*.

³³Qabeenya keessan gurguraa, warra dhabaniifis gargaarsa kennaa! Korojoo hin moofofne, badhaadhummaa dhuma hin qabnes waaqa irratti iddoo hattuun hin hannetti, biliinis hin balleessinetti walitti qabadhaa*!

³⁴Garaan keessan lafa badhaadhummaan keessan jirutti hidhama? jedhe.[117]

³⁵Itti fufees, ?Mudhiin keessan hidhatamaa, ibsaan keessanis ifaa haa ta'u*!

³⁶Mana eegduu gooftaan isaanii hamaamota dhaqnaan yommuu dhufu akkuma inni balbala rukuteen isaaf banuudhaaf qophaa'anii, isa eegan fakkaadhaa*!

³⁷Hojjetoonni gooftaan isaanii yommuu dhufu dammaqanii isaan argatu kun, attam gammadu! Dhuguman isinitti hima, gooftaan isaanii wayyaa isaa sassaabbatee, isaan teessisee, ofii isaatii dhaabatee isaan in nyaachisa*.

³⁸Hamma halkan walakkaatti yookiis hamma iyya indaanqootti turee yoo dhufe iyyuu, dammaqanii warri inni isaan argatu sun attam haa gammadan.

³⁹Kanas immoo yaadadhaa, abbaan manaa yeroo hattuun itti dhuftu utuu beekee, qottee akka lixuuf hin dhiisu ture*.

⁴⁰Akkasuma ilmi namaa yeroo isin isa hin eegnetti waan dhufuuf, isinis immoo qophooftanii taa'uutu isin irra jira!? jedhe*.[118]

⁴¹Yommus Phexros, ?Yaa gooftaa, fakkeenya kana nu duwwaadhaaf dubbatta moo yookiis hundumaaf?? jedhee gaafate.

⁴²Gooftaan immoo deebiseefii, ?Egaa hojjetaan amanamaanii fi ogeessi, gooftaan isaa naa'ota isaa warra kaaniif yeroodhaan nyaata isaan ga'u haa kennuuf, mana isaa irratti hojii adeemsiftuu godhatu, isa kami ree?

⁴³Egaa hojjetaan kun gooftaan isaa dhufee akkanuma utuu hojjetuu kan isa argu gammachuu qaba.

⁴⁴Dhuguman isiniin jedha, gooftaan isaa qabeenya isaa hundumaa irratti ajajjuu isa godhata*.

⁴⁵Garuu hojjetaan sun yaada isaa keessatti, ?Gooftaan koo dhufuu in tura? jedhee dhiiraa fi dubartii warra isaa wajjin hojjetan reebuu, ofii isaatii immoo nyaachuu, dhuguu, machaa'uus yoo jalqabe,

⁴⁶gooftaan isaa guyyaa inni hin yaadatinii fi yeroo inni itti hin maminitti in dhufa, mataa isaas in tarsaasa; guyyaa isa dhumaattis ga'aa warra hin amaninii in hiraaf.

⁴⁷Hojjetaan waan gooftaan isaa isa irraa barbaadu beeku, akka irraa barbaadame sanatti immoo hin qopheessine yookiis hin hojjenne kun, rukuttaa baay'ee in rukutama*.

⁴⁸Waan irraa eeggatamu kan hin beekin garuu, kan isa rukuchiisu yoo hojjete iyyuu, rukuttaa xinnoo in rukutama; nama baay'een itti kenname harkaa baay'eetu barbaadama; nama hadaraa baay'een bira kaa'ame irraa kan caalu in gaafatu? jedhe.[119]

⁴⁹Yesus, ?Ani ibidda lafa irra buusuudhaafan dhufe; ibiddichi utuu kanaan dura bobeeffameera ta'ee attam nan hawwan ture.

⁵⁰Cuupphaan ani cuuphamuun ta'u tokko jira, hamma inni raawwatamuttis attaman dhiphadha laata*!

⁵¹Biyya lafaa irratti nagaa buusuudhaaf waanan dhufe isinitti fakkaataa? Waawuu, caalaatti wal diduu malee*.

⁵²Ammaa jalqabee maatiin mana tokkoo wal didu, shan yoo ta'an sadii warra lamaan didu, warri lamaanis warra sadan didu.

⁵³Abbaan ilma dida, ilmis abbaa dida, haati intala diddi, intallis haadha diddi, amaatiin haadha manaa ilmaa diddi, haati manaa ilmaas amaatii diddi? jedhe*.[120]

⁵⁴Yesus ammoo tuuta jaraatti dubbatee, ?Karaa lixa biiftuu duumessaa'aa yommuu dhufu, ?Bokkaatu rooba? jettu, in roobas.

⁵⁵Qilleensi gara mirgaa yommuu qilleensa'u immoo, ?Buluqatu dhufa? jettu, akkasuma ta'as.

⁵⁶Warra of hin arginee nana, bifa lafaa kan waaqaas ilaaltanii waan ta'u himuu in dandeessu, bara araaraa kana immoo attamitti hubachuu dadhabdan?

⁵⁷?Waan qajeelaan isa kam akka ta'e isinumti maaliif hin faraddani ree?

⁵⁸Fakkeenyaaf namni tokko gatii waan si irraa qabuuf abbaa firdii duratti si hadheessuudhaaf yoo ka'e, amma illee karaa irra utuu jirtuu isaa wajjin walii galuudhaaf dhama'i! Kanaa achi gara abbaa firdiitti si harkifata, abbaan firdiis eegduu mana hidhaatti si kenna, inni immoo mana hidhaatti si galcha.

⁵⁹Kana booddees gatii sana keessaa saantiimni tokko illee utuu hin hafin hamma baaftutti, matumaa mana hidhaa sana keessaa akka ati hin baane sittan hima? jedhe.