Read west central oromo HOJII ERGAMOOTAA 10 Bible Online

HOJII ERGAMOOTAA 10 - west central oromo bible

HOJII ERGAMOOTAA 10

¹Namichi Qorneelewos jedhamu tokko mandara Qiisaariyaa keessa jira ture; inni kutata waraana warra Roomaa ?Ixaaliqaa? jedhamee waamame irratti angafa dhibbaa ture.

²Inni nama Waaqayyoof bule, maatii isaa hundumaa wajjinis Waaqayyoon kan sodaate ture; warra Yihudootaa keessaa dadhaboota kan turan baay'ee in gargaare; yeroo hundumaattis dadhabbii malee Waaqayyoon in kadhata ture.

³Gaaf tokko akka sa'aatii salgafaatti mul'ata arge; mul'atichattis ergamaan Waaqayyoo tokko iddoo inni jiru dhufee, ?Yaa Qorneelewos!? jedhee itti dubbate.

⁴Qorneelewos yommus fajajee isa ilaalee sodaachaa, ?Maal inni yaa gooftaa?? jedhee gaafate. Ergamichi immoo deebiseefii, ?Waaqayyo kadhata kee dhaga'eera, dadhaboota gargaaruu kees yaadateera.

⁵Ammas namoota Yopheetti ergiitii Simoon isa Phexros jedhamu waamsisi.

⁶Innoo Simoon isa gogaa duugu bira keessummummaa buufatee jira; manni Simoon immoo isa galaana qarqaraa ti? jedheen.

⁷Ergamichi isatti dubbatee erga adeemee booddee, hojjetoota mana isaa keessaa nama lama, warra loltuu isaaf amanaman keessaa immoo, nama Waaqayyoon sodaatu tokko ofitti waamee,

⁸waan hundumaa isaanitti himee, Yopheetti isaan erge*.[59]

⁹Borumtaas warri ergaman utuu adeemanii mandara Yopheetti dhi'aatan. Phexros immoo akka sa'aatii ja'affaatti kadhachuudhaaf bantii mana isaanii isa diriiraatti ol ba'e.

¹⁰Inni yommus beela'ee, waan nyaatu barbaade; garuu utuu nyaanni isaaf qophaa'uutti jiruu, of wallaalee mul'ata arge.

¹¹Bantiin waaqaa banamee wanti akka baallee uffata guddaa mataa afuriin hidhamee, gara lafaatti utuu gad buufamuu arge.

¹²Bineensonni miilla afur qaban, lafa irra kan munyuuqan, qilleensa keessa kan balali'anis hundinuu uffata sana keessa turan.

¹³Sagaleen immoo, ?Phexros ka'i, qaliitii nyaadhu!? jedhee itti dubbate.

¹⁴Phexros garuu, ?Matumaa kun hin ta'u, yaa gooftaa, waan ciiggaasisaadhaa fi xuraa'aatti ilaalamu takkaa nyaadhee hin beeku? jedheen*.

¹⁵Ammas sagalichi si'a lammaffaa itti dubbatee, ?Waaqayyo kan qulleesse, ati xuraa'aatti hin ilaalin!? jedheen*.

¹⁶Kun immoo si'a sadii ta'e, wanti akka baallee uffataa sunis achumaan gara waaqaatti deebi'ee ol fuudhame.[60]

¹⁷Phexros waa'ee hiikaa mul'aticha arge sanaaf yaada isaatti utuu dhiphatuu, kunoo, namoonni Qorneelewos biraa ergaman, mana Simoon iyyaafachaa dhufanii, balbala dura ga'an.

¹⁸?Keessummaan, Simoon inni Phexros jedhamu tokko, mana kana jiraa laata?? jedhanii waamanii gaafatan*.

¹⁹Phexros amma iyyuu waa'ee hiikaa mul'ata argeetiif utuu yaadaa jiruu, hafuurri qulqulluun, ?Kunoo jarri tokko[61] alaa si barbaadu*;

²⁰kanaafis ka'i, gad bu'i! Anatu isaan erge waan ta'eef, utuu hin mamin isaan duukaa dhaqi!? ittiin jedhe.

²¹Phexros gara jaraatti gad bu'ee, ?Inni isin barbaaddan ana; eessaa dhuftan?? jedhee isaan gaafate.

²²Isaan immoo, ?Namicha qajeelaa Qorneelewos jedhamu Waaqayyoon kan sodaatu warra Yihudootaa hundumaa biraas maqaa gaarii kan qabu, angafa dhibbaa immoo kan ta'e tokkotu, nu erge; ergamaan Waaqayyoo inni qulqulluun, Qorneelewos mana isaatti si waamsisee, kan ati itti himtu akka si irraa dhaga'uuf isa abboomee ture? jedhanii deebisan.

²³Phexros ol isaan waamee keessumsiise.[62] Borumtaas jarreen gara isaatti ergamanii wajjin ka'ee adeeme; obboloota Yophee jiran keessaas jarreen tokko isaa wajjin dhaqan.

²⁴Guyyaa itti aanuttis Qiisaariyaatti galan; Qorneelewos immoo aantii isaatii fi michoota isaa waammatee, isaan eeggate.

²⁵Phexros utuu ol lixuuf jedhuu, Qorneelewos isa simuuf ba'ee, miilla isaatti kufee sagadeef.

²⁶Phexros immoo ol isa qabee, ?Ka'i, anis akkuma kee nama'o!? jedheen*.

²⁷Inni Qorneelewosii wajjin haasa'aa manatti ol galee, namoota baay'ee achitti walitti qabamanii argate.

²⁸Jaraan, ?Yihudii kan ta'e hundinuu, nama qomoo biraa wajjin walitti firoomuunii fi mana walii dhaquun seera akka hin ta'in, isin iyyuu gaarii gootanii beektu; Waaqayyo garuu eenyumaan iyyuu, ciigga'amaa yookiis xuraa'aa akkan hin jenneef anatti mul'iseera.

²⁹Kanaafan yommuu isin na waamsiftan utuun ittiin hin mormin dhufe; ammas maaliif akka anatti ergitan baruu nan barbaada? jedhe.[63]

³⁰Qorneelewos deebisee, ?Bultii afur dura yeroodhuma ammaa kanatti, mana kootti kadhata sa'aatii salgaffaa kadhachaa utuun jiruu, namni tokko uffata adii qaanqee uffatee ana dura dhaabatee*,

³¹?Qorneelewos, Waaqayyo kadhata kee siif dhaga'eera, dadhaboota gargaaruu kees siif yaadateera.

³²Ammas Yopheetti nama ergi, Simoon isa Phexros jedhamu, waamsisi; inni Simoon isa gogaa duugu, manni isaa galaana qarqaraa bira keessummummaa buufatee jira? anaan jedhe.

³³Kanaaf ani achumaanan sitti erge, dhufuun kees ba'eessa ta'e; ammas nuyi hundumti keenya waan gooftichi sitti nuuf hime hundumaa si irraa dhaga'uudhaaf, fuula Waaqayyoo duratti walitti qabamnee jirra? jedheen.[64]

³⁴Yommus Phexros jaratti dubbatee, ?Waaqayyo akka nama wal hin caalchifne amma hubadheera*.

³⁵Saba biyya lafaa hundumaa keessaa namni isa sodaatu, inni waan qajeelaa hojjetus isa biratti fudhatamaa dha*.

³⁶Waaqayyo dubbii isaa namoota Israa'elitti erguu isaa, misraachoo nagaa Yesus Kristosiin lallabuu isaa, Yesus Kristos kun immoo gooftaa namoota hundumaa ta'uu isaa, gaarii gootanii in beektu*.

³⁷Cuupphaa Yohannis lallabe booddee Galiilaadhaa jalqabee, biyya Yihudaa hundumaa keessatti kan raawwatames in beektu.

³⁸Waaqayyo, Yesus nama Naazireet kana hafuura qulqulluudhaan dibee humnaan akka isa guute, inni naanna'ee hojii gaarii akka hojjete, Seexanaan kan cunqurfaman akka fayyise, Waaqayyo isaa wajjin akka tures beekamaa dha*.

³⁹Nuyi biyya Yihudootaatii fi mandara Yerusaalemitti, waan Yesus hojjete hundumaaf dhuga-baatuu isaa ti; jarris isuma mukatti fannisanii ajjeesan.

⁴⁰Waaqayyo garuu guyyaa sadaffaatti du'aa isa kaasee, akka inni mul'atu godhe.

⁴¹Haa ta'u iyyuu malee, nama hundumaatti utuu hin ta'in, nuyi warra dhuga-baatuu isaa akka taanuuf fo'amnee, du'aa ka'uu isaa booddee isaa wajjin nyaannee dhugnetti mul'ateera*.

⁴²Inni wangeelicha namootatti akka lallabnuuf, warra jiranii fi warra du'an irratti abbaa firdii ta'ee moosifamuu isaas, akka dhugaa baanuuf nu abboomeera*.

⁴³Raajonni hundinuu, namni isatti amanu hundinuu maqaa isaatiin dhiifamuu cubbuu akka argatu, isaaf dhugaa ba'aniiru? jedhe*.[65]

⁴⁴Utuu Phexros dubbii kana itti himaa jiruu, hafuurri qulqulluun warra dubbicha dhaga'an hundumaa irratti bu'e*.

⁴⁵Warra Yihudootaa keessaa amantoonni Phexrosii wajjin Yopheedhaa dhufan, kennaan hafuura qulqulluu saba Waaqayyoo warra hin ta'iniif kennamuu isaa arganii, akka abjuu ta'an.

⁴⁶Warri hafuura qulqulluu fudhatan sun utuu isaan afaan dur hin beekneen dubbatanii, guddina Waaqayyoos mul'isanii, isaan dhaga'an*.

⁴⁷Phexros kana irratti, ?Jarreen amma hafuura qulqulluu, akkuma nuyi argannetti argatan kun, akka hin cuuphamneef eenyutu bishaan dhowwachuu danda'a ree?? jedhe*.

⁴⁸Isaan maqaa Yesus Kristositti akka cuuphamaniif abboome; jarri ergasii Phexros isaan bira akka turuuf in kadhatan*.[66]