Read west central oromo HOJII ERGAMOOTAA 14 Bible Online

HOJII ERGAMOOTAA 14 - west central oromo bible

HOJII ERGAMOOTAA 14

¹Phaawulosii fi Baarnaabaas mandara Iqoniiyumittis akkasuma mana sagadaa warra Yihudootaatti lixanii akki isaan itti lallaban kophaa ture; kanaaf namoonni baay'een warra Yihudootaa fi warra Griikotaa keessaa amantoota ta'an.

²Yihudoonni warri dubbichatti hin amanne garuu namoota warra saba Waaqayyoo hin ta'initti yaada hamaa galchanii obboloota irratti kaasan*.

³Utuma ta'uu iyyuu, ergamoonni yeroo dheeraadhaaf achi taa'anii, ija jabummaadhaan gooftaa Yesusin lallaban; gooftaan milikkinnii fi dinqiin adda addaa karaa isaanii akka raawwatamu gochuu isaatiin dubbii ayyaana isaatiif dhugaa ba'e*.

⁴Namoonni mandarichaa garuu wal hiran; kaan gara Yihudootaa, kaan immoo gara ergamootaa goran.

⁵Yommus warri saba Waaqayyoo hin ta'inii fi warri Yihudootaa, warra biyya bulchanii wajjin ergamoota sana loluudhaaf dhagaadhaanis rukutuudhaaf qophaa'an*.

⁶Ergamoonni garuu kana yommuu baran mandaroota kutaa biyya Liqaa'oniyaa Lisxiraadhaa fi Derbeetti biyya naannoo isaa jiruttis baqatanii*,

⁷achittis wangeela lallabaa turan.[89]

⁸Mandara Lisxiraa keessa namni naafti tokko ture. Namichi kun miilli isaa lawwaasa'aa waan tureef, dhalachuu isaatii jalqabee takkaa hin adeemne*.

⁹Inni achi ciisee waan Phaawulos jedhu dhaggeeffachaa ture; yommus Phaawulos ija isaa keessa ilaalee, fayyifamuudhaaf amantii akka inni qabu arge*.

¹⁰Achumaanis sagalee guddaadhaan, ?Ka'i qajeelii, miilla keetiin dhaabadhu!? jedheen, namichi utaalee ka'ee asii fi achi adeeme.

¹¹Namoonni baay'atanii achi turan waan Phaawulos hojjete yommuu argan, sagalee isaanii ol fudhatanii afaan Liqaa'oniyaatiin, ?Waaqayyoliin namoota fakkaatanii gara keenyatti gad bu'aniiru? jedhanii dubbatan*.

¹²Baarnaabaasin ?Zeos? jedhan, Phaawulosin immoo kan dubbate isa waan tureef, akka ergamaa waaqayyolii isaaniitti ?Hermees? jedhanii moggaasan.

¹³Lubni, galma Zeos isa mandaricha duubaa keessaa hojjetu tuntunootaa fi daraaraa battee dha'ame gara kellaa mandarichaatti fide; lubichi jara achi turanii wajjin ergamoota sanaaf aarsaa dhi'eessuu barbaade.[90]

¹⁴Ergamoonni sun Baarnaabaasii fi Phaawulos waa'ee kanaa yommuu dhaga'an wayyaa isaanii tarsaasanii fiigichaan tuuta jara sanaa keessa lixanii itti iyyan.

¹⁵?Jara nana, inni isin hojjettan kun maali? Nuyi waaqayyolii miti, akkuma keessan nama. Wanta waa'ee hin baafne waaqessuutii gara Waaqayyo isa jiraataatti akka deebitaniif dubbii gammachiisaa isinitti in himna; Waaqayyo inni jiraataan waaqichaa fi laficha, galaanicha, isaan kana keessa kan jiraatan hundumaas uumeera*.

¹⁶Bara dhaloota darbaniitti sabni biyya lafaa irraa hundinuu karaa isaanii haa adeemaniif isaan dhiise*.

¹⁷Haa ta'u iyyuu malee, waaqa irraa bokkaa isiniif roobsee, ija midhaaniis yeroo isaatti guutachiise. Soora isiniif kennee garaa keessanis gammachuudhaan guute; waan gaarii kana hundumaa gochuu isaatiinis gooftummaa isaa mul'iseera? jedhaniin*.

¹⁸Kana hundumaa irratti iyyuu ergamoonni rakkina baay'eedhaan aarsaa akka isaaniif hin dhi'eessine jara dhowwan.

¹⁹Gaafas Yihudoonni mandaroota Anxokiyaatii fi Iqoniiyumii dhufan tokko tuuta jaraa sana sossobanii, Phaawulosin dhagaadhaan rukutan; du'eera se'aniis mandaricha keessaa gad gototan*.

²⁰Amantoonni garuu dhufanii isatti naanna'anii dhaabannaan, Phaawulos lafaa ka'ee mandaratti ol deebi'e; borumtaa immoo Baarnaabaasii wajjin mandara Derbee dhaqe.[91]

²¹Phaawulosii fi Baarnaabaas mandara Derbeetti wangeela lallabanii, namoota baay'ee amantoota godhan; kana booddees mandaroota Lisxiraatii fi Iqoniiyumitti Anxokiyaa isa biyya Phisiidiyaattis deebi'an.

²²Isaan yaada amantootaa jajjabeessanii, amantii isaaniitti akka cimaniif gorsan; ?Gidiraa baay'ee keessa darbuudhaan mootummaa Waaqayyootti galuun nuuf in ta'a? jedhaniin*.

²³Ergamoonni tokkon tokkon waldaa sanaaf jaarsolii fo'an; soomanii erga kadhatanii booddee, amantoota sana hundumaa harka gooftaa isa isaan itti amananiitti hadaraa kennan*.

²⁴Isaan ergasii kutaa biyya Phisiidiyaa keessa darbanii kutaa biyya Phamfiliyaa dhufan.

²⁵Phergeettis dubbicha lallabanii mandara Ataalii'aatti gad bu'an.

²⁶Achiis markabaan ka'anii Anxokiyaa biyya Sooriyaatti, hojii amma raawwatan kanaaf iddoo itti ayyaana Waaqayyootti kennamanii turanitti deebi'an*.

²⁷Erga Anxokiyaa ga'anii amantoota waldaa sanaa walitti waaman; Waaqayyo inni isaanii wajjin ture kan hojjete hundumaa, attamittis karaa itti warri saba Waaqayyoo hin ta'in amanan, akka isaaniif bane itti himan*.

²⁸Yeroo dheeraas amantootaa wajjin turan.[92]