Read west central oromo HOJII ERGAMOOTAA 19 Bible Online

HOJII ERGAMOOTAA 19 - west central oromo bible

HOJII ERGAMOOTAA 19

¹Apholos amma illee Qorontos utuu jiruu, Phaawulos kutaa biyya gara olii keessa darbee, Efesoon dhufe. Achitti immoo bartoota gooftaa tokko argatee,

²?Yeroo amantan hafuura qulqulluu fudhattaniittuu?? isaaniin jedhe. Isaan immoo, ?Hafuurri qulqulluun akka jiru iyyuu nuyi hin dhageenye? jedhanii deebisan*.

³Kana irratti Phaawulos, ?Yoos immoo isin maalitti cuuphamtani ree?? jedhe; isaan immoo, ?Cuupphaa Yohannisitti? jedhan.

⁴Phaawulos yommus, ?Yohannis isa booddee isa dhufuuf turetti, kana jechuunis Yesusitti, akka amanan saba barsiisee, cuupphaa geddarannaa yaada garaa cuuphe? jedhe*.

⁵Jarri kana dhaga'anii maqaa gooftaa Yesusitti cuuphaman.

⁶Yeroo Phaawulos harka isaa isaan irra kaa'etti hafuurri qulqulluun isaan irratti bu'e; isaan afaan hin beekamneen haasa'an, raajiis in dubbatan*.

⁷Isaan walumatti akka namoota kudha lamaa turan.

⁸Phaawulos immoo hamma ji'a sadiitti mana sagadaa warra Yihudootaatti deddeebi'ee, ija jabinaan barsiise; yeroo kanattis wajjin dudubbachaa akka isaan amansiisuufis waa'ee mootummaa Waaqayyoo hubachiisaa ture*.

⁹Isaan keessaa kaan garuu mata-jabeeyyii waan turaniif, namoota sana keessatti barsiisa karaa kristiiyaanaa irratti waan hamaa in dubbatu turan malee, hin amanne. Akkasitti Phaawulos warra amanan of duukaa fudhatee jara sana keessaa ba'e; guyyaa guyyaatti mana barumsaa Xiraanos keessatti warra amantootaa wajjin dudubbachaa ture*.

¹⁰Kunis akka waggaa lamaa itti fufnaan, namoonni kutaa biyya Asiyaa keessa jiraatan hundinuu Yihudoonnii fi Griikonni dubbii gooftaa in dhaga'an.[116]

¹¹Waaqayyo dinqii takkaa hin beekamin harka Phaawulosiin in raawwata ture*.

¹²Kanaafis erbeen inni ittiin dafqa isaa haxaa'atu yookiis marati isaa warra dhukkubsatanitti yommuu geeffamu, dhukkubni isaanii isaan in dhiisa, hafuuronni hamoonnis keessaa in ba'u turan*.

¹³Yihudoonni warri asii fi achi adeemanii hafuurota hamoota baasanis turan; isaan immoo namoota hafuurota hamoota qabanitti maqaa gooftaa Yesus itti waamuu yaalanii, hafuurota sanaanis, ?Maqaa Yesus isa Phaawulos lallabuutiin abboomamaa!? jedhan*.

¹⁴Ilmaan Iskoyaas, angafa lubootaa warra Yihudootaa, torbanuu kana gochaa turan.

¹⁵Hafuurri hamaan garuu deebisee, ?Yesusin beeka, Phaawulosinis bareera; isin garuu eenyufa'i?? jedhee gaafate*.

¹⁶Namichi hafuurri hamaan keessa tures isaanitti utaalee, humna isaan caalee uffata irratti cire; jarris mammadaa'anii qullaa isaanii harkaa ba'anii mana sanaa baqatan.

¹⁷Kunis Yihudootaa fi Griikota Efesoon jiraatan biratti in beekame. Kana irratti isaan guddaa na'an; maqaan gooftaa Yesus garuu ulfina guddaa argate*.

¹⁸Warra amanan keessaas baay'een dhufanii, cubbuu isaanii mul'inatti himatanii, waan hojjechaa turan beeksisan.

¹⁹Isaan keessaas warri qoricha namatti gochaa turan macaafota ittiin hojjechaa turan walitti guuranii, fuula hunduma isaanii duratti guban; gatiin macaafota sanaa hamma meetii kuma digdamii shaniitti shallagame.

²⁰Akkasitti dubbiin gooftaa humna isaa argisiisee, bal'achaa, guddachaas in adeeme*.[117]

²¹Dubbii kana booddee Phaawulos biyya Maqedooniyaa fi Akaayyaa keessa ba'e Yerusaalem dhaquudhaaf, murtoo godhate; ?Ergan achi ga'ee immoo Roomaas arguun ana irra jira? jedhee ture*.

²²Gargaartota isaa keessaa lama Ximotewosii fi Erasxosin gara Maqedooniyaatti ergee, ofii isaatii kutaa biyya Asiyaa keessa takka ture.[118]

²³Yeroo kana keessa waa'ee barsiisa karaa kristiiyaanaatiif mandara Efesoonitti gooliin guddaan in ka'e*.

²⁴Namichi tokko maqaan isaa Demeexros kan jedhamu meetii baqsa ture; bifa galma waaqayyittii tolfamtee, Arxemiis jedhamtu meetii irraa baqsee, namoota hojicha beekaniif karaa hojii baay'ee baneef*.

²⁵Demeexros jarreen kana, warra hojii kana keessaa qabanii wajjin, iddoo tokkotti walitti qabee, ?Jarana, soorumni keenya hojii kana irraa akka dhufu hundumti keessan in beektu.

²⁶Waan namichi Phaawulos jedhamu kun hojjechaa jiru immoo, isin ofii keessanii arguu dhaga'uus in dandeessu. ?Waaqayyoliin harka namaatiin tolfaman, homaa miti? jedhee, addana Efesoonitti duwwaa utuu hin ta'in, kutaa biyya Asiyaa gara caalutti namoota baay'ee amansiisee yaada isaanii geddarsiiseera*.

²⁷Ammas hojiin keenya maqaa gadhee argachuu isaa duwwaa utuu hin ta'in, galmi Arxemiis waaqayyittii guddittii, akka waan gatii hin qabnetti lakkaa'amuun isaa in sodaachisa; guddinni waaqayyittii, ishee warri Asiyaa keessaa, warri biyya lafaa keessa jiranis hundinuu itti sagadan, baduuf jedha? isaaniin jedhe.[119]

²⁸Yeroo kana dhaga'anittis baay'ee aaranii, ?Arxemiis warra Efesoon, guddittii dha? jedhanii iyyan.

²⁹Waci kun mandaricha keessa guute. Warri wacan kunis Gaayosii fi Arisxaarkos kan jedhaman, jarreen Maqedooniyaa warra Phaawulosii wajjin adeemaa turan, butanii gara mana walga'iitti fiigan.

³⁰Phaawulos ofii isaatii tuuta namoota walitti qabaman sana keessatti argamuu barbaade; amantoonni garuu gad isa dhiisuu didan.

³¹Geggeessituu kutaa biyya Asiyaa sanaa kan ta'an keessaas, warri fira Phaawulos ergaa itti erganii, akka inni lafa walga'ii sana hin dhaqneef isa gorsan.

³²Kana gidduutti walga'iin sun hundinuu in huursa ture; kaan waan tokkotti wacu; warri kaan immoo waan biraatti wacu; baay'een isaanii maaliif akka walitti qabaman iyyuu hin beekne turan.

³³Warri Yihudootaa namicha Iskindir jedhamu tokko tuttuqanii waan kaasaniif, tuuta jaraa keessaa gar tokko immoo gara fuula duraatti isa waaman. Iskindiris akka falmannaa, jaratti waa dubbachuu barbaadee, calluma haa jedhaniif harkaan isaan hawwate.

³⁴Isaan garuu, inni Yihudii ta'uu isaa hubatanii ergaan-takkaa, ?Arxemiis warra Efesoon, guddittii dha? jedhanii hamma sa'aatii lamaa kan ga'us isuma irra deddeebi'anii iyyan.

³⁵Booddees caafaan mandara sanaa saba sana calluma jechisiisee, ?Yaa namoota Efesoon! Mandarri Efesoon, galma Arxemiis guddittiitii fi dhagaa bifa fakkeenya ishee, isa waaqa irraa gad bu'e, akka isheen eegdu, kan hin beekne jiraa laata?

³⁶Kanas namni falmu erga hin jirree, isin gab jechuutu isiniif ta'a; waan tokko illees, utuu itti hin yaadin hojjechuun isiniif hin ta'u.

³⁷Ammas isin jarreen kana as fiddaniittu; isaan garuu mi'a galma ishee hin saamne yookiis waaqayyittii hin arabsine.

³⁸Demeexrosii fi hojjetoonni isaa wajjin jiran waan ittiin nama tokko illee hadheessan yoo qabaatan, guyyaan yaa'ii jira, warri biyya seerratanis jiru, achitti walitti haa falman!

³⁹Kana malee, waan isin barbaaddan yoo jiraate immoo, kora mandara kanaa isa tooraan waamame keessatti ilaalamuutu ta'a.

⁴⁰Goolii har'a ta'e kanatti itti gaafatamuun keenya hin oolu; gooliin kun ka'uu isaatiif sababiin hin jiru, nus immoo waa'ee isaatiif deebii ga'u kennuu in dadhabna? jedhe.

⁴¹Kana dubbatee, walga'ii sana gargar deebise.