Read west central oromo HOJII ERGAMOOTAA 8 Bible Online

HOJII ERGAMOOTAA 8 - west central oromo bible

HOJII ERGAMOOTAA 8

¹Saa'ol ajjeefamuu Isxifaanositti walii galee ture. Kana irratti immoo guyyuma sana waldaa amantoota Yerusaalem keessa jirtu irratti ari'atamuu guddaatu ka'e; ergamoota irraa kan hafe amantoonni hundinuu kutaa biyya Yihudaatii fi Samaariyaa keessa bittimfaman*.

²Jarreen Waaqayyoof bulan tokko Isxifaanosiif boo'icha guddaa isaa boo'anii, reeffa isaa awwaalan.

³Saa'ol garuu waldaa amantootaa lafa irraa balleessuudhaaf manneen keessa adeemee, dhiirotaa fi dubartoota amantoota ta'an harkisee, mana hidhaatti in kenna ture*.[44]

⁴Amantoonni warri bittimmaa'an biyya keessa naanna'anii, dubbicha in lallaban.

⁵Filiphos gargaartota keessaa tokko, mandara Samaariyaa tokkotti gad bu'ee, namoota mandarichaatti Kristosin lallabe.

⁶Tuuti jaraas gurra qeensanii, dubbii Filiphos dubbate dhaggeeffatan; milikkita inni hojjetes in argan.

⁷Hafuuronni hamoonni sagalee guddaadhaan caraananii, namoota baay'ee keessaa ba'an; namoonni baay'een dhagni isaanii gar tokko kan du'e, warri hokkolanis in fayyifaman*.

⁸Kanattis warri mandara sanaa guddaa in gammadan.[45]

⁹Mandara sana namichi Simoon jedhamu, qoricha namatti gochuu isaatiin namoota Samaariyaa dinqisiisee, nama guddaa kan ofiin jedhe tokko jira ture.

¹⁰Namoonni mandara sanaa hundinuu xixinnayyootaa hamma gurguddootaatti dubbiin isaa dhugaa dha jedhanii fudhatanii, ?Namichi kun, humna Waaqayyoo isa guddaa jedhamee waamamu, of keessaa qaba? jedhan.

¹¹Isaan, Simoon kun yeroo dheeraadhaa jalqabee qoricha namatti gochuu isaatiin waan isaan dinqifachiiseef, isa duukaa rarra'aa turan.

¹²Amma garuu namoonni kun, Filiphos waa'ee mootummaa Waaqayyootii fi, waa'ee maqaa Yesus Kristos misraachoo yommuu isaanitti lallabe amananii, dhiironnis dubartoonnis in cuuphaman*.

¹³Simoon ofii isaatii iyyuu amanee, erga cuuphamee milikkitaa fi dinqii gurguddaa, Waaqayyo harka Filiphosiin hojjete arginaan dinqifatee Filiphos biraa adeemuu jibbe.[46]

¹⁴Yommus ergamoonni Yerusaalem jiran warri Samaariyaa dubbii Waaqayyoo fudhachuu isaanii dhaga'anii, Phexrosii fi Yohannisin erganiif.

¹⁵Isaan Samaariyaatti gad bu'anii, hafuura qulqulluu akka argataniif amantootaaf kadhatan.

¹⁶Maqaa gooftaa Yesus duwwaatti cuuphamanii turan malee, hafuurri qulqulluun isaan keessaa nama tokko irratti illee hin buune.

¹⁷Ergamoonni harka isaanii isaan irra kaa'an, isaan immoo hafuura qulqulluu argatan*.[47]

¹⁸Simoon yommus harki ergamootaa nama irra kaa'amuudhaan, hafuurichi akka kenname arginaan, horii ergamootaaf fidee,

¹⁹?Harka koo kanan irra kaa'u hundinuu hafuura qulqulluu haa argatuuf; humna akkasii anaafis immoo kennaa!? jedhe.

²⁰Phexros garuu deebiseefii, ?Kennaan Waaqayyoo horiidhaan in bitama jettee waan yaaddeef, horiin kee sii wajjin haa badu!

²¹Yaadni garaa kee Waaqayyo duratti qajeelaa waan hin ta'iniif, ati dubbii kana keessaa hin qabdu, qoodas hin qabdu.

²²Kanaafis hammina kanattii yaada garaa kee geddaradhu, gooftichas kadhadhu, hamaa yaaduu kee kana dhiifamuu siif godha ta'a.

²³Yaadni hadhaa'aan akka si keessa guuteef, cubbuun akka si hidhate nan arga? jedhe*.

²⁴Kana irratti Simoon deebisee, ?Hadaraa jecha isin anaan jettan keessaa, tokko illee ana irra akka hin geenyeef gooftaa anaaf kadhadhaa!? jedhe.

²⁵Ergamoonni sun waa'ee Yesus dhugaa ba'anii, dubbii gooftaas dubbatanii, gandeen warra Samaariyaa baay'eetti wangeela lallabaa Yerusaalemitti deebi'an.[48]

²⁶Ergasii ergamaan Waaqayyoo Filiphosiin, ?Ka'i, waareetti gara mirgaa gara karaa onaa, isa Yerusaalemii Gaazaatti geessuu dhaqi!? jedhe.

²⁷Filiphos yommus ka'ee dhaqe. Kunoo, namichi xu'aashiin tokko itti dhufe; namichi kun qabeenya ?Kandaakee? mootittii warra Itiyoophiyaa hundumaa irratti abboomaa ture; inni Waaqayyoof sagaduudhaaf Yerusaalem dhaqee ture.

²⁸Utuu achii galuus konkolaataa kottee duudaadhaan harkifamu irra taa'ee, macaafa raajicha Isaayaas dubbisaa in adeema.

²⁹Hafuurri qulqulluun yommus Filiphosiin, ?Konkolaataa kanatti dhi'aadhuutii, isa duukaa adeemi!? jedhe.

³⁰Filiphosis konkolaataa sanatti fiigee, namichi macaafa raajicha Isaayaas utuu dubbisuu dhaga'e, ?Waan dubbisuutti jirtu kana in hubattaa?? jedhee isa gaafate.

³¹Namichi immoo, ?Utuu namni anaaf hin ibsin, attamittan hubachuu danda'a?? jedhee deebise; akka Filiphos konkolaataa yaabee isa bukkee taa'uufis in kadhate.

³²Dubbiin macaaficha inni dubbisaa ture, ?Inni akka hoolaa qalamuudhaaf geeffame, akka ilmoon hoolaa, namni rifeensa ishee yommuu muru sagalee ishee hin dhageessifne, akkasuma innis afaan isaa hin saaqqatu.

³³Nama gad deebi'aa waan ta'eef, dhugaan isaa hin ilaalamne; hidda dhala dhala isaas eenyutu hima ree? Jireenyi isaa lafa irraa in fuudhama? kan jedhu ture*.

³⁴Namichi Itiyoophiyaa sun yommus Filiphosiin, ?Raajichi waa'ee eenyuutiif kana dubbata? Hadaraa anatti himi! Waa'ee ofii isaatii moo yookiis waa'ee nama biraa ti?? jedhee gaafate.

³⁵Filiphos kutaa macaafa kanaatii jalqabee, waa'ee Yesus misraachoo itti himuutti ka'e.

³⁶Utuma karaa sana adeemanii, bishaan tokko bira ga'an; namichi immoo Filiphosiin, ?Bishaan kunoo ti, akka ani hin cuuphamneef maaltu na dhowwa?? jedhe*.[49] [

³⁷Filiphos yommus, ?Garaa kee hundumaan yoo amanteef, siif in danda'ama? jedheen; kana irratti inni, ?Yesus Kristos ilma Waaqayyoo akka ta'e nan amana? jedhee deebise.]

³⁸Namichi immoo konkolaatichi akka dhaabatuuf abboome; Filiphosii fi namichi bishaan keessa lixanii, Filiphos isa in cuuphe.

³⁹Bishaanicha keessaa yommuu ba'an, hafuurri gooftaa Filiphosin butee, fuudhee adeeme. Namichi deebi'ee isa hin argine; haa ta'u iyyuu malee, karaa isaa itti fufee gammadaa adeeme*.

⁴⁰Filiphos garuu Azoxonitti argamee, biyyicha keessa naanna'ee, mandara hundumaatti wangeela lallabaa mandara Qiisaariyaa dhufe*.[50]