Read west central oromo GARA WARRA ROOMAA 3 Bible Online

GARA WARRA ROOMAA 3 - west central oromo bible

GARA WARRA ROOMAA 3

¹Egaa Yihudiin caalmaa maalii qaba ree? Yookiis bu'aan dhagna-qabaa maali ree?

²Karaa kam iyyuu bu'aa baay'ee qaba, bu'aa kana keessaa inni caalu, sagaleen abdii Waaqayyoo Yihudootatti hadaraa kennamuu isaa ti*.

³Isaan keessaa kaan yoo hin amanamne ta'an immoo attam ta'a ree? Amanamuu dhabuun isaanii immoo amanamummaa Waaqayyoo oolchaa ree*?

⁴Kun raawwatee ta'uu hin danda'u; namni eenyu illee sobaa yoo ta'e iyyuu akkuma caaffanni qulqullaa'aan, ?Ati dubbii kee hundumaan dhugaa akka argatutti, yeroo si hadheessanittis akka irra aantutti? jedhu, Waaqayyo dhuga-qabeessa*.

⁵Garuu jal'inni keenya qajeelina Waaqayyoo mul'isuudhaaf hojjeta yoo ta'e, nuyi maal jenna ree? Waaqayyo yeroo nutti dheekkamu jal'ina hin hojjetuu ree? Kanas akka yaada namaattan dubbadha*.

⁶Kun raawwatee ta'uu hin danda'u! Silaa immoo Waaqayyo attamitti biyya lafaatti farada ree*?

⁷Garuu soba kootiin dhugaan Waaqayyoo caalaa mul'atee, ulfina kennisiisaaf yoo ta'e, maaliif ammuma iyyuu akka cubbamaatti yakki anatti muramaa jira ree?

⁸Yoos immoo gaariin akka dhufuuf hamaa in hojjenna hin jennuu ree? Kaan akkas jechuu isaa ti jedhanii maqaa koo balleessaniiru, isaan akkasiitti yakka muruun garuu qajeelaa dha*.[11]

⁹Egaa nuyi warri Yihudootaa caalmaa qabna moo ree? Waawuu, karaa tokko illee hin qabnu; anoo kanumaan dura Yihudoonni, Yihudoota warri hin ta'in hundinuus humna cubbuu jala akka jiran mul'iseera*.

¹⁰Caaffanni qulqullaa'aan, ?Namni qajeelaan hin jiru, lakkii, tokko illee hin jiru.

¹¹Namni tokko iyyuu hin hubatu, namni tokko illees Waaqayyoon hin barbaadu;

¹²namoonni hundinuu karaa Waaqayyoo irraa goraniiru, ergaan-takkaa warra dhimma hin baafne ta'aniiru; namni gaarii hojjetus tokko illee hin jiru*,

¹³afaan isaaniitiin gara awwaala banamaatti nama geessu, arraba isaaniitiin in gowwoomsu; hadhaan mar'ataa hidhii isaanii jala jira*.

¹⁴Afaan isaanii abaarsaa fi dubbii hadhaa'aadhaan guutuu dha*;

¹⁵miilli isaanii dhiiga dhangalaasuutti ariifataa dha,

¹⁶karaa isaan irra darban irra diiguu fi gadadichuutu jira;

¹⁷isaan karaa nagaa immoo hin beekan*;

¹⁸Waaqayyoon sodaachuun yaada isaanii keessa hin jiru*? jedha.[12]

¹⁹Ammas seerri waanuma jedhu, warra seera jala jiranitti akka dubbatu nuyi in beekna; kanas nama hundumaa afaan qabachiisuudhaaf, guutummaa biyya lafaas firdii Waaqayyoo jala galchuudhaaf in dubbata.

²⁰Egaa nama kan ta'e tokko illee wanta seerri nama irraa barbaadu gochuudhaan Waaqayyo duratti qajeelaa hin ta'u. Seerri cubbuun maal akka ta'e nama hubachiisa*.[13]

²¹Amma garuu karaa seerichaa utuu hin ta'in, karaan namni ittiin qajeelaa ta'u Waaqayyo biraa mul'ateera; seerrii fi raajonni karaa kanaaf dhugaa ba'aniiru*.

²²Namni Yesus Kristositti amanuudhaan fuula Waaqayyoo duratti qajeelaa in ta'a; kana irrattis warra amanan hundumaaf garaagarummaan hin jiru*.

²³Hundinuu yakkaniiru, ulfinni Waaqayyoos isaanitti hir'ateera*.

²⁴Isaanumti immoo ayyaana Waaqayyoo isa karaa furii Yesus Kristos tola isaaniif kennameen, qajeelota in ta'u*.

²⁵Inni dhiiga isaa dhangalaasee du'uudhaan warra isatti amananiif mi'a araaraa haa ta'uuf, Waaqayyo isa dhaabe. Waaqayyo ofii isaa qajeelaa akka ta'e mul'isuudhaaf kana godhe; obsa isaatiinis cubbuu namoonni kanaan dura hojjetan irra darbeeraaf*.

²⁶Bara sanaattis Waaqayyo qajeelummaa isaa argisiisuuf inni ofii isaa qajeelaa ta'uu isaa, nama Yesusitti amanus qajeelaa gochuu isaa mul'iseera.[14]

²⁷Egaa maaliin of jajna ree? Waan ittiin of jajnu tokko illee hin qabnu, seera maaliitiin dhabna? Akka abboommii seeraatti hojjechuudhaanii? Waawuu, akka abboommii amantiitti jiraachuudhaan malee*.

²⁸Namni waan seerri abboomu hojjechuudhaan utuu hin ta'in, amanuu duwwaadhaan Waaqayyo duratti qajeelaa akka ta'u cimsinee in barsiifna*.

²⁹Waaqayyo keenya Waaqayyo warra Yihudootaa duwwaa dha moo? Saba warra Yihudoota hin ta'iniifis Waaqayyo mitii ree? Eyyee, inni saba warra Yihudoota hin ta'iniif immoo Waaqayyoo dha*.

³⁰Waaqayyo tokkicha erga ta'ee, saba Yihudootaa warra dhagna qabatan amantii isaaniitiin, saba warra kaan warra dhagna hin qabatinis amantiidhuma isaaniitiin qajeelota isaan in godhata*.

³¹Egaa immoo amantii kanaan seera diigna jechuu dha moo ree? Waawuu, kun raawwatee ta'uu hin danda'u, seera jabeessinee dhaabna malee*.[15]