Read west central oromo 1 GARA WARRA QORONTOS 11 Bible Online

1 GARA WARRA QORONTOS 11 - west central oromo bible

1 GARA WARRA QORONTOS 11

¹Egaa akkuma ani fakkeenya Kristos fudhadhe, isinis immoo fakkeenya koo fudhadhaa*![54]

²Waan hundumaatti waan na yaadattaniif, barsiisa ani isin barsiisetti qabamtanii waan jirtaniif, isin nan jaja.

³Amma immoo Kristos mataa warra dhiiraa, abbaan manaa mataa haadha manaa, Waaqayyo mataa Kristos ta'uu isaa, akka beektan nan barbaada*.

⁴Dhiirri waldaa keessatti yommuu kadhatu yookiis yommuu waan Waaqayyo itti mul'ise himu, yoo haguuggate mataa isaa in salphisa.

⁵Dubartiin waldaa keessatti yommuu Waaqayyoon kadhattu yookiis yommuu waan Waaqayyo itti mul'ise himtu, yoo haguuggachuu dhabaatte garuu, mataa ishee in salphifti; isheen kun dubartii mataa haaddattee wajjin wal hin caaltu.

⁶Egaa dubartiin yoo haguuggachuu dhabaatte, rifeensa mataa ishee murachuu iyyuu hin yeellaatu, dubartiin sababii malee rifeensa mataa ishee muratte yookiis haaddatte salphachuu yoo jibbite immoo haa haguuggattu.[55]

⁷Dhiirri bifa Waaqayyootiif ulfina Waaqayyoo kan argisiisu erga ta'ee, haguuggachuun isaaf hin ta'u; dubartiin garuu ulfina dhiiraa in argisiifti*.

⁸Jalqabatti dubartiitu dhiirattii argame malee, dhiirri dubartiittii hin argamne.

⁹Dubartiitu dhiiraaf jedhee uumame malee, dhiirri dubartiidhaaf jedhee hin uumamne*.

¹⁰Kanaaf dubartiin ergamoota Waaqayyoo duratti aboo jala jiraachuu ishee kan argisiisu, haguuggii mataa irraa qabaachuun in ta'aaf*.

¹¹Haa ta'u iyyuu malee, gooftaan ishee dubartii isa dhiiraattii, isa dhiiraas ishee dubartiittii addaan baasee hin ilaalu.

¹²Dubartiin dhiirattii akkuma argamte akkasuma immoo dhiirri dubartii irraa dhalate, hundinuu garuu Waaqayyo biraa dhufan.[56]

¹³Dubartiin utuu mataa ishee hin haguuggatin waldaa keessatti Waaqayyoon kadhachuun qajeelaa dhaa ree? Isinumti ofii keessanii faradaa!

¹⁴Dhiirri rifeensa mataa isaa dheereffachuun isaaf salphina akka ta'e, akki namni itti uumame isin hin barsiisuu ree?

¹⁵Garuu dubartiin rifeensa dheeraa yoo qabaatte, kun isheedhaaf ulfina mitii ree? Rifeensi ishees akka isheen ittiin golgattuuf kennameef.

¹⁶Nama yaada kanaan mormuu barbaaduuf garuu, nuyi, waldoonni Waaqayyoos amala kan biraa hin qabnu*.[57]

¹⁷Yeroo sagadaaf walitti qabamtanitti, akka itti walitti qabamuu keessanii wayyeessuu irra caalaa kan balleessu waan ta'eef, waa'ee isaatiif isa ani dubbachuuf jiru keessatti isin hin jajadhu.

¹⁸Hundumaa dura waldaan keessan yommuu walitti qabamu, yaadaan gargar ba'uun isin keessa akka jiru dhaga'eera; kana keessaa kaan dhugaa akka ta'e nan amana*.

¹⁹Isin keessaa warri qoramanii fudhataman akka beekamaniif, isin gidduutti barsiisa isaaniitiin gargar ba'uun jiraachuutu ta'a*.

²⁰Egaa akka isin itti walitti qabamtan kanatti walitti qabamuun, irbaata gooftaa isa qulqulluu nyaachuuf hin ta'u.

²¹Yeroo nyaataatti hundinuu adduma addaan nyaata fidee dhufee nyaachuutti in ka'a, inni tokko in beela'a, inni kaan immoo in machaa'a.

²²Maali? Mana itti nyaattanii dhugdan hin qabdanii ree? Yookiis waldaa Waaqayyoo tuffachuu keessanii? Warra homaa hin qabnes yeellaasisuu keessanii? Ani maal isiniin jedhu ree? Isin jajadhuu ree? Ani kana irratti isin hin jajadhu*.[58]

²³Barsiifni ani isinitti dabarse, isuma ani gooftaa biraa fudhadhe ture. Innis, Yesus gooftaan halkanuma itti dabarfamee kenname sanatti buddeena fuudhee,

²⁴Waaqayyoon galateeffatee, buddeenicha cabsee, ?Inni isiniif cabe kun dhagna koo ti, kanas seenaa kootiif godhadhaa!? jedhe.

²⁵Erga nyaatanii booddees akkuma sanatti xooficha fudhatee, ?Xoofoon kun kakuu isa haaraa, dhiiga kootiin dhaabatuu dha; yeroodhuma isa keessaa dhugdanitti seenaa kootiif godhadhaa!? jedhe*.

²⁶Yeroodhuma buddeena kana nyaattanitti, yeroodhuma xoofoo kana keessaa dhugdanitti, hamma gooftaan deebi'ee dhufutti akka inni [namootaaf] du'e in labsitu.[59]

²⁷Kanaafis sababii maaliitiif akka dhi'aatu utuu gargar hin baasin namni buddeenicha nyaatu, xoofoo gooftaa keessaas dhugu, dhagna gooftaa dhiiga isaas in yakka.

²⁸Egaa, namni qoree of haa ilaalu! Ergasiis buddeenicha irraa haa nyaatu, xooficha keessaas haa dhugu*.

²⁹Dhagna gooftaa ta'uu isaa yaadatee utuu gargar hin baasin namni buddeenicha nyaatu, xooficha keessaas dhugu, firdii of irratti fiduudhaaf in nyaata in dhugas*.

³⁰Sababii kanaaf baay'een keessan dhukkubsatoo dha, dadhaboo dhas; namoonni kaanis du'aniiru.

³¹Utuu of irratti arginee nuyi of irratti murreerra ta'ee, Waaqayyo nutti hin faradu ture.

³²Yeroo amma nutti faradamu immoo, firdiin bara baraa biyya lafaa wajjin akka nutti hin faradamnetti, gooftichi akkasitti adabee nu qajeelcha*.[60]

³³Kanaafis yaa obboloota ko! Irbaata gooftaa isa qulqulluu nyaachuudhaaf yommuu walitti qabamtan wal eegaa.

³⁴Walitti qabamuun keessan firdii Waaqayyoo akka isin irratti hin finneef, namni beela'e mana isaatti haa nyaatu! Waa'ee dhimma isa kan biraa immoo yommuun dhufu nan seerradha*.[61]