Read west central oromo 2 GARA WARRA QORONTOS 11 Bible Online

2 GARA WARRA QORONTOS 11 - west central oromo bible

2 GARA WARRA QORONTOS 11

¹Gowwummaa koo isa xinnaa akka anaaf dandeessan nan hawwa; eyyee, anaaf in dandeessu*.

²Ani akka durba amanamtutti Kristos abbaa manaa tokkichatti isin heerumsiifachuudhaaf, isin kaadhimachiisee waanan tureef, akkuma Waaqayyo hinaafu, anis isiniif nan hinaafa*.

³Akkuma bofni haxxummaadhaan Hewwaanin gowwoomsite, yaadni keessanis immoo karaa irraa kaatee, Kristos isa garaa qulqulluudhaan of kennitaniif sana irraa gara galtu jedhee sodaadheera*.

⁴Namni tokko dhufee, isa nuyi isinitti lallabne malee, Yesus isa kan biraa yoo isinitti lallabe yookiis isa kanaan dura fudhattan malee, hafuura kan biraa yoo fudhattan yookiis isa kanaan dura simattan malee, wangeela kan biraa yoo simattan, calluma jettanii in dandeessu jechuu dha*.

⁵Ani karaa tokko illee ergamoota warra hundumaa irra caalan kanaa gaditti waanan ilaalamu anatti hin fakkaatu*.

⁶Dubbii nama dhageessisuutti bartuu yoon ta'e iyyuu, beekumsatti bartuu miti; nuyis kun karaa adda addaatiin, waan hundumaattis isin biratti akka beekamu gooneerra*.[42]

⁷Ani wangeela Waaqayyoo gatii malee waanan isinitti lallabeef, akka isin ol ol qabamtaniifis gad of deebisuu kootiin cubbuun hojjedhee ree*?

⁸Gargaarsan isaan irraa argadhuun isiniif hojjechuudhaaf waldoota warra kaan saameera*.

⁹Isin bira utuun jiruu yeroon waa dhabettis, obboloota warra Maqedooniyaadhaa dhufantu wanta na barbaachisu na danda'e malee, ani nama tokkotti iyyuu ba'aa hin taane; akkuma ani kanaan dura eeggadhe, gara fuula duraattis ba'aa akkan isinitti hin taanef nan eeggadha*.

¹⁰Dhugaa Kristos isa na keessa jiruu ti! Of jajuun koo kun kutaa biyya Akaayyaatti na duraa hin cufamu*.

¹¹Waanan isin hin jaallanneefan akkas jedhaa? Waaqayyo beeka, isin nan jaalladha![43]

¹²Namoonni warri kaan of jajuudhaaf fucha argatanii, isaanii wajjin karaa tokkicha irra hojjenna akka nuun hin jenne gochuudhaaf, akkuma ani amma hojjechaa jirutti ittuma fufee nan hojjedha.

¹³Jarreen akkasii kun ergamoota sobaa ti, hojjetoota nama gowwoomsan, ergamoota warra Kristos waame fakkaachuudhaaf warra wallaalchifatanii dha*.

¹⁴Seexanni iyyuu ergamoota ifaa fakkaachuudhaaf waan wallaalchifatuuf, kun waan dinqisiisu miti*.

¹⁵Kanaaf hojjetoonni isaas hojjetoota qajeelinaa fakkaachuudhaaf yoo wallaalchifatan, kun waan guddaa miti; gara dhumaattis waan hojii isaaniitiif ta'u argachuuf jiru*.[44]

¹⁶Ani irran deebi'a, namni tokko gowwaa ana hin se'in! Yoo kana ta'uu dhabaate garuu, anis immoo xinnoo akkan of jajutti akka gowwaatti illee na fudhadhaa*!

¹⁷Waa'ee amanannaa of jajuu kanaaf, akka isa gooftaan dubbachuuf anaaf kennetti utuu hin ta'in, akka nama gowwaatti nan dubbadha*.

¹⁸Namoonni baay'een akka yaada fooniitti of jaju erga ta'ee, anis ofan jaja*.

¹⁹Isin iyyuu ofii keessanii ogeessota taatanii, warra gowwootaaf gammachuudhaan in dandeessuuf mitii*?

²⁰Namni garba yoo isin godhate, yoo isin irraa nyaate, fucha argatee harka isaa keessa yoo isin galfate yookiis asii gad yoo isin ilaale yookiis maddii keessa yoo isin kabale in dandeessuuf*.

²¹Nuyi garuu waan akkasii nama irratti gochuutti dadhaboo akka turre yeella'aa nan dubbadha.[45] Garuu waanuma namni tokko ittiin of jajuudhaaf ija jabaatu, anis isumaaf ija nan jabaadha; kanas akka gowwaattan dubbadha.

²²Warra Ibrootaa waan ta'aniifii? Anis akkasuma; warra Israa'el waan ta'aniifii? Anis akkasuma; sanyii Abrahaam waan ta'aniifii? Anis akkasuma*;

²³hojjetoota Kristos waan ta'aniifii? Isatti immoo ani nan caala. Kana akka nama qalbii dabarseetan dubbadha; ani baay'ee caalchisee itti dadhabee, baay'ee caalchisees itti hidhamee, rukuttaa lakkoobsa hin qabneen rukutameera, yeroo baay'ees ani afaan boollaa ga'ee deebi'eera*.

²⁴Ani si'a shan harka Yihudootaatti qacceedhaan afurtama tokko hir'uu reebameera*.

²⁵Si'a sadii uleedhaan dhaanameera; si'a tokko dhagaadhaan rukutameera; si'a sadii caccabaa markabaa irran ture; guyyaa tokkoo fi halkan tokkoof galaana keessan ture*.

²⁶Ani adeemsa har'aa borii keessatti bishaan guutuudhaan doorsifamaa, warra saamtuudhaan doorsifamaa, saba kootiin doorsifamaa, warra saba koo hin ta'iniin doorsifamaa, mandara keessatti doorsifamaa, lafa onaa keessatti doorsifamaa, galaana irratti doorsifamaa, obboloota sobaatiin doorsifamaa tureera*.

²⁷Hojiitti dadhabuu, rakkina, halkan baay'ees hirriba malee buluu, beela, dheebuu, yeroo baay'ee hagabuu taa'uu, qorra keessatti qullaa ta'uu baachaan ture*.

²⁸Kana malees, guyyaa guyyaatti waldoota kristiiyaanaatiif yaadda'uun anatti ulfaachaa jira*.

²⁹Namni tokko in dadhaba yoo ta'e, ani immoo isaa wajjin hin dadhabuu ree? Namni tokko cubbuutti yoo kuffifame, waa'ee isaatiif garaan koo ana hin gubatuu ree*?[46]

³⁰Of jajuun yoo anaaf ta'e immoo wanta dadhabbii koo argisiisuun of nan jaja*.

³¹Waaqayyoo fi abbaan gooftaa Yesus, galateeffamaan bara baraa, akkan soba hin dubbanne in beeka.

³²Mandara Damaasqootti inni mooticha Areexaas jalatti bulchaa biyyaa ta'e, ana qabsiisuudhaaf karra mandarichaa eegsisaa ture.

³³Ani garuu guuboodhaan, karaa qaawwa masaraa mandarichaa gad buufameetan qabaa isaa jalaa ba'e*.[47]