Read west central oromo Gara Warra Galaatiyaa 2 Bible Online

Gara Warra Galaatiyaa 2 - west central oromo bible

Gara Warra Galaatiyaa 2

¹Ergasii waggaa kudha afur booddee, Baarnaabaasii wajjin, Tiitoosin of duukaa fudhadheetan deebi'ee Yerusaalemitti ol ba'e*.

²Akkan achitti ol ba'uuf Waaqayyo mul'ata waan anatti argisiiseef nan dhaqe; warra achi jiranitti waa'ee wangeela, isa ani warra saba Waaqayyoo hin ta'initti lallabuu, ibseen itti hime; dadhabbiin koo inni darbe, inni ammaas kan waa'ee hin baafne akka hin taanetti, warra geggeessituuttis qoofniitti himeera.

³Miiltoon koo Tiitoos iyyuu utuma nama Griikii ta'ee jiruu, akka dhagna qabatuuf hin giddisiifamne*.

⁴Obboloonni sobduuwwan warri karaa malee dhufan illee kana barbaadanii turan; isaan kun birmadummaa nuyi karaa Kristos Yesus qabnu gaadanii, gara garbummaatti nu deebisuudhaaf dhoksaatti nu gidduu lixan*.

⁵Garuu dhugaan wangeelaa akka hin tuqamnetti isiniif eeguudhaaf, nuyi battala tokko illee isaan kanaaf abboomamuudhaaf of hin laanne.[6]

⁶Warri geggeessituun kun waan fedhan yoo ta'an iyyuu, Waaqayyo waan hin loogneef, anaaf garaagarummaa hin godhanne; warri geggeessituun kun isa kan kootiitti homaa hin daballe*.

⁷Qooda kanaa akkuma wangeela warra seera dhagna-qabaa eegan biraan ga'uun, Phexrositti hadaraa kenname, wangeela warra seera dhagna-qabaa hin eegne biraan ga'uun, anatti hadaraa akka kenname argan*.

⁸Isuma ergaa warra seera dhagna-qabaa eegan biraan ga'uudhaaf Phexros keessaan hojjetetu, warra saba Waaqayyoo hin ta'in biraan ga'uudhaaf immoo ana keessaan hojjete.

⁹Akkasumas Yaaqoob, Phexrosii fi Yohannis, warri geggeessituu ta'anii akka utubootaatti ilaalaman, ayyaana anaaf kenname hubatanii hidhata ta'uu keenya argisiisuudhaaf harka wal qabanneerra; Baarnaabaasii fi ani gara warra saba Waaqayyoo hin ta'inii akka dhaqnu, isaanis gara warra seera dhagna-qabaa eeganii akka dhaqan waliif galleerra.

¹⁰Isaan waa'ee hiyyeessota gargaaruu duwwaa akka yaadannu nutti dubbatan, anis immoo wanti ani gochuuf dhimmu isuma kana*.[7]

¹¹Yeroo Phexros gara Anxokiyaa dhufe garuu, hojiin isaa kan itti farachiisu waan ta'eef, ijatti ittiin nan morme.

¹²Jarri tokko Yaaqoob biraa utuu hin dhufin dura, inni saba Yihudoota hin ta'in keessaa warra amananii wajjin nyaachaa ture. Erga jarri kun dhufanii garuu, warra seera dhagna-qabaa eegan waan sodaateef, deebi'ee warra wajjin nyaachaa ture sanattii gargar ba'e*.

¹³Yihudoonni warri kaanis Yihudoota warra hin ta'inii wajjin nyaachuun balleessaa akka ta'e fakkeessanii isaa wajjin ka'an; Baarnaabaas iyyuu fakkeessaa isaanii kanaan harkifamee ture.

¹⁴Garuu dhugaa wangeelaa duukaa daandii qajeelaa irra akka isaan hin adeemne yommuun arge, hunduma isaanii duratti Phexrosiin, ?Ati Yihudii taatee, akka Yihudiitti utuu hin ta'in akka nama Yihudii hin ta'iniitti erga jiraattee, attamitti warra Yihudoota hin ta'in akka Yihudootaatti jiraachuudhaaf giddisiifta ree?? nan jedhe.[8]

¹⁵Nuyi dhalootaan Yihudoota malee, warra Yihudoota hin ta'in warra cubbamoota miti*.

¹⁶Utuma ta'uu iyyuu namni tokko illee Yesus Kristositti amanuudhaan malee, wanta seerri isa irraa barbaadu gochuudhaan Waaqayyo duratti qajeelaa ta'ee akka hin lakkaa'amne in beekna. Nuyis wanta seerri nama irraa barbaadu hojjechuudhaan utuu hin ta'in, Kristositti amanuudhaan qajeelota taanee akka lakkaa'amnuuf, Kristos Yesusitti amanneerra; wanta seerri nama irraa barbaadu gochuudhaan namni tokko illee qajeelaa ta'ee hin lakkaa'amu*.

¹⁷Egaa nuyi karaa Kristos qajeelota taanee lakkaa'amuudhaaf yaalaa utuu jirruu, ofii keenyaa iyyuu cubbamoota taanee yoo argamne Kristos hojjetaa cubbuu ti jechuu dhaa ree? Raawwatee akkas hin ta'u!

¹⁸Garuu waanan diige deebisee yoon dhaabe, ani ofii kootii seera irra daddarbaa ta'uu koo argisiisuu koo ti.

¹⁹Ani Waaqayyoof jiraachuudhaafan karaa seeraa, seera jalaa du'e; ani Kristosii wajjin fannifameera*.

²⁰Egaa si'achi Kristos isa ana keessaatu jiraata malee, anatu jiraata miti; jireenya ani amma fooniin jiraadhu immoo, ilma Waaqayyoo isa na jaallate, ofii isaas dabarsee isa anaaf kennetti amanuudhaan nan jiraadha*.

²¹Ani ayyaana Waaqayyoo gatii hin dhabsiisu; namni qajeelaa ta'ee lakkaa'amuun seeraan utuu ta'ee, yoos Kristos akkasumaan du'e kaa![9]