Read west central oromo 1 GARA WARRA TASALONIIQEE 3 Bible Online

1 GARA WARRA TASALONIIQEE 3 - west central oromo bible

1 GARA WARRA TASALONIIQEE 3

¹Egaa kana caalaa obsuu yeroo dadhabnetti, nuyi kophaa keenya mandara Ateenaatti hafuudhaaf murtoo godhanne*.

²Amantiitti akka isin jabeessuuf, cimsees akka isin gorsuuf, nuyi obboleessa keenya wangeela Kristosiif ergamuuttis hojjetaa Waaqayyoo isa ta'e, Ximotewosin gara keessanitti ergine*.

³Namni tokko illee sababii rakkina kana hundumaaf hin raafamin! Isaan kanatti galuun akka nu irra jiru isin ofii keessanii in beektu*.

⁴Nuyi utuu isin bira jirruu rakkinni nu irra ga'uuf akka jiru duraan dursinee isinitti himneerra; akkasuma akka ta'es isin iyyuu in beektu*.

⁵Sababii kanaaf kana caalaa obsuu waanan dadhabeef inni nama qoru isin qoreera yoo ta'e, wanti nuyi itti dadhabaa turre kan waa'ee hin baafne akka hin taanetti amantii keessan beekuufan isa gara keessanitti erge*.[7]

⁶Amma garuu Ximotewos isin biraa gara keenya dhufee, waa'ee amantii keessanii fi waa'ee jaalala keessanii oduu gaarii nuuf fide; akkasumas isin yeroo hundumaa gara-laafinaan akka nu yaadattan, akkuma nuyi isin arguu yaadnus nu arguu akka yaaddan nutti hime*.

⁷Kanaaf yaa obboloota nana, gidiraa keenya hundumaa fi rakkina keenya keessatti waa'ee keessanii fi amantii keessaniin jajjabina arganneerra*.

⁸Amma isin gooftaatti jabaattanii yoo dhaabattan, nuyi iyyuu jireenya keenyaaf in jajjabaanna.

⁹Nuyi fuula Waaqayyo keenyaa durattis gammachuu waa'ee keessaniif nutti dhaga'ame hundumaaf galata attamii Waaqayyoof dhi'eessuu dandeenya ree*?

¹⁰Nuyi fuula fuulaan isin arguudhaa fi, amantii keessan keessaas waan hir'ate isiniif dabaluudhaaf halkanii fi guyyaa dhimminee in kadhanna*.[8]

¹¹Ammas Waaqayyo abbaan keenya gooftaan keenya Yesusis gara keessan dhufuudhaaf karaa keenya nuuf haa qajeelchu!

¹²Gooftichi jaalala isin walii fi namoota hundumaafis qabdan dabalee, akka isa nuyi ittiin isin jaallannutti hamma malee haa baay'isu*!

¹³Guyyaa gooftaan keenya Yesus qulqulloota isaa wajjin deebi'ee dhufutti, garaa keessan cimsee warra hin komatamne godhee qulqullummaadhaan fuula Waaqayyoo abbaa keenyaa dura isin haa dhaabu*![9]