Read west central oromo Macaafa Iyaasuu 1 Bible Online

Macaafa Iyaasuu 1 - west central oromo bible

Macaafa Iyaasuu 1

¹Museen garbichi Waaqayyoo erga du'ee booddee, Waaqayyo kunoo, Iyaasuu ilma Nun gargaartuu Museetti in dubbate.

²Inni, ?Museen garbichi koo du'eera; egaa amma atii fi sabni kun hundinuu ka'aatii laga Yordaanos kana ce'aatii gara biyya isa ani saba Israa'eliif kennu sanaa dhaqaa*!

³Ani akkuman Musee abdachiisetti lafa faanni miilla keessanii irra ejjetu hundumaa isiniif nan kenna*.

⁴Daariin keessan lafa onaa kanaa ka'ee Liibaanoniin ba'ee hamma laga guddichaa laga Efraaxiisitti, gara lixa-biiftuutiin immoo biyya Heetotaa hundumaa qabatee hamma galaana guddichaatti in adeema.

⁵Bara jireenya kee hundumaatti namni si dura dhaabachuu danda'u hin jiru; Musee wajjin akkuman ture sii wajjinis nan ta'a; ani si hin dhiisu, si hin irraanfadhus*!

⁶Biyya ani isaaniif kennuuf abboota isaaniif kakadhe akka isaan dhaalan waan gootuuf cimi, ija jabaadhu*!

⁷Cimi, ija jabaadhus! Seera Museen garbichi koo si abboome hundumaa eeguudhaaf of eeggadhu! Iddoo dhaqxu hundumaatti wanti ati gootu akka wal siif qixxaatutti isa irraa gara mirgaatti yookiis gara bitaatti hin jal'atin*!

⁸Macaafni seeraa kun afaan kee keessaa hin dhabamin! Halkanii fi guyyaas waa'ee isaa yaadi! Karaan kee akka siif qajeelutti, wanti ati gootus akka wal siif qixxaatutti, wanta isa keessatti caafame hundumaa gaarii godhii eegi*!

⁹Ani Waaqayyo gooftaan kee, ?Iddoo ati dhaqxu hundumaatti sii wajjinan jiraatii ati cimi, ija jabaadhu, hin sodaatin, hin na'inis!? jedhee si hin abboomnee ree?? jedhe.[1]

¹⁰Iyaasuunis kana irratti geggeessitoota sabaatti in dubbate;

¹¹inni, ?Iddoo buufataa keessa adeemaatii namootaan, ?Guyyaa sadii gidduutti biyya Waaqayyo gooftaan keessan akka isin qabattaniif isiniif kennu sana dhaquudhaaf laga Yordaanos kana in ceetuutii ka'aatii galaa qopheeffadhaa!? jedhaa!? jedhee isaan in abboome.

¹²Iyaasuun yommus gosa Ruubenii fi gosa Gaadiin, Minaasee isa walakkaa gosaatiinis,

¹³?Dubbii Museen garbichi Waaqayyoo isin abboome yaadadhaa! Waaqayyo gooftaan keessan boqonnaa isiniif in kenna, lafa kanas isiniif in kenna.

¹⁴Dubartoonni keessanii fi ijoolleen keessan, horiin keessanis biyya isa Museen Yordaanos gara ba'a-biiftuutii isiniif kenne keessa haa taa'an! Isin warri loltoonni mi'a lolaa hidhattan hundinuu immoo obboloota keessan dura bu'aa ce'aatii isaan gargaaraa!

¹⁵Waaqayyo gooftaan keessan akkuma boqonnaa isaaniif kenne, obboloota keessaniifis boqonnaa yommuu kennu, isaanis immoo lafa Waaqayyo gooftaan keessan isaaniif kennu fudhatanii dhuunfaa isaanii hamma godhatanitti isaan in gargaartu; kana booddee immoo biyya dhaala keessanii isa Museen garbichi Waaqayyoo Yordaanos boroodhaa gara ba'a-biiftuutiin isiniif kennetti deebi'aatii taa'aa!? jedhe*.[2]

¹⁶Isaan yommus deebisanii Iyaasuudhaan, ?Wanta ati nu abboomte hundumaa in goona, iddoo ati itti nu ergite hundumaas in dhaqna;

¹⁷Waaqayyo gooftaan kee Musee wajjin akkuma ture sii wajjinis immoo haa ta'u duwwaa malee, akkuma Museedhaaf wanta hundumaatti abboomamne, siifis in abboomamna;

¹⁸namni abboommii keetiin mormu, namni dubbii kees hin dhageenye hundinuu haa ajjeefamu! Ati garuu cimi, ija jabaadhu!? jedhan.