Read west central oromo Macaafa Iyaasuu 13 Bible Online

Macaafa Iyaasuu 13 - west central oromo bible

Macaafa Iyaasuu 13

¹Yeroo Iyaasuun dulloomee lafa guuretti Waaqayyo isatti in dubbate; inni, ?Ati amma dulloomtee lafa guurteetta, garuu biyyi hin qabamin jiru immoo amma iyyuu baay'ee dha.

²?Biyyi hin qabamin jiru isa kanatti fufe jiruu dha; biyya Filisxeemotaa fi biyya Geshuurotaa*,

³laga Shiihor isa Gibxiitii gara ba'a-biiftuu jiru ka'ee hamma biyya Eqroon isa gara bitaatti kan jiran hundinuu biyya Kana'aanitti lakkaa'amu; biyyi mootota Filisxeemotaa shanan, Gaazaan, Ashdood, Ashqalon, Gaat, Eqroonii fi Aawonni isaanuma kana duukaa jiru.

⁴Karaa gara mirgaa immoo biyya Kana'aanotaa hundumaa fi Araa isa kan Sidoonotaa isa hamma Afeqitti, hamma biyya Amoorotaattis adeemuu dha;

⁵akkasumas biyya Geblootaa, biyya Liibaanon isa gara ba'a-biiftuu jiru hundumaas, Ba'aal-Gaadi isa tulluu Hermoon gad-jallaatii jalqabee hamma itti lixa Haamaatitti;

⁶warra biyya gaaraa keessa jiraatan, Liibaanonii jalqabee hamma Misrefot-Maayimitti, warra Sidoon hundumaa ani ofuma kootii Israa'eloota duraa nan ari'a; ati immoo akkuma ani si abboome biyyicha namoota Israa'eliif dhaala godhii hiri!

⁷Ammas biyya kana gosa salganii fi gosa Minaasee keessaa immoo walakkaadhaaf dhaala akka ta'uuf hiriif!? jedhe.[42]

⁸Museen garbichi Waaqayyoo kanaan dura walakkaa gosa Minaasee warra kaanii fi Ruubenii fi Gaadiif biyya dhaala isaanii Yordaanos irraa gara ba'a-biiftuutiin kenneefii ture*.

⁹Inni Aro'er isa qarqara laga Aarnon jiruu jalqabee, mandara isa walakkaa dachaa sana keessa jiru, lafa diriiraa isa kan Medebaatii hamma Diibonitti,

¹⁰mandaroota Sihoon mootii Amoorotaa isa Heshboonitti mo'aa ture hundumaa, hamma daarii warra Amoonotaatti,

¹¹Giil'aadii hamma daarii biyya Geshuurotaatti, hamma-Ma'aakaatotaatti, tulluu Hermoon hundumaa, Baashaanii hamma Salekaahitti,

¹²biyya mootummaa Oog mootii Baashaan isa haftee warra Refaa'ota warra Museen balleessee biyya irraa fudhate isa Ashtaarotii fi Edraayitti mo'aa ture sanaatti isaaniif kennee ture.

¹³Israa'eloonni warra Geshuurotaa fi warra Ma'akaatotaa biyya keessaa hin baafne; kanaaf warri Geshuurotaa fi warri Ma'akaatotaa hamma har'aatti Israa'eloota gidduu jiraachaa turan.[43]

¹⁴Aarsaan inni Waaqayyo isa kan Israa'eliif ibiddaan gubamu dhaala sanyii Lewwii waan ta'eef, akkuma Waaqayyo kanaan dura itti dubbatee ture inni sanyii Lewwiitiif dhaala hin kennine*.[44]

¹⁵Museen gosa Ruubeniif akka maatii maatii isaaniitti ga'aa isaanii in kenneef*.

¹⁶Daariin biyya isaaniis Aro'er isa dachaa Aarnonii fi mandara isa dachaa walakkaa, akkasumas guutummaa Medebaa isa lafa diriiraa sanaa ture;

¹⁷itti fufees Heshboonii fi mandaroota isaa warra lafa diriiraa irra jiran hundumaa, Diibon, Baamot-Ba'aal, Bet-Ba'aal-Me'on,

¹⁸Yaahaz, Qedemoot Mefat,

¹⁹Kiriiyat-Aayim, Simbaa, Zeraat-Shehaar isa tulluu dachaa keessa jiru irraa,

²⁰Bet-Phe'or, irraan-gadee Phiisgaa, Bet-Yeshiimoot,

²¹mandaroota biyya diriiraa irra jiran hundumaa, biyya mootummaa Sihoon mootii Amoorotaa isa Heshboonitti mo'e, warra Museen warra Miidiyaanii fi warra biyya sana jiran Ewii, Reqem, Zuur, Huur, Rebaa warra Sihoonii wajjin turan sanas rukutee dha*;

²²kana malees, Israa'eloonni Bala'aam ilma Phe'or isa ayyaana-hedu sana warra kaanii wajjin billaadhaan rukutanii in balleessan*.

²³Daariin ijoollee Ruuben hamma qarqara Yordaanositti adeema; mandaroonnii fi gandeen kun sanyii Ruubeniif akka maatii maatii isaaniitti dhaala akka ta'aniif in kennaman.[45]

²⁴Biyyi Museen gosa Gaadiif akka maatii maatii isaaniitti kenne warra kanatti fufanii jiranii dha*;

²⁵biyya Yaazer, mandaroota Giil'aad hundumaa, walakkaa biyya Amoonotaa hamma Aro'er isa fuullee Raabaatti,

²⁶Heshboonii hamma Raamaat-Miisphaatti, hamma Betoniimitti, Mahanaayimii hamma daarii Debiiritti;

²⁷dachaa keessaas Bet-Haraam, Bet-Niimraa, Suukootii fi Zaafon biyya mootummaa Sihoon mootii Heshboon isa hafe, Yordaanosittii gara ba'a-biiftuu biyya daarii galaana Kiineret turanii dha.

²⁸Mandaroonni kunii fi gandeen isaanii sanyii Gaadiif akka maatii maatii isaaniitti dhaala akka ta'aniif in kennaman.[46]

²⁹Museen walakkaa gosa Minaaseetiif akka maatii maatii isaaniitti kan kenne immoo kanatti fufee jira;

³⁰biyya daarii Mahanaayim, guutummaa Baashaan, biyya mootummaa Oog mootii Baashaan, mandaroota jaatama warra Yaa'iir biyya Baashaan keessa jiran,

³¹walakkaan Giil'aad, Ashtaarotii fi Edraayi mandaroota Oog mootii Baashaan; isaan kun kan Maakiir ilma Minaasee ta'anii, walakkaa ilmaan Maakiiriif akka maatii maatii isaaniitti in kennaman.

³²Biyyi Museen, Yordaanos gama dirree Mo'aabitti fuullee Yerikoo karaa gara ba'a-biiftuutiin dhaala godhee hire isaan kana.

³³Waaqayyo gooftaan inni kan Israa'el akkuma isaanitti dubbatee ture, ofii isaatii dhaala waan isaaniif ta'eef, Museen sanyii Lewwiitiif immoo dhaala hin kennine*.[47]