Read west central oromo Macaafa Iyaasuu 14 Bible Online

Macaafa Iyaasuu 14 - west central oromo bible

Macaafa Iyaasuu 14

¹Biyyi inni Ele'azaar lubichi, Iyaasuun ilmi Nunii fi warri dura-buutuun gosoota Israa'elootaa, biyya Kana'aan keessaa Israa'elootaaf dhaala godhanii hiran kanatti fufee jira*;

²dhaala sanas akka Waaqayyo Musee abboometti, gosoota sagalii fi walakkaa gosaaf muka buusanii in hiran*.

³Museen gosa lamaanii fi isa walakkaadhaafis Yordaanos gamaan karaa ba'a-biiftuu dhaala kenneefii ture; garuu sanyii Lewwiitiif warra sana gidduudhaa dhaala hin kennineef*.

⁴Ilmaan Yoseef, Minaasee fi Efreem gosa lama ta'an; sanyiin Lewwii garuu mandaroota keessa jiraatanii fi iddoo horii isaanii dheechifatan duwwaa qabeenya isaanii godhatan malee, biyyasii dhaala hin arganne.

⁵Israa'eloonni akkuma Waaqayyo Musee abboometti laficha in hiran.[48]

⁶Ergasii gosa Yihudaa keessaa namoonni Giilgalitti Iyaasuu bira in dhufan; isaan keessaa Kaaleb ilmi Yofunee inni Qenazichi Iyaasuutti in dubbate; inni, ?Dubbii Waaqayyo Qaadesh-Barne'aatti waa'ee kootii fi waa'ee kee Musee nama Waaqayyootti dubbate ati in beekta*.

⁷Yeroo Museen garbichi Waaqayyoo, Qaadesh-Barne'aadhaa dhaqee akka ani biyyicha gaaduuf na erge, ani nama waggaa afurtamaan ture; ani deebi'een wantan yaadatti qabadhe isatti hime.

⁸Obboloonni koo warri anaa wajjin achi dhaqan illee garaa namootaa in sodaachisan; ani garuu raawwadheen Waaqayyo gooftaa koo duukaa bu'e.

⁹Museen yeroo sana kakatee, ?Ati guutummaatti Waaqayyo gooftaa koo duukaa waan buuteef, biyyi ati miilla keetiin irra ejjettu siif, ijoollee keetiifis bara baraan dhaala in ta'a? jedheera*.

¹⁰Amma kunoo Waaqayyo akkuma waggaa afurtamii shan dura namoonni Israa'el lafa onaa keessa adeemaa utuu jiranii Museetti dubbatee ture, jireenyatti na eegeera; kunoo ani har'a nama waggaa saddeettamii shanii ta'eera.

¹¹Ani amma iyyuu akkuma gaafa Museen na erge sanaa cimaa dha, ciminatti, lolatti, gad ba'ee ol galuuttis akkuman dur ture sana.

¹²Egaa biyya gaaraa isa Waaqayyo na abdachiise sana anaaf kenni! Warri Aanaaqotaa achi akka jiran mandaroonni isaaniis dallaa cimaa akka qaban ati iyyuu gaafas dhageesseetta; garuu Waaqayyo yoo ana gargaare ani akkuma inni jedhe achii isaan nan baasa? jedhe*.[49]

¹³Ergasii Iyaasuun, Kaaleb ilma Yofunee eebbisee Kebroonin dhaala godhee in kenneef*.

¹⁴Kaaleb ilmi Yofunee inni Qenazichi guutummaatti Waaqayyo gooftaa isa kan Israa'el duukaa waan bu'eef, Kebroon hamma har'aatti iyyuu kan isaa ta'ee hafe*.

¹⁵Maqaan Kebroon dur ?Kiriiyat-Arbaa? jedhama ture; ?Arbaa? kan jedhamu kun immoo namoota warra Aanaaqota keessaa nama guddaa ture. Kana booddee biyyichi lolattii in boqote*.[50]