Read west central oromo Macaafa Iyaasuu 2 Bible Online

Macaafa Iyaasuu 2 - west central oromo bible

Macaafa Iyaasuu 2

¹Iyaasuun ilmi Nun ergasii Shiixiimii gaaddota lama dhoksaatti ergee, ?Dhaqaatii biyyicha, caalaatti immoo mandara Yerikoo ilaalaa!? jedheen; isaanis in dhaqan; yommuu achi ga'an mana dubartii ejjituu ?Rahaab? jedhamtu tokkoo dhaqanii achi in buufatan*.

²Mootii Yerikoottis, ?Kunoo, namoonni Israa'el biyyicha gaaduudhaaf halkan kana dhufaniiru? jedhanii himan.

³Kana irratti mootiin Yerikoo Rahaabitti ergee, ?Namoonni gara kee dhufanii mana kee jiran kun guutummaa biyyichaa gaaduudhaaf waan dhufaniif gad isaan baasi!? jedhe.

⁴Dubartiin sun garuu namoota sana lamaan dhoksitee, ?Eyyee dhuguma, jarreen tokko gara koo dhufaniiru, garuu eessaa akka isaan dhufan ani hin beeku.

⁵Isaan yeroo dimimmisee balballi kellaa mandaraa cufamutti ba'an; ani lafa isaan dhaqan hin beeku; dafaa isaan hordofaa in qaqqabdu? jette.

⁶Jara immoo bantii manaatti ol baaftee muka talbaa bantii manaa irra afamee ture jala dhoksite.

⁷Jarri ergaman sun hamma malkaa ce'umsa Yordaanositti duukaa bu'uudhaaf erga ba'anii booddee karri kellichaa in cufame.[3]

⁸Warri gaadduun sun utuu hin ciisin isheen bantii manaa irratti isaan bira dhaqxee,

⁹isaaniin, ?Waaqayyo biyya kana akka isiniif kenne ani beeka, nuyi isin in sodaanne, warri biyya kanaa hundinuu na'anii isin duraa akkuma gagaa baqaniiru*.

¹⁰Yommuu isin biyya Gibxii baatan, akka Waaqayyo galaana diimaa fuula keessan duraa gogse, waan isin Sihoonii fi Oog mootii Amoorotaa warra Yordaanos irraa gara ba'a-biiftuu turan lamaan gootan, isin raawwattanii akka isaan balleessitanis nu'oo dhageenyeerra*.

¹¹Nuyi yommuu waa'ee kanaa dhageenye, isin sodaannee onneen keenya akkuma gagaa in baqe; Waaqayyo gooftaan keessan ol waaqa irratti, gad lafa irrattis Waaqayyo waan ta'eef, namni na'ee abdii hin kutatin hin turre*.

¹²Egaa akkuman gaarii isiniif godhe, isinis mana abbaa koof gaarii akka gootan maqaa Waaqayyootiin anaaf kakadhaa, milikkita amansiisus anaaf kennaa*!

¹³Abbaa koo, haadha koo, obboloota koo, obboleettota koo waan isaan qaban hundumaas oolchaa, du'a jalaas baasaa!? jette.[4]

¹⁴Jarris deebisanii isheedhaan, ?Wanta nuyi amma hojjechaa jirru kana hin himtan yoo ta'e, Waaqayyo biyyicha yommuu nuuf kennu, nu immoo gaarummaa fi amanamummaa yoo isin argisiisuu dhabaane, iddoo keessan nu haa ajjeesu!? jedhan.

¹⁵Manni dubartittiin keessa jiraatu gar tokkoon kellaa mandarichaa wajjin walitti waan ijaarameef, karaa qaawwa kellichaa funyoodhaan gad isaan buufte*;

¹⁶jaraanis, ?Warri isin hordofan akka isin hin arginetti, gara tulluu dhaqaatii hamma isaan deebi'anitti guyyaa sadii achi dhokadhaa, isa booddees karaa keessan irra bu'aa!? jette.[5]

¹⁷Jarri immoo, ?Kakaa amma nu kaksiifatte kanaaf ati akka nu hin komannetti,

¹⁸yommuu nuyi biyya kanatti linnu qaawwa isa amma keessaan gad nu buufte kanatti fo'aa bildiimaa kana hiitee, abbaa kee fi haadha kee, obboloota kee fi maatii abbaa keetii hundumaa mana keetti sassaabuun si irra jira.

¹⁹Namni mana keetii ala ba'ee karaa irratti yoo argame, gumaan isaa matuma isaa irra in ta'a; nuyi itti hin gaafatamnu; nama sii wajjin mana keessa jiru irratti namni harka isaa yoo ol fudhate garuu, nuyi itti in gaafatamna.

²⁰Wanta nuyi hojjennu kana yoo himte garuu, kakaan ati nu kaksiifte kun nu irra hin ga'u? jedhan.

²¹Isheenis deebiftee, ?Akkuma isin jettan haa ta'u!? jettee, isaan gad dhiifte; isaanis ka'anii in sokkan; isheen immoo fo'aa bildiimaa sana qaawwichatti in hiite.

²²Hamma warri isaan hordofuudhaaf ka'an karaa irra isaan barbaadanii dhabanii deebi'anitti, isaan gara tulluu dhaqanii guyyaa sadii achi taa'an.

²³Kana booddee namoonni sun lamaanis deebi'anii tulluu irraa gad bu'anii, laga ce'anii Iyaasuu ilma Nun bira dhufanii wanta isaan irra ga'e hundumaa itti himan.

²⁴Isaan, ?Waaqayyo dhugumaan guutummaa biyyichaa harka keenya keessa buuseera, warri biyyasii hundinuu sababii nu sodaataniif nu duraa akkuma gagaa baqaniiru? jedhanii Iyaasuutti himan.