Read west central oromo 1 GARA THIMOTEWOS 2 Bible Online

1 GARA THIMOTEWOS 2 - west central oromo bible

1 GARA THIMOTEWOS 2

¹Ammas waan hundumaa dura himannaan, kadhannaan, warra kaaniif dubbachuun, galata dhi'eessuunis Waaqayyo duratti nama hundumaaf akka godhamuuf nan gorsa*.

²Nagaatti gabiitti akka namoota Waaqayyootti jireenya ulfina qabu jiraachuu akka dandeenyuuf, moototaaf, biyya bulchuu keessatti warra aboo qaban hundumaafis akkasuma godhaa!

³Kun gaarii dha, fuula Waaqayyoo fayyisaa keenyaa durattis fudhatamaa dha.

⁴Waaqayyo, namni hundinuu akka fayyu, dhugaa beekuu biras akka ga'u in fedha*.

⁵Waaqayyo tokkicha, inni gidduu dhaabatee Waaqayyoo fi nama walitti fidus tokkicha; inni immoo Kristos Yesus isa nama ta'ee mul'atee dha*.

⁶Inni furii namoota hundumaatiif ofii isaa dabarsee kenne; kunis yeroo isaatti dhugaa baafame*.

⁷Isa kanaafis ani lallabaa, ergamaas ta'een jira; kanas ani dhugaan dubbadha malee hin sobu; amantiidhaan dhugaadhaan geggeeffamees warra saba Waaqayyoo hin ta'in nan barsiisa*.[6]

⁸Lafa kadhata godhatanitti immoo warri dhiiraa yaada dheekkamsaa fi qoccollootiin utuu hin ta'in, yaada qullaa'aadhaan harka isaanii ol kaasanii akka kadhatan nan barbaada*.

⁹Warri dubartii immoo amalli isaan argisiisan mataa tolfachuutti warqeedhaa fi callee naqachuutti, uffata gati-jabeessa uffachuutti, keessa ba'uudhaan of kuuluu utuu hin ta'in, uffata qajeelaa fakkaatu akka ta'utti uffachuudhaan maal naan jedhudhaan, of qabuudhaanis haa ta'u*!

¹⁰Dubartoota Waaqayyoof in saganna jedhaniif akka ta'uttis, wanta gaarii haa argisiisan*.

¹¹Dubartiin abboomamuu hundumaan gab jettee haa bartu*.

¹²Dubartiin gabiitti haa jiraattu nan jedha malee, haa barsiiftu, dhiira irrattis aboo haa qabaattu hin jedhu*;

¹³Addaam duraan dursee tolfame, Hewwaan immoo ergasii tolfamte*.

¹⁴Addaam hin sossobamne, dubartittiin garuu sossobamtee, seera-cabsituu taate*.

¹⁵Haa ta'u iyyuu malee, dubartittiin mucaa da'uudhaan in fayyiti; warri kaanis amantiitti, jaalalatti, qullaa'ummaattis of qabuudhaan yoo jiraatan in fayyu*.[7]