Read west central oromo GARA TIITOOS 2 Bible Online

GARA TIITOOS 2 - west central oromo bible

GARA TIITOOS 2

¹Ati garuu wanta barsiisa sirrii sanaa wajjin wal fudhatu dudubbadhu*!

²Maanguddoonni warri dhiirri warra dhugaatiitti of hin ganne, warra ulfina nama irraa qaban, warra of qaban, amantiidhaa fi jaalalatti obsattis warra seelkoo hin qabne haa ta'an*!

³Akkasuma immoo dubartoonni dullooman amala warra akka qulqullootaatti fudhatamanii haa argisiisan! Wanta gaarii ta'e haa barsiisan malee, maqaa namaa balleessuun, dhugaatiidhaaf garboota ta'uun isaan irra hin jiru*.

⁴Akkasitti abbaa manaa, ijoollees akka jaallataniif, dubartoota warra gara ijoollee in gorsu.

⁵Dubbiin Waaqayyoo maqaa gadhee akka hin godhannetti, warra of qaban, warra gaa'ela isaaniitti amanaman, warra mana isaaniitiif ba'eessa godhanii eeggatan, warra abbaa manaa isaaniif abboomaman akka ta'an haa gorsan*![7]

⁶Akkasuma immoo dhiironni warri gara ijoollee akka of qaban gorsi!

⁷Waan hundumaa keessatti hojii gaarii hojjechuudhaaf fakkeenya ta'i! Barsiisa kee keessatti dubbii akka waliin hin makne, salphaatti akka hin fudhannes argisiisi*!

⁸Warri garasii nutti gara galan, waan gadhee ittiin nu irratti dubbatan akka hin arganne, dubbii sirrii sanaanis waan ittiin jedhan akka hin qabaanne godhi*![8]

⁹Warri garbummaa jala jiraatan waan hundumaatti ajaja warra isaan bulchanii haa fudhatan! Itti haa tolan, dubbii isaaniitiinis hin mormin*!

¹⁰Barsiisichi waa'ee Waaqayyo fayyisaa keenyaa dubbatu kun, waan hundumaatti akka namatti tolee mul'atu gochuudhaaf, isaan guutummaatti amanamummaa gaarii haa argisiisan malee, warra waa miliqsan hin ta'in![9]

¹¹Waaqayyo ayyaana isaa isa nama hundumaaf fayyina kennu mul'iseera*.

¹²Ayyaanni Waaqayyoo kunis, nuyi Waaqayyo malee jiraachuu, kajeellaa biyya lafaa isa hamaas gannee, bara kana keessa of qabuutti, qajeelinatti, namoota Waaqayyoo taanee akka jiraannuuf gorsee, gara gaariitti nu deebisa*.

¹³Achumaanis abdii keenya isa eebbifamaa fi ulfina isa deebi'ee mul'atu sanaa in eegganna. Inni mul'achuuf jiru sunis Yesus Kristos; inni Waaqayyo keenya isa guddicha, fayyisaa keenyas*.

¹⁴Inni seera irra-daddarbuu hundumaa jalaa nu furuudhaaf, saba fo'amaa warra hojii gaariitiif hinaafan ofii isaatiif qulleessuudhaaf, ofii isaa nuuf kenne*.[10]

¹⁵Yeroo gorsa kennitu, yeroo balleessaa namatti mul'iftus yaada muramaadhaan kana dubbadhu; namni tokko illee si hin tuffatin*![11]