Read west central oromo GARA TIITOOS 3 Bible Online

GARA TIITOOS 3 - west central oromo bible

GARA TIITOOS 3

¹Harka warra biyya bulchanii fi warra aboo qabanii jala of galchuu, abboomamuu fi hojii gaarii hojjechuufis qophaa'oo ta'uu isaan yaadachiisi*!

²Isaan maqaa nama tokko illee utuu hin balleessin, naga-qaboota, garraamota ta'anii, nama hundumaatti karaa hundumaa gara-laafina haa argisiisan*![12]

³Nuyis takka wallaalota, warra hin abboomamne, warra karaa irraa goran, garba kajeellaa fi hawwa garaa garaa isa foon gammachiisu, warra guyyoota keenya hamminaa fi hinaaffaadhaan dabarsine, namoota biratti jibbamne, walii keenyas jibbaa turree dha*.

⁴Garuu gaarummaanii fi jaalalli Waaqayyo fayyisaan keenya ittiin nama jaallate yeroo isaatti in mul'ate*.

⁵Waaqayyo hojii nuyi qajeelummaadhaan hojjenneef utuu hin ta'in, akka araara isaatiitti dhiqannaa lammaffaa dhalachuutiin, haaressuu hafuura qulqulluutiinis nu fayyise*.

⁶Hafuurichis isa inni karaa Yesus Kristos fayyisaa keenyaa arjummaadhaan nu irratti dhangalaasee dha*.

⁷Waaqayyo, ayyaana Kristosiin qajeelotatti lakkaa'amnee, abdiidhaan jireenya bara baraa akka argannuuf kana nuuf godhe*.

⁸Dubbiin kun amanamaa dha; warri Waaqayyotti amanan hojii gaariitti qabamuudhaaf akka dhimmaniif, dubbii kana cimsitee akka qabdu nan barbaada; dubbiin kun namaaf ba'eessa, dhimmas in baasaaf*.[13]

⁹Waliin morkiin gowwootaa, hidda dhalootaa lakkaa'uun, wal loluun, waa'ee seeraa irratti wal qoccoluun garuu, waa'ee hin baasu, gatiis hin qabu; kanaafis irraa fagaadhu*!

¹⁰Nama barsiisichaan mormee akka yaada isaatti cabsatu immoo, ala tokko, ala lamas erga gorsitee booddee dhiisi*!

¹¹Namni akkasii waan hundumaa irraa jal'atee cubbuu hojjechuu isaa, nama ofii isaatii ofitti farade ta'uu isaas beeki*![14]

¹²Ganna Niqopholiisin ba'uudhaaf murtoo waanan godheef, yeroo ani Arxemaasin yookiis Xikiqoosin gara keetti ergu, ariitiidhaan achitti ana bira dhufuuf dhama'i*!

¹³Zenaas isa seera-beekaa sanaa fi Apholosin, akka isaan waan tokko illee hin dhabnetti hamma siif danda'ametti gargaarii karaa irra buusi*!

¹⁴Namoonni keenya copha-hinqabne ta'uu dhiisanii, wanta cimsee barbaachisu gargaaruu akka danda'anitti, hojii gaarii hojjechuudhaaf of kennuu haa baran*![15]

¹⁵Warri anaa wajjin jiran hundinuu nagaa siif dhaamu; amantiidhaan warra nu jaallatanitti nagaa nuuf himi! Ayyaanni hunduma keessanii wajjin haa ta'u*.[16]