Read west central oromo ERGAA YAAQOOB 3 Bible Online

ERGAA YAAQOOB 3 - west central oromo bible

ERGAA YAAQOOB 3

¹Obboloota ko, baay'een keessan barsiisota ta'uutti hin ariifatinaa! Nuyi warri barsiisota taanu warra kaan irra caalaa firdii fudhachuuf akka jirru in beektu.

²Nuyi hundumti keenya baay'ee irraa in kaanna; namni dubbii isaatiin irraa hin kaanne nama fiixaan ba'ee dha. Inni akka nama luugama itti kaa'etti, namummaa isaa guutummaatti qabuu in danda'a*.

³Fardi akka nuuf abboomamuuf afaan isaatti luugama yoo keenye, dhagna isaa guutuu luugamichaan qabnee gara jaallannetti in geessina*.

⁴Mee markaba ilaalaa! Markabni hammana utuma guddatuu qilleensa jabaadhaanis utuma oofamuu, batoo xinnoo tokkoon gara inni isa oofuu barbaadetti in geeffama.[18]

⁵Arrabnis akkasuma bu'aa dhagnaa xinnoo tokkoo dha; waan gurguddaa baay'eedhaan of in jaja. Ibiddi hammam xinnaatu illee caakkaa hammam guddatu iyyuu in guba.

⁶Arrabni ibidda; lafas jal'ina hundumaan in guuta. Arrabni bu'aa dhagna keenyaa keessatti iddoo dhaabataa qaba, guutummaa dhagnaas in xureessa; ofii isaatii qilillee ibiddaatiin qabsiifamee, naannoftuu dhalootaa hundumaatti ibidda in qabsiisa*.

⁷Namni uumama isaatiin bineensota keessaa, simbirroota keessaa, bineensota lafa irra munyuuqan keessaa, bineensota bishaan keessa jiraatan keessaa leejjisuu in danda'a, leejjiseeras.

⁸Garuu namni arraba leejjisuu danda'u hin jiru; inni hamaa gabii hin qabnee dha, hadhaa du'a fiduunis guutuu dha*.

⁹Arabbaan maqaa Waaqayyoo gooftaa in eebbifna, isumaanis namoota fakkaattii Waaqayyootti uumaman in abaarra*.

¹⁰Afaanuma tokko keessaa eebbii fi abaarsi in ba'a; kun akkas ta'uun irra hin jiru, obboloota ko.

¹¹Burqaan tokko bishaan miyaa'aadhaa fi hadhaa'aa in yaasaa ree?

¹²Obboloota ko! Mukti harbuu ija ejersaa, mukti wayniis ija harbuu godhachuu danda'aa ree? Akkasuma immoo burqaan horaa bishaan namni dhugu yaasuu hin danda'u*.[19]

¹³Isin keessaa namni ogeessi hubataanis jiraa? Inni karaa garraamummaa ogummaa keessaa argamu sanaa, adeemii isaa isa gaariidhaan hojii isaa isa gaarii haa mul'isu*.

¹⁴Garaa keessan keessatti hinaaffaa hadhaa'aa, ofittummaas yoo qabaattan garuu, akka ogummaatti ittiin of hin jajinaa! Dhugaa irrattis soba hin dubbatinaa*!

¹⁵Ogummaan akkasii kun isa lafa irraa ti, kan yaada foonii ti, kan hafuura hamaa ti malee, waaqa irraa isa gad bu'e miti*.

¹⁶Lafa hinaaffaanii fi ofittummaan jiru, hammacamni, wanti hamaan hundinuus jira*.

¹⁷Ogummaan waaqa irraa garuu, hundumaa dura qullaa'aa dha, akkasumas naga-qabeessa, garraamii dha, of kennaa dha; oo'aan, ija gaariidhaanis guutuu dha; garaa hir'uun, of arguu dhabuunis keessa hin jiru*.

¹⁸Karaa isaa warra nagaa buusaniif, sanyiin ija qajeelummaa kennu nagaadhaan in facaafama*.[20]