Read west central oromo 1 ERGAA PHETHROS 4 Bible Online

1 ERGAA PHETHROS 4 - west central oromo bible

1 ERGAA PHETHROS 4

¹Kristos namummaa fooniitiin erga dhiphatee, isinis immoo akkuma isaa yaaduudhaan, akka nama lolaaf mi'a hidhatetti taa'aa! Namni namummaa fooniitiin dhiphatu cubbuutti of kennuu dhiiseera*.

²Egaa foon akka uffattanitti bara si'achi itti jiraattanitti akka jaalala Waaqayyootti malee, akka hawwa namaatti jiraachuun keessan haa hafu!

³Wanta warri saba Waaqayyoo hin ta'in hojjechuu jaallatan hojjechuudhaan, yeroon isin dabarsitan in ga'a. Bara sanatti gad-dhiisatti, hawwa keessan raawwachuutti, machiitti, gar-malee nyaachuutti, gar-malee dhuguutti, waaqayyolii tolfamaniif sagaduu keessattis karaa baay'ee seera Waaqayyoo irra daddarbuutti jiraachaa turtan*.

⁴Isa isin amma isaanitti dabalamtanii lolaa jireenya ittisa hin qabneetiin fudhatamuu dhiiftan in dinqifatu, maqaa keessanis in balleessu.

⁵Isaan immoo waan godhan sababii isaa wajjin isa warra jiranii fi warra du'anitti faraduuf qophaa'etti himuuf jiru*.

⁶Kanaaf warra du'aniif iyyuu wangeelli in lallabame; warri du'an sun sababii nama ta'aniif fooniin du'uun yoo itti faradame illee, hafuuraan jireenya Waaqayyo kennuufitti in jiraatu*.[19]

⁷Dhumni waan hundumaa dhi'aateera; egaa warra of qaban, kadhata gochuufis warra eeggatan ta'aa*!

⁸Baay'inni cubbuu akka deebi'ee hin argamne kan godhu jaalala waan ta'eef, hundumaa dura immoo jaalala ho'aa waliif qabaadhaa*!

⁹Wal simachuu keessatti namoonni guungummii malee keessummoota simachuu haa jaallatan*!

¹⁰Akka hojii adeemsiftuu gaggaariin kennaa Waaqayyoo isa garaa garaa hojii irra oolchanitti, namni adduma addaan kennaa ayyaanaa isa argate, warra kaaniifis akka waa'ee baasutti ittiin haa hojjetu.

¹¹Inni dubbatu, isa Waaqayyo jedhe haa dubbatu; inni waa hojjetus, humna Waaqayyo isaaf kenneen haa hojjetu; Waaqayyo waan hundumaan karaa Yesus Kristos ulfina haa argatu! Isaaf ulfinnii fi aangoon baraa hamma bara baraatti haa ta'u! Ameen*.[20]

¹²Michoota ko, wanti akka ibiddaa gubu isin qoruudhaaf yommuu isin irra bu'u, waan takkaa ta'ee hin beekne waan isin irra bu'e fakkaatee, isin hin dinqifachiisin*!

¹³Kristos ulfina isaatiin yommuu mul'atu, gammaddanii akka ililchitanitti, hammuma dhiphina isaa keessaa hirmaattuu taatan, isinis hammasuma gammadaa*!

¹⁴Maqaa Kristosiif jettanii yommuu arrabsamtan, isin warra gammadanii dha; hafuurri ulfinaa inni kan Waaqayyoo isin irra in boqota*.

¹⁵Garuu isin keessaa tokko iyyuu nama gumaa yookiis hattuu, nama hamaa hojjete yookiis nama namatti darbe ta'e hin dhiphatin!

¹⁶Kristiiyaana ta'uu isaatiif yoo dhiphate garuu hin yeella'in! Maqaa Kristosiin waamamee isa hojjete sanaan Waaqayyoof ulfina haa kennu*![21]

¹⁷Yeroon firdiin kennamu ga'eera; firdiin kunis warra mana Waaqayyoo keessaatti in jalqabama; erga dura nutti in jalqabama ta'ee, dhumni warra wangeela Waaqayyoo amanuu didanii maal haa ta'u ree*?

¹⁸Caaffanni qulqullaa'aan, ?Namni qajeelaan fayyuun rakkinaan erga ta'ee, namni Waaqayyo malee jiraatuuf namni cubbamaan attam ta'uuf jira ree?? jedha*.

¹⁹Kanaafis warri akka jaalala Waaqayyootti dhiphatan iyyuu, gaarii hojjechuudhaan lubbuu isaanii uumaa isaanii isa amanamaatti hadaraa haa kennatan*![22]