Read west central oromo Macaafa Abboota Firdii 11 Bible Online

Macaafa Abboota Firdii 11 - west central oromo bible

Macaafa Abboota Firdii 11

¹Yiftaan Giil'aadichi loltuu jabaa ture; inni dubartii ejjituu tokko irraa dhalate, abbaan isaas ?Giil'aad? jedhama ture.

²Haati manaa Giil'aad immoo ilmaan in deesseef; isaan erga gurguddatanii Yiftaadhaan, ?Ati dubartii kan biraa irraa waan dhalatteef, mana abbaa keenyaatii dhaala hin argattu? jedhanii, ari'anii isa in baasan*.

³Innis obboloota isaa duraa baqatee biyya Xoobitti in gale; namoonni gatii hin qabnes isatti in dacha'an*.[49]

⁴Kana booddee warri Amoon Israa'elitti lola in kaasan.

⁵Yeroo warri Amoon lola itti kaasanitti, maanguddoonni Giil'aad Yiftaa biyya Xoobii waammachuu in dhaqan.

⁶Yiftaadhaanis, ?Warra Amoon akka lolluuf kottuutii ajajjuu waraanaa nuuf ta'i!? jedhan.

⁷Inni immoo maanguddoota sanaan, ?Isin ana jibbitanii mana abbaa kootii ariitanii na baaftan mitii ree? Yeroo rakkina keessaniitti immoo maaliif na barbaacha dhuftan ree?? jedhe.

⁸Maanguddoonni Giil'aadis Yiftaadhaan, ?Ati nuu wajjin baatee warra Amoon akka loltuuf, nuyi warra Giil'aad keessa jiraannu hundumaa irrattis dura-buutuu akka taatuuf gara kee dhufne? jedhan*.

⁹Yiftaan immoo maanguddoota Giil'aadiin, ?Warra Amoon loluudhaaf biyyatti yoo na deebiftan, Waaqayyos harka koo keessa yoo isaan buuse, dhugumaan ani dura-buutuu keessan nan ta'aa ree?? jedhe.

¹⁰Yommus isaan deebisanii, ?Akkuma ati amma dubbatte gochuuf akka jirru Waaqayyo nuu fi si gidduutti dhuga-baatuu haa ta'u!? jedhan.

¹¹Kana irratti Yiftaan maanguddoota Giil'aadii wajjin in gale; warri biyyasiis dura-buutuu fi ajajjuu waraanaa isa in godhatan; Yiftaan dubbii kana hundumaa Miisphaatti fuula Waaqayyoo duratti in dubbate.[50]

¹²Yiftaan gara mootii warra Amoonitti namoota ergee, ?Ati biyya koo keessatti na loluudhaaf kan dhufte anii fi ati maal walittii qabna?? jedhee gaafachiise.

¹³Mootiin warra Amoon immoo namoota Yiftaan ergeen, ?Warri Israa'el Gibxii yommuu ba'an biyya koo laga Aarnonii hamma laga Yaaboqitti, darbees hamma laga Yordaanositti fudhataniiru; amma garuu, ?Ati jaalalaan anaaf deebisi!? jedhaan!? jedhe.

¹⁴Ammas Yiftaan gara mootii warra Amoonitti namoota ergee, dhaamsa tokko itti in dhaame.

¹⁵Dhaamsa isaa keessatti, ?Yiftaan, ?Israa'eloonni biyya Mo'aab, biyya warra Amoonis hin fudhanne*.

¹⁶Haa ta'u iyyuu malee, Gibxii yommuu ba'an lafa onaa keessa gara galaana diimaatti darbanii hamma Qedeeshitti in dhufan.

¹⁷Isaan gara mootii Edoomitti namoota erganii:- Hadaraa biyya kee keessa akka darbinuuf tole nuuf jedhi! jedhan; mootiin Edoom garuu isaaniif hin dhageenye; akkasumas gara mootii Mo'aabitti erginaan, innis immoo isaan dide; kanaaf Israa'eloonni Qedeesh keessa takka taa'an*.

¹⁸Ergasiis lafa onaa keessa darbanii biyya Edoomii fi biyya Mo'aab laga Aarnonis naanna'anii gama keessaan Mo'aab irraa gara ba'a-biiftuu in buufatan; lagni Aarnon daarii biyyichaa waan ta'eef, isaan lagicha itti hin ceene, daarii Mo'aabis hin darbine*.[51]

¹⁹? ?Israa'eloonni gara Sihoon mootii Amoorotaa isa mandara Heshboon keessa taa'ee mo'etti namoota erganii:- Hadaraa biyya kee keessa baanee gara lafa keenyaatti akka darbinuuf tole nuuf jedhi! jedhaniin*.

²⁰Sihoon garuu Israa'eloonni nagaadhaan biyya isaa keessa darbuu isaanii hin amanne; kanaaf namoota isaa hundumaa walitti qabatee iddoo Yaahaz jedhamu buufatee isaan lole.

²¹Waaqayyo gooftichi Israa'el immoo Sihoonii fi namoota isaa hundumaa harka Israa'elootaa keessa in buuse; Israa'eloonni isaan rukutanii, biyya Amoorota warra achi keessa jiraatanii hundumaas in qabatan.

²²Biyya Amoorotaa hundumaa laga Aarnonii hamma laga Yaaboqitti, karaa ba'a-biiftuu immoo lafa onaadhaa hamma laga Yordaanositti in qabatan.

²³Egaa isa Waaqayyo gooftichi Israa'el warra Amoorotaa saba isaa duraa ari'ee baase, ati immoo amma ariitee isaan baasuu feetaa ree?

²⁴Ati qabeenya warra Waaqayyo kee inni:- Kemosh jedhamu si duraa ari'ee baasuu in qabatta mitii ree? Nus immoo qabeenya warra Waaqayyo gooftaan keenya nu duraa ari'ee baasuu in qabanna*.

²⁵Ati immoo Balaaq ilma Ziphoor mootii Mo'aab in caaltaa ree? Inni Israa'elin mormeeraa ree? Lolas itti kaaseeraa ree*?

²⁶Sabni Israa'el mandaroota Heshboonii fi Aro'er gandeen isaanii keessas, mandaroota qarqara Aarnon jiran hundumaa keessas waggaa dhibba sadii jiraataniiru; isin yeroo sana keessa maaliif mandaroota kana deebiftanii harkaa baafachuu dhiiftan ree?

²⁷Ani sitti hin darbine, ati garuu lola anatti kaasuu keetiin dabaa ana irratti hojjette; Waaqayyo abbaan firdii har'a warra Israa'eliif warra Amoon gidduutti haa faradu!? siin jedha? jedhe.

²⁸Mootiin warra Amoon garuu dhaamsa Yiftaan itti dhaame kana hin fudhanne.[52]

²⁹Hafuurri Waaqayyoo Yiftaa in geggeessa ture; innis biyya Giil'aadii fi biyya Minaasee keessa ba'ee, gara Miisphaa isa Giil'aad keessaatti darbee achii immoo ka'ee gara warra Amoon in dhaqe*.

³⁰Waaqayyoofis wareega wareegee, ?Ati dhugumaan warra Amoon kana harka koo keessa yoo buufte,

³¹ani immoo yeroon nagaadhaan achii deebi'ee dhufu, waanuma duraan dursee ana simachuudhaaf balbala mana koo keessaa gad ba'u siif nan kenna; qalma gubamu godhees siif nan dhi'eessa? jedhe.

³²Kana booddee Yiftaan warra Amoon loluuf gara isaaniitti in ce'e; Waaqayyo immoo warra Amoon harka isaa keessa in buuseef.

³³Yiftaanis Aro'eerii jalqabee hamma Miiniititti akkasumas hamma Abeel-Karamiimitti warra Amoon rukuttaa cimaadhaan rukutee, mandaroota digdama in qabate; yommus warri Amoon harka Israa'elootaa jala in galan.[53]

³⁴Yiftaan ergasii Miisphaatti gara mana isaatti yommuu deebi'e, kunoo intalli isaa dibbee fudhattee sirbaa isa simachuudhaaf gad itti baate; isheen mucaa tokkittii dha; inni ishee malee ilma yookiis durba hin qabu ture.

³⁵Yommuu ishee arge immoo gadda irraa kan ka'e uffata isaa tarsaasee, ?Wayyoo! Yaa intala ko! Baay'ee na gaddisiifte, na dhiphiftes; ani Waaqayyo duratti afaan kootiin waanan dubbadhe qaba; isa dhiisuus hin danda'u? jedhe*.

³⁶Intalli isaa immoo, ?Yaa abbaa ko! Waaqayyo diinota kee warra Amoon irratti ijaa waan siif baaseef, wanta isa duratti afaan keetiin dubbatte, akkuma dubbii keetiitti ana irratti raawwadhu!? jetteen.

³⁷Itti dabaltee abbaa isheetiin, ?Dura garuu waan tokkittii ani si kadhadhu anaaf raawwadhu! Dhaqee tulluu irra asii fi achi deddeebi'ee durboota hiriyoota koo wajjin durbummaa kootiin karaadhaa deebi'uu kootiif akkan boo'utti ji'a lamaaf yeroo anaaf kenni!? jette.

³⁸Inni immoo ?Dhaqi!? jedhee, ji'a lamaaf ishee erge; isheenis durboota hiriyoota ishee wajjin gara tulluu dhaqxee achi irratti durbummaa isheetiin karaadhaa deebi'uu isheetiif in boosse.

³⁹Intalattiin raawwattee utuu dhiira bira hin ga'in yeroo ji'i lamaan ishee dhumutti, gara abbaa isheetiitti in deebite; innis isa wareegee ture ishee irratti in raawwate*.

⁴⁰Kana irraa kan ka'e durboonni Israa'el waggaa waggaatti guyyaa afuriif ba'anii intala Yiftaa Giil'aadichaaf in boo'u turan; kunis biyya Israa'el keessatti amala ta'e.[54]