Read west central oromo Macaafa Abboota Firdii 14 Bible Online

Macaafa Abboota Firdii 14 - west central oromo bible

Macaafa Abboota Firdii 14

¹Gaaf tokko Siimson gara mandara Tiimnaat dhaqee, achitti dubartoota Filisxeemotaa keessaa intala tokko arge.

²Gara manaatti deebi'ee abbaa isaatiif haadha isaatiin, ?Warra Filisxeemotaa keessaa intala tokko mandara Tiimnaatitti argadheeraatii ana fuusisaa!? jedhe.

³Abbaan isaatii fi haati isaa garuu, ?Ati Filisxeemota warra dhagna hin qabanne keessaa niitii fuudhuuf kan dhaqxu dhugumaan intaloota sanyii keetii yookiis saba keenya hundumaa keessaa durba fuutu dhabde moo?? jedhanii in gaafatan; inni immoo abbaa isaatiin, ?Isheen ija kootti tolteettii ana fuusisi!? jedhe*.[62]

⁴Yaadni kun Waaqayyo biraa akka ta'e abbaan isaatii fi haati isaa hin beekne turan; Israa'eloonni yeroo sanatti mootummaa isaanii jala waan turaniif, Waaqayyo ittiin qabee warra Filisxeemitti lola kaasuu in barbaade.

⁵Kanaaf Siimson abbaa isaatii fi haadha isaatii wajjin gara Tiimnaat in dhaqe; akkuma isaan iddoo waynii Tiimnaat ga'aniin, leenci saafelli tokko aadaa isatti in dhufe.

⁶Battaluma sanatti hafuurri Waaqayyoo Siimsoniif dhufnaan, innis homaa of harkaa utuu hin qabaatin akkuma ilmoo reettiitti leencicha in kukkute; kana gochuu isaas abbaa isaatii fi haadha isaatti hin himne.

⁷Ergasii dhaqee intalattii wajjin in haasa'e; isheenis ija isaatti in tolte.

⁸Guyyaa muraasa booddee ishee fuudhuudhaaf utuu deebi'uu raqa leencichaa ilaaluudhaaf itti gore; raqa leencichaa keessatti immoo gurmuu kanniisaa fi damma arge.

⁹Dammichas harka isaatiin kutatee nyaachaa adeemee, gara abbaa isaatii fi haadha isaatii in dhufe; dammicha raqa leencaa keessaa akka kutate utuu isaanitti hin himin, isaaniif immoo in kenne, isaanis in nyaatan.

¹⁰Abbaan isaa gara mana intalattii ishee Siimson fuudhuuf dubbatee in dhaqe; akkuma dargaggoonni yeroo fuudhanitti cidha godhatan Siimsonis achitti cidha in qopheesse.

¹¹Warri naannoo sanaas qophee isaa yommuu argan, namoonni soddomni hamaamota isaa ta'anii isaa wajjin akka turan in godhan.

¹²Siimson namoota sanaan, ?Ani hibboo isin nan hibbifadha, isinis guyyoota cidhaa torban kana keessatti hiikaa isaa argattanii yoo anatti himtaniif, wayyaa quncee talbaa irraa hojjetame soddoma, geddarachuudhaafis uffata guutuu soddoma isiniif nan kenna.

¹³Isin immoo hiikaa isaa anatti himuu yoo dadhabdan, wayyaa quncee talbaa irraa hojjetame soddoma, uffata guutuu soddomas anaaf in kennitu? jedhe; isaan yommus deebisanii, ?Mee nu hibbifadhu kaa in dhageenyaa? jedhan.

¹⁴Innis, ?Isa nyaatu keessaa waanta nyaatamutu ba'e, isa jabaa keessaa wanta miyaa'utu ba'e? jedhe; isaanis guyyaa sadii keessatti hiikaa hibboo sanaa himuu hin dandeenye.

¹⁵Gaafa guyyaa afuraffaa[63] jarri haadha manaa Siimsoniin, ?Isin nu deegsuudhaaf asitti nu waamtan mitii ree? Hiikaa hibboo sanaa dhageessee akka nutti himtuuf abbaa manaa kee sossobadhu! Kanaa achi mana abbaa keetii wajjin ibiddaan si gubna? jedhan.

¹⁶Yommus isheen Siimsonitti boossee, ?Ati na jibbita malee, ana hin jaallattu; ijoollee keenya hibboo hibbifattee hiikaa isaa immoo anatti hin himin hafte? jetteen; inni immoo, ?Argitee! Ani kana abbaa kootii fi haadha kootti iyyuu hin himne; sitti immoo attamittan hima ree?? jedheen.

¹⁷Isheen garuu hamma yeroon cidha isaanii inni guyyaa torbaa raawwatutti isatti boossee waan isa rakkifteef, gaafa guyyaa torbaffaa hiikaa hibbichaa isheetti in hime; isheen immoo firoota ishee sanatti in himte*.

¹⁸Namoonni mandarichaas gaafa guyyaa torbaffaa sana aduun utuu hin lixin Siimsoniin, ?Damma caalaa maaltu miyaa'a ree? Leenca caalaas maaltu jabaata ree?? jedhan; inni immoo, ?Raada kootiin utuu qotuu dhabaattanii, hiikaa hibboo kootii hin argattan turtan? jedhe.

¹⁹Battaluma sanattis hafuurri Waaqayyoo Siimsoniif dhufnaan, gara Ashqalon dhaqee, namoota achii keessaa soddoma ajjeesee uffata isaanii irraa fudhatee, namoota hibboo isaa hiikan sanaaf uffata geddaraa tokko tokko in kenne; kana booddee aarii guddaadhaan gara mana abbaa isaatiitti in deebi'e.

²⁰Haadha manaa isaa garuu hamaamota isaa keessaa isa inni miinjee godhatetti in heerumsiisan*.[64]