Read west central oromo Macaafa Abboota Firdii 16 Bible Online

Macaafa Abboota Firdii 16 - west central oromo bible

Macaafa Abboota Firdii 16

¹Gaaf tokko Siimson gara mandara Gaazaa dhaqee dubartii ejjituu tokko argee gara isheetti ol gale*.

²Warri Gaazaas, Siimson ?Mandara kana dhufeera? jechuu dhaga'anii, itti marsanii halkan guutuu karaa karra mandarichaa riphanii isa eeggachaa bulan; isaan, ?Yommuu lafti bari'u isa in ajjeefna? jedhanii, halkan guutuu homaa hin dubbanne, asii fi achis hin sokoksine.

³Siimson garuu hamma halkan walakkaatti rafe; kana booddee ka'ee michichila karra mandarichaa lamaan qabee, cufaa isaatii fi danqaraa isaa wajjin buqqisee gatiittii isaa irra kaa'atee roggee tulluu isa fuullee Kebroon jirutti ol in baase.[67]

⁴Ergasii booddee Siimson dubartii ?Deliilaa? jedhamtu dachaa Sooreq keessa jiraattu tokko in jaallate.

⁵Gurguddoonni Filisxeemotaa warri humnaan mo'an gara dubartittii dhaqanii, ?Siimson humna guddaa kana eessaa akka argatu, nuyis maal goonee akka humna isa caalu, attamittis hiinee akka gad isa qabnu sossobii isa irraa bari! Nuyis tokkon tokkon keenya meetii kuma tokkoo fi dhibba tokko tokko mama malee siif in kennina? jedhan*.

⁶Deliilaan yommus Siimsoniin, ?Humna guddaa qabdu kana eessaa akka argattu, attamittis hidhanii gad si qabuun akka danda'amu hadaraa anatti himi!? jette.

⁷Siimson deebiseefii, ?Ribuu haaraa hin goggogin jiru torbaan yoo na hidhan nan dadhaba, akkuma nama kan biraas nan ta'a? jedhe.

⁸Yommus gurguddoonni Filisxeemotaa ribuu haaraa hin goggogin jiru torba isheetti in fidan; isheen immoo ittiin namicha in hiite.

⁹Yeroo sana namoonni kutaa mana ishee gar tokko keessa riphanii in eeggatu turan; isheenis, ?Yaa Siimson! Filisxeemonni sitti dhufan!? jette; inni immoo akkuma fo'aan jirbii yeroo ibiddatti dhi'aatu gargar yaa'utti, ribuu sana in kukkute; humni isaa eessaa akka dhufu garuu amma illee hin beekamne.[68]

¹⁰Deliilaan ammas Siimsoniin, ?Edaa ati anatti ga'ifte, soba anatti dubbattes; amma garuu maaliin akka hidhamtu hadaraa anatti himi!? jette.

¹¹Inni immoo, ?Funyoo haaraa kanaan dura ittiin hin hojjetaminiin yoo na hidhan nan dadhaba, akkuma nama kan biraas nan ta'a? jedheen.

¹²Achumaan Deliilaan funyoo haaraa fudhattee ittiin isa hiite; namoonni immoo kutaa mana ishee gar tokko keessa riphanii in eeggattu turan; isheen immoo, ?Yaa Siimson! Filisxeemonni sitti dhufan!? jetteen; inni garuu akka nama fo'aa kututti funyicha irree isaatii in kukkute.

¹³Deliilaan kana irratti Siimsoniin, ?Ati hamma ammaatti anatti ga'ifte, soba anatti dubbattes; amma maaliin akka hidhamtu anatti himi!? jette; yommus Siimson, ?Daabee mataa kootii torban manii keessa baaftee gudunfitee, jabeessitee qofootti yoo hiite nan dadhaba, akkuma nama kan biraas nan ta'a? jedhe.

¹⁴Isheenis utuu inni rafee jiruu daabee mataa isaatii torban manii keessa baaftee gudunfitee, jabeessitee qofootti hiitee, ?Yaa Siimson, Filisxeemonni sitti dhufan!? jette; innis hirribaa dammaqee qofoo isa isheen daabee mataa isaatii manii keessa baaftee gudunfitee itti hiite sana in buqqise.

¹⁵Isheen ammas, ?Kunoo ati humna kee isa guddaa kana eessaa akka argattu anatti himuu dhiiftee si'a sadii anatti ga'ifte; garaan kee ana bira utuu hin jiraatin, attamitti ?Sin jaalladha? naan jetta ree? jetteen.

¹⁶Har'aa bor isa gaafachuudhaan rakkiftee taa'uu fi ka'uu waan isa dhowwiteef hamma du'aatti in gadde.

¹⁷Kana irraa kan ka'es, ?Ani garaa haadha kootiitii jalqabee Waaqayyoof addaan waanan baafameef, takkaa qarabaan mataa koo irra hin geenye; mataan koo yoo haadame garuu humna nan dhaba, nan dadhaba, akkuma nama kan biraas nan ta'a? jedhee, dhoksaa garaa isaatii hundumaa isheetti in hime*.[69]

¹⁸Deliilaan yommus Siimson dhoksaa garaa isaatii hundumaa akka isheetti hime hubattee, gurguddoota Filisxeemotaatti ergitee, ?Namichi dhoksaa garaa isaatii hundumaa anatti himeera; kanaaf amma kana kottaa!? jettee waamte; kanaaf gurguddoonni Filisxeemotaa horii ishee abdachiisanii turan harkatti qabatanii gara ishee in dhufan.

¹⁹Isheen immoo jilba ishee irra isa rafiftee, nama tokko waammattee, daabee mataa Siimson torbanuu irraa in haadchifatte; akkasitti isheen gad isa qabuu jalqabde, innis humna in dhabe.

²⁰Yeroo sanatti Deliilaan, ?Yaa Siimson! Filisxeemonni sitti dhufan?! jetteen; inni garuu hirribaa dammaqee, Waaqayyo akka isa irraa gara gale utuu hin beekin, ?Akkuma koo kanaan duraa of irraa darbadheen gad ba'a? jedhee yaade*.

²¹Yommus Filisxeemonni Siimsonin qabanii ija isaa keessaa baasanii gara Gaazaatti gad in geessan; achitti funcaa sibiila diimaatiin isa hidhanii, mana hidhaa sana keessatti daakuu isa in daaksisu turan.

²²Haa ta'u iyyuu malee, rifeensi mataa isaatii inni haadamee ture deebi'ee guddachuufii in jalqabe.[70]

²³Gurguddoonni Filisxeemotaa, ?Daagon Waaqayyoon keenya, harka keenya keessa buuse Siimson diina keenya? jedhanii, Waaqayyo isaaniitiif kennaa qalma guddaa isaa dhi'eessuudhaaf isatti gammaduudhaafis walitti in qabaman*.

²⁴Jarri Siimsonin yommuu argan, Waaqayyo isaanii jajatanii, ?Waaqayyo inni kan keenyaa harka keenya keessa buuse diina keenya, isa biyya keenya balleesse, namoota baay'ees nu duraa ajjeese? jedhan.

²⁵Garaa isaanii guutuudhaan yeroo gammadanitti, ?Siimson dhufee nuuf haa taphatu, isa waamaa!? jedhan; Siimsonin mana hidhaa keessaa waamsisanii, utuboota gidduu dhaabachiisanii, akka inni isaan duratti taphatu in godhan.

²⁶Siimson immoo, dargaggeessicha harka qabee isa geggeessuun, ?Utuboota manicha baatanii jiran qaqqabadhee akkan itti hirkadhuuf gad na dhiisi!? jedhe.

²⁷Dhiironnii fi dubartoonni, gurguddoonni Filisxeemotaa hundinuus manicha keessa guutanii turan; isaan malees tapha Siimson argisiisu ilaaluudhaaf dhiironnii fi dubartoonni kumni sadii kutaa manichaa isa gara irraa keessa turan.[71]

²⁸Yommus Siimson, ?Yaa gooftaa ko, na yaadadhu! Ija koo lamaaniif Filisxeemota irratti tokkicha ijaa akkan baafadhuuf maaloo yaa Waaqayyo alana duwwaa humna anaaf kenni!? jedhee Waaqayyoon waammate.

²⁹Utuboota manicha baatanii jiran warra gidduu lamaan, utubaa isa tokko harka isaa mirgaatiin, isa kaan immoo harka isaa bitaatiin dhisee in qabe.

³⁰Achumaanis, ?Filisxeemota kanaa wajjin nan obbaafadha? jedhee, utuboota sana humnaan gargar in dhiibe; manichi gurguddootaa fi namoota isa keessa turan hundumaa irratti in jige; akkasitti Siimson warra fayyaatti utuu jiruu ajjeese caalaa gaafa du'e sana namoota baay'ee in fixe*.

³¹Yommus obboloonni isaaf qomoon abbaa isaa hundinuu dhaqanii reeffa isaa fuudhanii geessanii, lafa awwaala abbaa isaa Maano'aa isa Zoraadhaa fi Eshta'ol gidduu jirutti in awwaalan; Siimson waggaa digdama Israa'elin geggeessee ture*.[72]