Read west central oromo Macaafa Abboota Firdii 3 Bible Online

Macaafa Abboota Firdii 3 - west central oromo bible

Macaafa Abboota Firdii 3

¹Waaqayyo, namoota Israa'el warra lola biyya Kana'aan keessatti ta'e hin argin qoree ilaaluudhaaf, saba garaa garaa achitti in hambise*.

²Inni saba Israa'el keessaa dhaloonni gara booddee warri lola hin argin kun lola akka baran in barbaade.

³Sabni warri achitti hafan kunis gurguddoota Filisxeemotaa warra humnaan mo'an, Kana'aanota, Sidoonota, Hiiwota warra tulluu Liibaanon gubbaa, tulluu Ba'aal-Hermoonii hamma itti lixa Haamaatitti jiraatanii dha*.

⁴Sabni garaa garaa kun achitti argamuun isaanii, namoonni Israa'el, abboommii Waaqayyo karaa Musee abboota isaaniif kenne sanaaf abboomamuun isaanii qoramee akka ittiin ilaalamuuf ture.

⁵Egaa sabni Israa'el warra Kana'aanotaa, Heetotaa, Amoorotaa, Pheriizotaa, Hiiwotaa fi Yibusootaa gidduu in jiraatan.

⁶Durboota saba garaa garaa kana in fuudhan, durboota ofii isaanii dargaggoota warra biyya sanaatti in heerumsiisan, waaqayyolii isaaniis in waaqessan*.[12]

⁷Israa'eloonni, Waaqayyo duratti waan hamaa in hojjetan; Waaqayyoon gooftaa isaanii irraanfatanii, Ba'aalii fi Asheeraa waaqayyolii tolfamoo in waaqessan.

⁸Kanaaf dheekkamsi Waaqayyoo Israa'el irratti boba'ee harka Kushaan-Riishaataayim mootii Mesophotaamiyaa jala isaan galche; isaanis mootii sanaaf garbummaatti waggaa saddeet in hojjetan; [?Mesophotaamiyaan? isa dur ?Aram Naharaayim? jedhamuu dha].

⁹Yeroo Israa'eloonni gara Waaqayyotti iyyatanitti garuu, inni harka mootichaa jalaa akka isaan baasuuf Otnii'elin ilma Qenaz obboleessa Kaaleb isa quxisuu isaaniif in kaase; innis harka mootichaa jalaa isaan in baase*.

¹⁰Hafuurri Waaqayyoo Otnii'eliif in dhufe; innis abbaa firdii isaanii ta'ee isaan in geggeesse; lolaaf yommuu inni ba'etti immoo Waaqayyo akka inni humna caalee Kushaan-Riishaataayim mootii Mesophotaamiyaa harka isaatti galfatu in godhe*.

¹¹Biyyattiin waggaa afurtamaaf gabiitti in jiraatte; kana booddees Otnii'el ilmi Qenaz in du'e.[13]

¹²Israa'eloonni ammas Waaqayyo duratti waan hamaa in hojjetan; sababii hamaa hojjetaniif, Waaqayyo immoo Egloon mootiin Mo'aab jabaatee Israa'el irratti akka ka'u in godhe.

¹³Egloon mootichis Amoonotaa fi Amaaleqoota ofitti dabalatee, dhaqee Israa'elin rukutee, mandara meexxiis in qabate*.

¹⁴Yommus Israa'eloonni Egloon mootii Mo'aabiif garbummaatti waggaa kudha saddeet in hojjetan.[14]

¹⁵Yeroo Israa'eloonni gara Waaqayyotti iyyatanitti garuu, inni nama kana keessaa isaan baasu in kaaseef; innis Ehud ilma Geraa sanyii Benyaamiin isa bitaacha ture; Israa'eloonni immoo Ehud kun Egloon mootii Mo'aabiif gibira akka geessuuf in ergan.

¹⁶Yommus Ehud billaa dhundhuma tokko dheeratu, gara lamaaniinis qara qabu tumee qopheeffatee, uffata isaa jalaan bukkee isaa mirgaatti hidhatee in ka'e;

¹⁷gibira sanas Egloon mootii Mo'aab isa baay'ee furdaa ture sanatti in geesse.

¹⁸Ehudis gibira sana erga geessee, namoota wanta gibiraaf kennamu kana baatanii dhaqan of biraa in adeemsise.

¹⁹Ofii isaatii garuu Giilgal iddoo waaqayyolii tolfamoon jiranii deebi'ee, Eglooniin, ?Yaa mootii! Ergaan dhoksaatti sitti himu qaba? jedheen; mootichi immoo namoota isa bira dhaabataniin, ?Mee, turaa!? jennaan hundumti isaaniis lafa hilaniif.

²⁰Ehud immoo Egloon kutaa mana isaa isa mana irraa isa qilleensa qabu keessa kophaa isaa taa'ee utuu jiruu itti dhi'aatee, ?Ergaa Waaqayyo biraa dhufe sitti nan hima? jedheen; kana irratti Egloon teessoo isaa irraa in ka'e.

²¹Ehud achumaan billaa isa bukkee isaa mirgaatti hidhatee ture sana, harka isaa bitaatiin luqqifatee humnaan garaa Egloon in waraane.

²²Billaan sun gonfa isaatii wajjin keessa lixee, fiixeen isaa dugda isaa keessaan in ba'e; Ehud billaa isaa garaa namichaa keessaa hin baafne; moorri namichaa immoo irra gara galee walitti in duuche.

²³Kana booddee Ehud kutaa manichaa isa mana irraa keessaa gad ba'ee, of duubaan balbala cufee gigirii itti galche.

²⁴Ehud manicha keessaa ba'ee erga adeemee, hojjetoonni mootichaa dhufanii balballi kutaa manicha mana irraa cufamee argan; isaanis, ?Tarii mana garaa dhaqe ta'a? jedhan.

²⁵Hamma balbala dura dhaabachuun isaan nuffisiisutti eeganii, inni homaa banuu dinnaan, banaa fudhatanii manicha yeroo bananitti, gooftaan isaanii du'ee reeffa isaa lafatti in argan.

²⁶Hamma hojjetoonni kun balballi banamuu isaa eeganitti, Ehud isaan jalaa miliqee karaa waaqayyolii tolfamoo sanaa ba'ee gara Se'iiraatti in sokke.

²⁷Yommuu achi ga'es tulluu Efreem gubbaatti fiingee in afuufe; namoonni Israa'elis isaa wajjin tulluu sana irraa gad bu'an; innis isaan dura bu'ee,

²⁸?Diinota keessan warra Mo'aab, Waaqayyo harka keessan keessa waan isiniif buuseef ana duukaa bu'aa!? jedheen; isaanis isa duukaa bu'anii, malkaa Yordaanos isa gara Mo'aabitti ceesisu qabatanii, namni tokko illee achiin akka hin ceeneef in ittisan.

²⁹Yeroo sanatti warra Mo'aab keessaa jagnoota jajjaboo gara kuma kudhanii in ajjeesan; namni tokko illees isaan jalaa hin baane.

³⁰Gaafas Mo'aab harka saba Israa'el jala galte; akkasitti biyyi Israa'el waggaa saddeettamaaf gabiitti in jiraate.

³¹Ehud booddeedhaan immoo Shamgaar ilmi Anaat tuttuqaa qotiyyootiin Filisxeemota dhibba ja'a ajjeesee, saba Israa'elin immoo harka isaanii jalaa in baase.