Read west central oromo Macaafa Abboota Firdii 4 Bible Online

Macaafa Abboota Firdii 4 - west central oromo bible

Macaafa Abboota Firdii 4

¹Ehud erga du'ee booddee, Israa'eloonni ammoo Waaqayyo duratti waan hamaa in hojjetan.

²Kanaaf Waaqayyo harka Yaabiin mootii Kana'aan isa mandara Hazor keessatti mo'e jala isaan galche; angafni loltuu mootichaa, Siiseraa isa mandara Haroshet-Hagoyiim keessa taa'u ture*.

³Yaabiin mootichi konkolaataa sibiilaa dhibba sagal waan qabuuf, Israa'elootas waggaa digdamaaf jabeessee waan cunqurseef, isaan Waaqayyoon gargaarsa in kadhatan*.[15]

⁴Yeroo sanatti raajittiin ?Deboraa? jedhamtu haati manaa Laphiidot geggeessituu[16] saba Israa'el turte.

⁵Isheen immoo biyya Efreem isa gaara gubbaa, Raamaadhaa fi Bet'el gidduu muka meexxii tokko jala in teessi turte; mukti kunis ?Muka meexxii Deboraa? in jedhama ture; Israa'eloonni dubbii isaanii akka isaaniif ilaaltutti ishee bira in dhaqu turan.

⁶Gaaf tokko isheen mandara Qedeesh isa biyya Niftaalem keessaatti nama ergitee Baaraaqin ilma Abiino'aam waamsiftee, ?Waaqayyo gooftichi Israa'el, ?Dhaqiitii sanyii Niftaalemiif sanyii Zebuloon keessaa namoota kuma kudhan fuudhiitii tulluu Taaboritti ol ba'i!

⁷Ani Siiseraa angafa loltuu Yaabiin konkolaataa isaatii fi loltoota isaatii wajjin laga Kiishonitti gara keetti fidee, harka keetti dabarsee isa nan kenna? jedhee si abboomeera? jetteen.

⁸Baaraaq immoo Deboraadhaan, ?Ati anaa wajjin yoo dhaqxe anis nan dhaqa, ati anaa wajjin yoo dhaquu dhabaatte garuu, anis hin dhaqu? jedhee deebiseef.

⁹Isheenis, ?Dhaquu illee sii wajjin nan dhaqa, garuu Waaqayyo karaa ati yaaddu kanaan Siiseraa harka dubartii jala waan galchuuf, ulfinni kana keessatti argamu siif hin lakkaa'amu? jettee, kaatee Baaraaqii wajjin gara Qedeesh in dhaqxe.

¹⁰Kana booddee Baaraaq namoota Zebuloonii fi namoota Niftaalem gara Qedeeshitti waamnaan, namoonni kumni kudhan isa duukaa bu'an; Deboraanis isaa wajjin dhaqxe.

¹¹Heber Qenichi yommus Qenoota warra sanyii Hobaab abbiyyuu Musee sana irraa gargar ba'ee, godoo isaa qilxuu isa Zaa'anaaniim jiru mandara Qedeeshitti dhi'oo sana bukkee in dhaabbate*.[17]

¹²Namoonnis Baaraaq ilmi Abiino'aam tulluu Taaboritti akka ol ba'e Siiseraatti in himan;

¹³Siiseraan immoo konkolaattota sibiilaa dhibba salganii fi namoota isaa wajjin turan fudhatee, Haroshet Hagoyiimii hamma laga Kiishonitti in adeeme.

¹⁴Deboraan yommus Baaraaqiin, ?Waaqayyo har'a Siiseraa harka kee keessa waan buusuuf, ka'iitii dhaqi! Waaqayyo si dura bu'eera mitii ree?? jetteen; Baaraaq achumaan namoota kuma kudhan of duukaa buusee gaara Taabor irraa gad in bu'e.

¹⁵Waaqayyos akkuma Baaraaq jara loluutti ka'een, Siiseraa, konkolaataa isaa fi loltoota isaa hundumaa gara kamitti akka goran isaan in wallaalchise; yommus Siiseraan konkolaataa isaa irraa bu'ee miilla isaatiin in baqate.

¹⁶Yommus Baaraaq konkolaattotaa fi loltoota hamma Haroshet Hagoyiimitti in ari'e; loltoonni Siiseraa hundinuu billaadhaan dhuman, namni tokko illees hin hafne.

¹⁷Siiseraan garuu Yaabiin mootii Hazorii fi sanyii Heber Qenichaa gidduu nagaan waan jiruuf, gara godoo Yaa'el haadha manaa Heber Qenichaatti in baqate.

¹⁸Yaa'elis Siiseraa simachuuf baatee, ?Yaa gooftaa ko as gori! Hin sodaatinii ol gali!? jetteen; innis goree, godoo isheetti ol gale; isheen immoo dirriba irra buuftee isa dhoksite.

¹⁹Yommus inni, ?Nan dheebodhe, hadaraa bishaan dhugaatii xinnoo ishee anaaf kenni!? ittiin jennaan, isheen qabee aannanii buqqiftee, akka inni dhuguuf kenniteefii, deebiftee isa in dhoksite.

²⁰Siiseraan dubartittii sanaan, ?Balbala godichaa dura dhaabadhu, eenyu illee dhufee, ?Namni as jiraa?? jedhee yoo si gaafate ?Hin jiru? jedhiin!? jedhe.

²¹Siiseraan dadhabee hirriba ulfaataa keessa utuu jiruu, Yaa'el haati manaa Heber qofoo dunkaanaa fi buruusa fudhattee, suuta jettee gara isaa dhaqxee, qoficha illee isaa keessa baaftee lafatti in qofaate; innis achumatti du'e.

²²Baaraaq ergasii Siiseraa faana dha'ee utuu dhufuu argitee, Yaa'el isa simachuuf gad baatee, ?Kottu! Nama ati barbaaddu sittan argisiisa!? jetteen; Baaraaqis godoo isheetti ol galee reeffa Siiseraa qofoon illee isaatti gad qofa'amee lafatti arge.

²³Waaqayyo guyyaa sanatti Yaabiin mootii Kana'aan Israa'eloota duratti gad in deebise.

²⁴Israa'eloonni Yaabiin mootii Kana'aan hamma balleessanitti qabaa isaanii itti cimsachaa in adeeman.