Read west central oromo MUL'ATA YOHANNIS 11 Bible Online

MUL'ATA YOHANNIS 11 - west central oromo bible

MUL'ATA YOHANNIS 11

¹Uleen akka ulee safaraa tokko anaaf in kenname; yommus tokko anatti dubbatee, ?Ka'i! Mana qulqullummaa Waaqayyoo iddoo aarsichaas safariitii namoota achitti sagadanis lakkaa'i*!

²Garuu oobdii mana qulqullummaa safaruu dhiisi! Inni warra saba Waaqayyoo hin ta'initti kennameera; isaan immoo ji'a afurtamii lamaaf mandara qulqullaa'aa sana dhidhiituuf jiru*.

³Dhuga-baatonni koo lamaan uffata gaddaa uffatanii, guyyoota kuma tokkoo fi dhibba lamaa fi jaataman sana raajii akka dubbataniif ani karaa nan kennaaf? jedhe*.[55]

⁴Dhuga-baatonni lamaan immoo, muka ejersaa lamaanii fi baattuu ibsaa lamaan Waaqayyo gooftaa biyya lafaa dura dhaabatanii dha*.

⁵Eenyu illee isaan miidhuu yoo barbaade, ibiddi afaan isaanii keessaa ba'ee diinota isaanii in fixa; eenyu illee isaan miidhuu yoo barbaades akkasitti ajjeefamuun irra jira*.

⁶Isaan kun lamaan bara raajii dubbatan sana waaqa keessaa bokkaan akka hin roobneef cufuudhaaf aboo qabu; bishaanota dhiigatti geddaruudhaaf, yeroo barbaadanittis dha'icha waan jedhamu hundumaan biyya lafaa rukutuudhaaf aboo qabu*.[56]

⁷Yommuu isaan dhugaa ba'uu isaanii raawwatan, bineensichi iddoo lafa jalaa sana keessaa ba'ee, lola isaanitti kaasuuf, isaan mo'uuf, isaan ajjeesuufis jira*.

⁸Reeffi isaaniis mandaricha guddicha isa gooftaan isaanii duraan itti fannifame keessaa karaa irratti argamuuf jira; mandarri sunis ija hafuuraatiin yommuu ilaalamu ?Sodoom yookiis Gibxi? jedhamee in waamama*.

⁹Nama hundumaa keessaa, gosa hundumaa keessaa, afaan hundumaa keessaa, saba hundumaa keessaa warri dhufan, guyyaa sadii fi walakkaadhaaf reeffa isaanii lafatti in ilaalu malee, hin awwaalchisan.

¹⁰Warri biyya lafaa irra jiraatan kanatti in gammadu; kun isaanitti in tola; raajonni warra biyya lafaa irra jiraatan dhiphisan kun waan du'aniifis, namoonni gammadanii kennaa waliif in ergu.

¹¹Guyyaa sadii fi walakkaa booddee immoo hafuurri jireenya kennu Waaqayyo biraa dhufee, raajota du'an sanatti gale. Isaanis ka'anii dhaabatan; warri isaan argan hundinuu guddaa in sodaatan*.

¹²Yommus raajonni lamaan sun waaqa keessaa sagalee guddaa, ?As ol kottaa!? jedhee isaan waamu tokko in dhaga'an. Isaan duumessa keessa gara waaqaatti ol in ba'an; diinonni isaaniis kana in argan*.

¹³Yeroo sanattis socho'a lafaa guddaatu ta'e; harka kudhan keessaa harki tokkon mandarichaa in jijjige. Namoonni beekamoonni kumni torba socho'a lafaa kanaan ajjeefamanii, warri hafan immoo sodaatanii, Waaqayyo gooftaa waaqaaf hooqubaa dhi'eessan*.[57]

¹⁴Wayyoon inni lammaffaan darbeera; wayyoon inni sadaffaan immoo kunoo dafee in dhufa*.[58]

¹⁵Kana booddees ergamichi torbaffaan malakata isaa afuufe. Waaqa keessaas sagaleen guddaan, ?Mootummaan biyya lafaa kan gooftaa keenyaa, kan Masiihii isaatiis ta'eera; inni immoo baraa hamma bara baraatti in mo'a? jedhu in dhaga'ame*.

¹⁶Maanguddoonni digdamii arfan warri fuula Waaqayyoo dura teessoo isaanii irra taa'an, adda isaaniitiin gombifamanii Waaqayyoof in sagadan*.

¹⁷Isaan, ?Yaa Waaqayyo gooftaa hundumaa dandeessuu, kan jirtuu, kan turtes, humna kee isa guddaa fudhattee waan mooteef, galata siif in dhi'eessina*!

¹⁸Saba Waaqayyoo warri hin ta'in dheekkamaniiru, garuu dheekkamsi kee dhufeera; yeroon warri du'an firdii argatan ga'eera; yeroon hojjetoonni kee raajonni, warri siif qulqullaa'an, warri si sodaatan xixinnaan, gurguddaanis, gatii isaanii itti argatan ga'eera; yeroon warri biyya lafaa balleessan itti balleeffamanis ga'eera? jedhan*.[59]

¹⁹Kana booddee manni qulqullummaa Waaqayyoo inni waaqa keessaa banamee, sanduuqi kakuu mana qulqullummaa isaa keessaas in argame; balaqqeessi in balaqqeessa'e, sagaleen biraa, kakawweenis wal jalaa in qaban, lafti in socho'e, cabbiin guddaanis in bu'e*.[60]