Read west central oromo MUL'ATA YOHANNIS 9 Bible Online

MUL'ATA YOHANNIS 9 - west central oromo bible

MUL'ATA YOHANNIS 9

¹Ergamaan inni shanaffaan malakata isaa in afuufe. Yommus ani urjii isa waaqa keessaa lafa dha'e tokko nan arge; urjichaafis banaan boolla lafa jalaa isa gad fagoo in kennameef*.

²Urjichi afaan boolla lafa jalaa isa gad fagoo sana bane; aarri akka aara iddoo ibidda guddaatii ka'uus boollicha keessaa in ba'e; iji biiftuu, laftis aara boollichaa irraa kan ka'e in dukkanaa'an*.

³Aaricha keessaa immoo hawaannisatu lafatti ba'e; hawaannisa kanaafis aboon in kennameef; aboon isaaniif kennameef humni torbaanqabaan lafa irraa qabu wal in fakkaata*.

⁴Isaan marga lafaa, biqiltuu, mukas utuu hin ta'in, namoota warra mallattoo Waaqayyoo addattii hin qabne duwwaa akka miidhaniif abboomaman*.

⁵Garuu namoota ajjeesuu utuu hin ta'in, ji'a shaniif dhiphisuutu isaaniif kenname; dhiphinni isaan nama irraan ga'anis, akka isa torbaanqabaan hiddee nama dhiphisuu ti.

⁶Bara sanatti namoonni du'a in barbaadu, garuu hin argatan; du'uus in hawwu, du'i immoo isaan irraa in baqata*.[47]

⁷Bifni hawaannisoota sanaa fardeen duulaaf qopheeffaman in fakkaata; wanta akka gonfoo warqee mataa irraa qabu turan. Fuulli isaanii fuula namaa in fakkaata*;

⁸rifeensi isaanii akka rifeensa mataa dubartii ti; ilkaan isaaniis akka ilkaan leencaa ti*.

⁹Waan akka maddaa sibiilaa diratanii turan; huursaan baallee isaaniis akka huursaa konkolaattota fardeeniin harkifamanii duulatti didichanii ti*.

¹⁰Eegee fi ilkee warra kan torbaanqabaa fakkaatan qabu turan; aboon isaan ittiin ji'a shaniif nama miidhan immoo eegee isaanii keessa jira*.

¹¹Isaan mootii of irraa qabu turan, inni immoo ergamaa iddoo lafa jalaa sanaa ti; maqaan ergamichaa afaan Yihudootaatti ?Abadoon?, afaan Griikiitti immoo ?Apholiyon? jedhama; innis ?Balleesso? jechuu dha.[48]

¹²Wayyoon inni duraa darbeera. Kunoo! Kana booddee wayyoon lama amma iyyuu jiru*.[49]

¹³Ergamaan inni ja'affaan malakata isaa afuufe. Yommus ani sagalee gaanfa arfan biraa ba'u nan dhaga'e; gaanfonni sunis iddoo aarsaa warqee irraa hojjetamee fuula Waaqayyoo dura jiru irra turan*.

¹⁴Sagalichi, ergamaa isa ja'affaa malakata baatu sanaan, ?Ergamoota arfan laga Efraaxiis isa guddichatti hidhaman hiiki!? jedhe*.

¹⁵Ergamoonni arfan sun in hiikaman; isaan warra namoota harka sadii keessaa harka tokko ajjeesuudhaaf sa'aatii kanaaf, guyyaa kanaaf, ji'a kanaaf, waggaa kanaaf qopheeffamanii turanii dha*.

¹⁶Lakkoobsa loltoota abboota fardeeniis nan dhaga'e; lakkoobsi isaaniis millionii dhibba lama ture.

¹⁷Yommus ani fardeen sanaa fi warra fardeen sana irra taa'an mul'atatti nan arge. Isaan maddaa sibiilaa isa diimaa, bifa bantii waaqaa, bifa dhangaggoos qabu turan. Mataan fardeen sanaas mataa leencaa in fakkaata ture; afaan isaanii keessaa immoo ibiddi, aarri, dhagaan boba'us in ba'u turan.

¹⁸Ibidda, aara, dhagaa boba'u, dha'icha sadan afaan fardeenii keessaa ba'an sanaan, namoota harka sadii keessaa harka tokkotu ajjeeffame.

¹⁹Aboon fardeen sanaas afaan isaanii keessa, eegee isaanii keessas jira; eegeen isaanii inni bofa fakkaatu mataa qaba; isaaniin namoota in miidhu*.[50]

²⁰Namoonni dha'icha sanaan utuu hin ajjeefamin hafan immoo, yaada garaa isaanii geddaratanii waaqayyolii harka isaaniitiin tolfatan irraa hin deebine; hafuura hamaadhaa fi waaqayyolii warqee irraa, meettii irraa, sibiila diimaa irraa, dhagaa irraa, muka irraas tolfamanii arguu, dhaga'uu, asii fi achi deddeebi'uus hin dandeenyeef gombifamanii sagaduu hin dhiifne*.

²¹Isaan yaada garaa isaanii geddaratanii lubbuu ajjeesuu irraa, qoricha namatti gochuu irraa, halalummaa isaanii irraa, hanna isaanii irraas hin deebine.[51]