Read xamtanga ማቲወስት ወንጌል 10 Bible Online

ማቲወስት ወንጌል 10 - xamtanga bible

ማቲወስት ወንጌል 10

¹እየሱስም ፅጭ ሊጘ ክንደጥድዛት ጝጐ ጭጝ እርኵሳን መንፈሳንድዛት እቂስ ፊስጛንስ፣ ቕጅወዝመ ፅውዘዝድቅ ቓዝጛንስ፣ ስልጣን ይዉ።

²ፅጭ ሊጘ ኻወርያታኒዝ ሽድም፣ በውገ ቢጥሮስ ይሽተው ስሙንስመ ጝዝን እንድርያስስ፣ ዘቭዲወስት ቝር ያይቈቭስመ ይዃንስስ፣

³ፊልበውስ፣ በረተለሚወስ፣ ተውማስ፣ ቀረጥ ቀቨው ዊነው ማቲወስ፣ እልፊወስት ዅር ያይቈቭ፣ ታዲወስ ይሽተው ልቭዲወስ፣

⁴ቀንየተ ስሙንስመ እየሱስት ዲቍስ ይወው ኣስቈረትቱ ይዅዳስ ጛይ።

⁵እየሱስ እንዛይ ፅጭ ሊጘ ኻወርየታንድዛት እፃቑ፤ እንት የውም ኣዙ፦ «ኣኽዛቫኒል ፊርትርነ፤ ሳምራነ ኻትመይልም ጥውትርነ፤

⁶ኽሽስ ቢቂዝጘ ድዘቍ እስራየላኒዝጐ ፊጥን።

⁷ፊትርንም፦ ‹ምጝግስተሰማያት ኣልትርኵች› ይርና ሲቭክጥን።

⁸ፅዊተቍድ ቓዝጥን፤ ክረቍድ ጒስጥን፤ ለምፃማንድ ቓዝጥን፤ ጋኒናንድ ፊስጥን፤ ኻርነይዝ ለምትርነጘ ኻርነይዝ ይውጥን።

⁹ክታኪሺዝ ዊርቅ፣ ዊንም ቍርሽ፣ ዊንም ላጥ ሳንቲማን ፃይትርነ።

¹⁰ጒደነዝም ኸረጢት፣ ቂይረነው ኣልቨ፣ ቂይረነው ፃብ፣ ግብም፣ ፃይትርነ፤ ሰራሸው እጅርዝ እልቱ ዀነው ጥውሸው የጝ።

¹¹«ላው ኻትመል ዊንም ኪውል ጥውርናንድ፣ ክታት ለምርጠ ፊቅደው እጅር ደምዝርን ጝግል ፈውጥን፤ ጘጝ ስፍረድየንት ሊቅርን ፊርትርኒስቅ ጘጝ ጝኒል ጐይጥን።

¹²ጝኒል ጥውርናንድም ዲግተ ይውጥን።

¹³ጘጝ ጝንድ ዲግተ ጥውሸው ኣቕሽ ክታዲግተድ ጝግል ችጝነ፤ ጥውሻው ኣቕሽ ግን ክታዲግተድ ክታጐ ዋጥርነ።

¹⁴ኣውማው እጅር ክታት ለምጠቅ ይሽ ዊንም ክታቃልድ ወጨቅ ይሽ፣ ጘጝ ጝኒስ ዊንም ጘጝ ኻትመይስ ፍርናንድ ክታልኲዙ ኣወረድየንት[10] ኣርግፍጥን።

¹⁵እማንዝ የኵን፤ ፍርድዝ ኰር ጚ ኻትመየንትል ችጘው ቕፃሪስ ሽ ሰደውምስመ ጐመረስትል ችጘው ቕፃርድ ቀልጡ።

¹⁶«እንወ! ክታት ቢቂዝጘ ተኵልጢዝ ማኽሊል እፃጭር፤ እንዝ ማጥን ሲቭረይዝጘ ብልኻን፣ እርግቭ ትጘ ገርኻን ኣጥን።

¹⁷እቅ ክታት ፍርድ ሸጐውል ዲቍስጝ ይውጥቍ፤ ጝታምኵራቫን ጨቨቅም ጊርፍጥቍ፤ እንዝ ማጥን ጛጊስ ጣጝቅቅጭጥን።

¹⁸ይቍዝም ቅመቲል ንጕሳኒልም ፊስጥቍ፤ እንዝም ጛጭስመ ኣኽዛቫኒዝ በዊል ይሚዝረጫን ኣትርንቅ።

¹⁹ፃይሽርናንድ፦ ‹ወረጘ ዊግትንቅ? ኣወሽንስ ዊስንቅ› የነወዝ ጨጝቅሽትርነ፤ ክትን ዊግትርነ ጥውሸው ዊገድ ኣይንድ ክታጭስ ነይሽትጡ።

²⁰ክታግል ኣቕ ዊግተውድ ሲመይ ፅበው ክታይርት መንፈስድ የጝጚ ክትንም ኣይርነቅ።

²¹«እጅር በገዘ ጝዝንት ክርጘል ዲቍስ ይውጡ፤ ኣይርም ጝዅርት ዲቍስ ይውጡ፤ ዅልም ጝታኣቅሊል ኣምፅጥቍ፤ ቍውስጥቍም።

²²ይሽⶔዝቍዝ እጝቅ እጅርዝቅ ሽክሽርነቅ ኣትርንቅ፤ ኻትሸነይል ኣሽ ፀናቐው ግን ጘጝ ቓድጡ።

²³ላው ኻትመይስ ሲድስጛንድ ላየ ኻትመል ሰይጥን፤ እማንዝ የኵን፤ እጅር ዅር ዋጥር ተርጢስቅ እስራየላነ ኻትምጥድዛት ችጝዝርን ኻታይርነቅም።

²⁴«ክንደተ ጝክንሰተይስ ዲቋውም፤ ኣገልጋይም ጝኣደረይስ ዲቋውም።

²⁵ክንደተ ጝክንሰተይዝጘ ኣቐውዝየ፣ ኣገልጋይም ጝኣደረይዝጘ ኣቐውዝየ ጝጭስ ኣቐኵ፤ ወነድየንት፦ ‹ብየልዘቩል› ይጘውዝየ ጝበተሰቭድሰ ኣወይጝ እኒስ ዲቈው ጭቓ ሽ ፊሳቍ?»

²⁶«ነስየ እቅድ ጐውትርነ፤ ሺፍንሸውድ ጋልፅሽተነው፣ ጭቭረውድም ኣርቕሽተነው እዳቓውም።

²⁷እንዝ ማጥን ያን ክታጭስ ጥመዝ ድቈውድየንት ብርኻንዝ ዊግትጥን፤ ሽዅሽዅተዝ ወሽርነውድየንትም ኣደቫቫይዝ ኣውጅጥን።

²⁸ስየት ኣሽጚ ኒፍስት ቁጥጘ ቻላቍ እቅድዛት ጐውትርነ፤ ኽሽስ ኒፍስዝመ ስየዝ ገኻነመሳትዝ ድስጠ ቸለው ኣምላክድየንት ጐውትጥን።

²⁹ሊጘ መልቍ ዚልቅድ ኣኰ ሳንቲምዝ ቅይሽጘኵ ኣየውቀ? ኣነጚ ጛጊስ ላይሸን እኳ ሲመይ ፅበው ክታይርድ ፊቅዲጝቀ ሊቭር እዳቓይም።

³⁰ክትንስ ክታውሪዙ ፅቭቀድ እኳ እጊተው የጝ።

³¹ነስየ ጐውትርነ! ንቕፀቍ መልቍ ዚልቂስ ክትን ዲቍርነቅ የጝ።

³²«እንዝ ማጥን እቀ በዊል ይጭስ ሚዝርደዊዝቅ ያን ቈሽ ሲመይ ፅበው ይርት በዊል ጝጭስ ሚዝርድጭር።

³³እቀ በዊል ይት ኻድየዊዝቅ ቈሽ ያንም ሲመይ ፅበው ይርት በዊል ጝት ኻዲጭር።

³⁴«ያን ተጠውድ፣ ዝቨትል ዲግተ ነስጨ ፃቭርን ኻስቭትርነ፤ ያን ተጠውድ ሰይፍ ነስጨጚ ዲግተ ነስጨም ኣየው።

³⁵ያን ተጠውድ ጊር ዅር ጚርቲስ ቲዝጨ፣ ምጂ ዅረትም ጝርኘቲስ ቲዝጨ፣ ስሪትም ጝርጣስንቲስ ቲዝጨ፣ የጝ።

³⁶እጅርዝ ጝፃለትድ፣ በገዘ ጝበተሰቭድ ኣጥቍ።

³⁷ይሽ ጚርት ዊንም ጝኘት ቀነውድቅ ይው ኣጠ ጥውሻውም፤ ይሽ ጝዅርት ዊንም ጝቝረት ቀነውድቅ ይው ኣጠ ጥውሻውም።

³⁸ጝሚስቅልድየንት መውር ይግርገይል ቲክናው እጅርድቅ ይው ኣጠ ጥውሻውም።

³⁹ጝርዅየሸንት ቓዝጠ በነው እጅርድቅ ጝርት ድሰኵ፤ ጝርዅየሸንት ይማጥን ድሰው እጅርድ ግን ጝርት ቓዘኵ።

⁴⁰«ክታት ለምረውድ ይት ለምረኵ፤ ይት ለምረውድም ይት እፃቐው ኣይርት ለምረኵ።

⁴¹ነቭይድየንት ነቭይዝ ሽ ለምረውድቅ፣ ነቭዪዙ ወየድ ለምርጡ፤ ፃድቅድየንት ፃድቅዝ ሽ ለምረውድቅ፣ ፃድቂዙ ወየድየንት ለምርጡ።

⁴²እማንዝ የኵን! ኣውማው እጅር እንዛይ መልቊስ ላውድየንት ይክንደተ ኣቑዝ ላው ሽቅነ ቓዝቕዘቍ ኣቝ ይውሽ ጝወየድ ባውም።»