Read xamtanga ማቲወስት ወንጌል 11 Bible Online

ማቲወስት ወንጌል 11 - xamtanga bible

ማቲወስት ወንጌል 11

¹እየሱስም ፅጭ ሊጘ ክንደጢዝ እኒን ቃውትድ ይው ኻተት ግረ ጘጝ ስፍረድ በር ጝጣቂል ችጝሸቍ ኻትምጢል ሲቭክጠ፣ ክንስጠም ፊሩ።

²ይዃንስም ወኽኒ ጝንል ፅባ ክርስቶስ ሰራሸው ሰቭድ ወሻንስቅ ጝክንደጢስ ሊጘድ ጝጐ እፃቕ

³«ተርጡ ይሽትር ሊሚድሽረርድ ክትመ? ዊንስ ላየ ሊሚድነ?» የው ዋቕሩ።

⁴እየሱስም፦ «ፊትርን ቓልድርነዊዝመ ወሽርነዊዝ እጝቅትቅ ይዃንስስ ድቍጥን።

⁵እንወ ኻርብድ ቓልጘኵ፤ ኻካዛንድ ተግርጘኵ፤ ለምፃማንድ ቓድጘኵ፤ ዲጝቋራንድ ወሽጘኵ፤ ክረቍድ ጕጘኵ፤ ድኺዝም ወንጌል ሲቭክሸኵ።

⁶ይቍዝ ፅጋራው እጅር ቀቫሸው የጝ» ዩ።

⁷ይዃንስቲስ እፃሸቍድ ፊርጘት ግረ እየሱስ ኽዝቪዝ ይዃንስት ማጥን እንት ያ ዊግትጠ ኪርሙ፦ «ወረጘ ቓልትርነ በራኸይል ፍርኑ? ፊግየዝ ዊዝውሽተው ኣቲነ ቓልትርነመ?

⁸ዊንስ ወረጘ ቓልትርነ ፍርኑ? ሸግጥ ኣልብ ሲረው እጅር ቓልትርነመ? ሸግጥ ኣልብ ሲረቍ እቅመ ንጕሳነ ጝንጢል እኵ።

⁹እደስለ ወረጘ ቓልትርነ ፍርኑ? ነቭይ ቓልትርነመ? የይ! ነቭዪስም ዲቈውድየንት ቓልትርነ የጝ የኵን።

¹⁰‹እንወ ክበው በዊል ፃጛ ክጒደነድየንት ኣስለው ይእፃሸረድ ክበዊል እፃጭር› ይሽት ፃፍሽተውድ ጝማጥን የጝ።

¹¹እማንዝ የኵን፤ እቍኒስ እዅርሸቊዝ ማኽሊስ ጣምቀተ ይዃንስት ዲቈው ጕየውም፤ ምጝግስተሰማያትስ ግን እጝቂስቅ እጥንድ ጝጊስ ዲቍጡ።

¹²ጣምቀተ ይዃንስት ዚምኒስ ኪርም ነኳን ኣሽ ምጝግስተሰማያት ጭቕጘ ፈራቐች፤ በርታቐቍ እቅም ጝርግል ጥውጥቍ።

¹³ነቭያታኒዝመ ሙሴት ኽጊዝ እጝቅቅ ይዃንስትል ኣሽ ትንቪት ዊግትጝኵ።

¹⁴ነስየ ለምርትርነ በንርነውዝየ፦ ‹ተርጡ› ይሽተው ይልያስድ እኒን ይዃንስ የጝ።

¹⁵ወሸው ቀርዝ ፃየውድቅ ወሽነ።

¹⁶እን ዅለድ ወረጘዝ ተክዝጭር? ኣሪ ስፍረይል ጐይጝ ጝታፃምጥድዛት ጭጝጛ

¹⁷‹ኣቲነ ዋስኑን፤ ክትን ግን ዚቪርነቅም፤ ሊዝም ሊስኑን፤ ክትን ግን ሊዚርነቅም› የቍ እፈርድዛት ተክጘኵ።

¹⁸ይዃንስ ዂጝቀ ዝዪጝቀ ተራን፦ ‹እን እጅርድ ጋኒንዝ ፃይሸው የጝ› ይጘኵ።

¹⁹እጅር ዅር ቈሽ ዃ ዝያ ተራን፦ ‹እንስ ዀይረ፣ ዝየተ፣ ቀረጥ ቀቨቊዝመ ኽጥያትኝጢዝ ወደጅ የጝ› ይጘኵ። ጥቨቭት ትክክልነይድ ግን ጝርሰቪዝ ኣርቕሽትች።»

²⁰ኣይንድ እየሱስ ንቕፀቍ ታምራን ፃቨቍ ኻጥምጥድዛይ ንስኻ ጥዊየቍ ኣጙዝ እንት ያ ዊቅስጠ ኪርሙ፦

²¹«ኰራዚስ ወየው! በተሰይደስ ወየው! ክታግል ፃቭሽተቍ ታምራንድ ጢረውስስመ ሲዱነስ ፃቭሽትጝ ዊንጛን፣ ጛይ ኻትምጢዝ እቅድ ግምር ሲርጝ ፃብረልም ጐይጝ ገነ በውገ ንስኻ ጥውጥጘ ዊን።

²²እንዝ ማጥን ፍርድዝ ኰር ክታግል ችጘው ቕፃሪስ ሽ ሰደውምስመ ጐመረስትል ችጘው ቕፃርድ ቀልጡ የኵን።

²³እፈ ቅፍርናዀም! ክትምመ ሲመይ ኣሽ ንየስ ንየስ ይሩ? ሲወል ኣሽ ጊምትር፤ ክግል ፃቭሸውቍ ታምራንድ ሰደውምስ ፃቭሽትጝ ዊንጛን ሰደውም ነኳን ኣሽ ድዚጝቀ ዊንተ ዊንች።

²⁴እንዝ ማጥን ፍርድዝ ኰር ክግል ችጘው ቕፃሪስ ሽ ሰደውምትል ችጘው ቕፃርድ ቀልጡ የኵን።»

²⁵እየሱስም ኣይንድ፦ «ሲመይሰመ ዝቨዝ ኣደረ ኣረር ኣየወ! እኒንት ጥቨቭኝጢስ፣ ኣርቐቲስም ሲውርድር ኣርቓቊዝ ጋልፅራንስቅ ሚዝየንዘኵን።

²⁶የይ፤ ኣየወ! እኒንት ፃቭተ ክቀሰው ፍቃድድ ኣቕኩ።

²⁷ይር እጝቅትቅ ይጭስ ነይኩ፤ ኣይር ኣየውዝየ ዅር ኣው ኣቐጘ ኣርቐው ኣውማውም እጀው። እኒዝጘም ዅር ኣየውዝየ ዅርም ጝጭስ ጋልፅጠ በነውድ ኣየውዝየ ኣይርት ኣርቐው ኣውማውም እጀው።

²⁸እፈ ዝላቕርነቅ፣ ፅጐወው መውርዝም ፅጐውሽርነቅ እጝቅ ክታትርነ! ይጐ ላቝጥን፤ ያንም ክታት ፈውስጭር።

²⁹ይሚዝቭድ ክታዲጊል መውጥን፤ ይጊስም ክንድጥን፤ ያን ገርኽ የጝ፤ ይእዘንድም ትዅት የጝ፤ ክታኒፍሲዝም ፈውጘ ችጝትርንቅ።

³⁰ይሚዝቭድ ፅጐዋው፣ ይመውርድም ቀለው የጝ» ዩ።