Read xamtanga ማቲወስት ወንጌል 12 Bible Online

ማቲወስት ወንጌል 12 - xamtanga bible

ማቲወስት ወንጌል 12

¹ኣይንድ እየሱስ ቅዳምሲንቭት ግርየዝ ቺዝጝ ማኽልዝ ዲቋ ዊኑ፤ ጝክንደጥድም ግድርድጝ ዊንጛንስቅ ዚሩ ሽውር ቅጣጥጛ ዅጥጘ ኪርም።

²ፈሪሳንድም እኒንት ቓልጛንድ፦ «ቓል! ክክንደጥድ ቅዳምሲንቭት ግርየዝ ፃቭጥነ ጥውሻው ሰቭ ሰራሽጛንድ» ይ።

³እየሱስም እንት ዩ፦ «ዳዊትስመ ጝጅቅ ዊነቍ እቂዝ ግድርድጛንድ ዳዊት ወረጘ ፃቨጘ ኣንቭቪርነቅመ?

⁴እደረት መቅደሲል ጥው ካኽነጣኒዝጚ ጝጭስም ኣነ ጝጅቅ ዊነቍ እቂዝ ዅጥጘ ጥውሻው ቀድስሽተው ኽቭስትድየንት ዅ።

⁵ዊንስ ካኽነጣንድዛይ ቅዳምሲንቭትት ሸርጝ መቅደሲዝ ኣቒል ሰቭ ሰራሽጛንድ ጛጭስ በደል ኣቓው ኣቐጘ ሙሴት ኽጊስ ኣንቭቪርነቅመ?

⁶ዊገድ ግን ክታት፦ ‹መቅደሲስ ዲቈው እንል እኩ› የኵን።

⁷ቈሽም፦ ‹ያን ቀነውድ ስቝርትጚ ምስዋይትም ኣየው› ይሽት ፃፍሸውድየንት ኣስክስርናን እንዛይ ኽጥያት እጀቍድዛት ፊርድትርነም ዊኒርነቅ።

⁸ምላሰንድም እጅር ዅር ቅዳምሲንቭትት ጕርየ የጝ።»

⁹እየሱስም ጘጝ ስፍረይስ ጕ ጝታምኵራቫኒል ጥዉ።

¹⁰ጝግልም ጝናንድ ሲለው ላው እጅር ዊኑ፤ እየሱስት ኪስጥጘ ስቨቭ ደምዘቍ እቅም፦ «ቅዳምሲንቭት ግርየዝ ፅውዝጅነ ቓዘነው ፊቅድሸኵመ?» ይጝ ዋቕር።

¹¹ጘጝም፦ «ክታጊስ ቢገ ፃየው ላው እጅር ጝቢገድ ቅዳምሲንቭት ግርየዝ ቢል ጥዋን ቢⶔስ ጒዝ ፊሳውመ?

¹²እደስለ ቢገዝ ሽመ እጅር ዲቋዋ? ኣቓንስቅም ቅዳምሲንቭት ግርየዝ ቀሰው ሰቭ ሰራሸነው ፊቅድሸው የጝ» ዩ።

¹³እግረም እድየን ፅውዝጅነድየንት፦ «ክናንድ ዘርጋቕ!» ዩ፤ ጘጝም ዘርጋቑ፤ ኣይንድም ጝናንድ ቓድ ልክ ትኽንው ሊጘትረ ናኒዝጘ ኣቑ።

¹⁴ፊሪሳንድ ግን ጝጊስ ፍጝ እየሱስት ኣወሽጝ ቁጥጘጘ ማኽርሽ።

¹⁵እየሱስ ግን ጝታሲረድየንት ኣርቓንስቅ ጝጊስ ላየ ስፍረል ገለል ዩ፤ ንቕፀቍ እቅም ጝት ቲክንጝ ፊር፤ ጘጝም ፅውዝጅንጥንድ እጝቅትቅ ቓዙ።

¹⁶እቅድዛትም ጘጝ ኣው ኣቐጘ ኣውማውስቅ ድቋይጘጘ ጣጝቅቅሱ።

¹⁷እንም ኣቐውድ ነቭይ ይሳያስ፦

¹⁸«እንወ ያን ማርፀው፣ ጝቍዝም ዲስ የው፣ ይቀነው ኣገልጋይድ እኒን የጝ፤ ይመንፈስድየንት ጝዲጊል ፃቭጭር፤ ጘጝም ኣኽዛቫኒዝቅ ጭቅ የው ፍርድ ኣውጅጡ።

¹⁹ተጨቃጭቅሻውም፤ ቓፃውምም፤ ጝድመድም ኣርወይል ወይሽታውም።

²⁰ጭቅ የው ፍርድ ኻቕ ፍጢስቅ፣ ቃጥቅጥሸው ኣቲነ እኳ ኪላውም፤ ጥየው ጥዋፊዙ ክርም ስሳውም።

²¹ኣኽዛቫንድቅ ጝሽዝ ቲስፈ ፃቭጥቍ» የው ዊግተው ትንቢትድ ፋፅምሻንስ የጝ።

²²እንዝ ግረ እቅ ጋኒን ጨው ላው ኻርቨ፣ ድደም ኣቐው እጅር ፃይጝ እየሱስትጐ ነስ፤ እየሱስም ጝት ቓዙ፤ እጅርድም ኣይንድ ዊግተነውዘመ ቓለነውዝ ቸሉ።

²³ኽዝቭድም እጝቅቅ ጊርምሽ፦ «እኒን ዳዊትት ዅርመ ኣጢ?» ዩ።

²⁴ፈሪሳንድ ግን እኒንት ወሽጛንድ፦ «ጘጝ፦ ‹ብየልዘቩል› የነው ጋኒናነ ኻልቀይዝ ኣየውዝየ ጋኒናን ፊሳውም» ይ።

²⁵እየሱስም ጝታኻሰቭድ ኣርቕ እንት ዩ፦ «ጝስመ ጝስ ቲተቲተው ምጝግስትድቅ ሊቨኵ። እኒዝጘም ጝስመ ጝስ ቲተቲተው ኻትመዝመ በተሰቭዝ ፀናቓውም።

²⁶ሲጣንም ሲጣንድ ፊሰውዝየ ጝስመ ጝስ ቲተቲቱ የነት የጝ፤ እደስለ ጝምግስትድ ኣወይ የጝ ፀናቕ ችብርጠ ቸለውድ?

²⁷ያን ጋኒናንድ ፊሰውድ ብየልዘቩልዝ ኣቐውዝየ ክታእቅድ ወረጘዝ የጝ ፊስጘውድ? እንዝ ማጥን ጛይ ክታት ፊርድጥቍ።

²⁸ያን ጋኒናንድ ፊሰውድ እደረት መንፈስዝ ኣቐውዝየ ግን እደረት ምጝግስትየን ክታግል ችጝርኵች የነት የጝ።

²⁹ዊንስ ላው እጅር ኻይሉ እጅርዝ ጝኒል ጥው ጝንብርትድየንት ዚርፍጠ በናን፣ በውገ እድየን ኻይሉ እጅርድየንት እፅቊየውዝየ ኣወሽ የጝ ዚርፍጠ ቸለውድ? እድ ኻይሉድየንት እፅቈውዝየ ግን ዚርፈነው ቸልጡ።

³⁰ይጅቅ ኣቒየውድቅ ይት ተቃውምሸኵ፤ ይጅቅ ኣኽቫውድም ቢትነኵ።

³¹እንዝ ማጥን እጅር ሰራሸው ኽጥያትድም ኣነ ዛንድቅ ይቅር ይሽትጡ፤ መንፈስ ቅዱስትል ዛንዙ ዊገ ዊግተው እጅር ግን ጝኽጥያትድ ይቅር ይሽታውም፤ የኵን።

³²እጅር ዅርትል ዛንዙ ዊገ ዊግተው እጅርድቅ ጝበደልድ ይቅር ይሽትጡ፤ መንፈስ ቅዱስትል ዛንዙ ዊገ ዊግተው እጅርድቅ ግን እን ኣልሚዝም ኣነ ተረው ኣልሚዝቅ ጝበደልድ ይቅር ይሽታውም።

³³«ዘፍ እጝቅ ኣረሰውድ ጝፍረይዝ ኣቓንስቅ፣ ቀሰው ፍረ ችጝርናንስ ማጥን ቀሰው ዘፍ ፃይርነቅ ኣጥን፤ ጭቓ ዘፍ ፃይርነቅ ኣቕርንሽ ግን ጝፍረድም ጭቓ ኣጡ።

³⁴እፈ ሲቭረይዝ ቝር ክታትርነ! ክትን ጭቕ ኣቕርን ፅብርና ኣወሽርን ቀሰው ዊገ ዊግተነው ቸልትርና? እጅር ጝጊዝዊዝ እቻቕ ቲርፈውድየንት የጝ ጝምቸይዝ ዊግተውድ።

³⁵ቀሰው እጅር ጝጊዝዊዝ እቻዘው ቀሰው ዊገይስ ቀሰቍ ገቭ ፊሰኵ፤ ጭቓ እጅር ቈሽ ጝጊዝዊዝ እቻዘው ጭቓ ዊገይስ ጭቕ ገቭ ፊሰኵ።

³⁶እማንዝ የኵን፤ እቅ ግድ እጀው ዝም ይጝ ዊግትጘው ዊገይዝቅ ፍርድዝ ኰር ዋቕርሽጥቍ።

³⁷ምላሰንድም ክቃሊዝቍዝ እማንተው ኣተር፤ ክቃሊዝቍዝም ፊርድሽትር።»

³⁸ኣይንድ ላው ላው ወሪትት ኽግ ክንሰጥዝመ ፈሪሳንዝ እየሱስት፦ «ክንሰተወ! ታምርዙ ምልክት ፃቭራንድ ቓልነ በንነኵን!» ይ።

³⁹ጘጝም ዊስ እንት ዩ፦ «ጭቓ ሸርሙጠ ዅለድ ምልክት ዋቕረኵ፤ ዊገድ ግን የውናስት ምልክትነይድ ኣየውዝየ ላየ ምልክት ይውሽታውም።

⁴⁰የውናስ ኽየው ኻዘዙ ጊዙ ኣቒል ሻቘ ግርቅዝመ ሻቘ ጨንዝ ሳብጠጘ፣ እኒዝጘ ቈሽ እጅር ዅርም መቃቭር ኣቒል ሻቘ ግርቅዝመ ሻቘ ጨንዝ ሳብጡ።

⁴¹ነነውየት እቅድ ፍርድዝ ኰር እንዚምኒዙ ዅለይጅቅ ጕጝ ጛግል ፊርድጥቍ፤ ምላሰንድም ነነውየት እቅድ የውናስት ስቭክትድ ወሽጝ ንስኻ ጥውጝኵ። ነን ግን የውናስቲስ ዲቈው እንል እኩ።

⁴²ደቩቭት ንግስትየን ፍርድዝ ኰር እን ዅለይጅቅ ጕር ጛግል ፊርድቲ፤ ምላሰንድም ጚ ሰለሙንት ጥቨቭድ ወሽተ ዝቨዝ ደርቸይስ ጕር ተትርኵች፤ ዊገድ ግን እንወ! ሰለሙንቲስ ዲቈው እንል እኩ።

⁴³«እርኵስ መንፈስ እጅሪስ ፋንድ ጝፈወነ ስፍረ ደምዝጠ ኣቝ እጀው ይዘው ስፍረዝ ጅልዋ ዲቈኵ፤ በነው ስፍረድ ግን ችጛውም።

⁴⁴ኣይንድም፦ ‹በውገ ዊነው ይጝኒል ዋጥር ፊጨ› የኵ፤ ዋጥር ተራንድም ጝንድ ባደው ኣቕ ጂዚት ዊር የው ኣስልሽ ችጘኵ።

⁴⁵እንዝ ግረ ፊር ላጥ ጝጊስ ወሰቍ ጭቕ ላጝጠ ጋኒናን ፃይ ተረኵ፤ ጛይም በውረ ጋኒንድ ዊነው እጅሪል ጥውጝ ጐይጘኵ፤ ኣቓንስቅም እድ እጅሪዙ ፅብጘድ በውገትዊስ እግርገትውድ ወሰው ኣቐኵ፤ እኒን ጭቓ ዅለይልም እኒዝጘ ኣጡ።»

⁴⁶እየሱስም ኽዝቪዝ ገነ ዊግታ ሲጝቀ ጝኘስመ ጝፅንስ ጝት ገቭስጥጘ በንጝ ቢዘይል ችብርጝ ዊን።

⁴⁷ጝግል ዊነቊስም ላውድ፦ «እንወ! ክኘስመ ክፅንስ ክት ገቭስጥጘ በንጝ ቢዘይል ችብርጝኵ» ዩ።

⁴⁸ጘጝ ግን፦ «ይኘየን ኣው ጚ? ይፅንድስ ኣውታይ ጛይ?» ዩ።

⁴⁹ጝናኒዚም ጝክንደጢዝጐ ሚርያ፦ «ይኘስመ ይፅንስ እንወ! እንዛይ ጛይ።

⁵⁰ሲመይ ፅበው ይርት ፍቃድድ ፋፅመውድቅ ይዝንም፣ ይስንም፣ ይኘም የጝ» ዩ።