Read xamtanga ማቲወስት ወንጌል 13 Bible Online

ማቲወስት ወንጌል 13 - xamtanga bible

ማቲወስት ወንጌል 13

¹እየሱስም ኣይንት ግርየይዝ ጝኒስ ፍ ባኽሪዝ ጋቢል ጐዩ።

²ንቕፀው ኽዝቭም ተር ጝት ኪባንስቅ ታኰል ፍ ጐዩ፤ ኽዝቭድም ባኽሪዝ ደዪል ችብር ዊኑ።

³ጘጝም ንቕፀቍ ዊቅ ተከዝ እንት ያ ድቍጠ ኪርሙ፦ «እንወ ኣርሸ ዚረ ፊዝጠ ፊሩ።

⁴ፊዛንድም ላው ላው ዚረድ ጒደን ደዪል ሊቩ፤ ዚልቅም ተርጝ ሊቅምጝ ዅ።

⁵ላው ላው ዚረድም እቀጘ ብጥ እጀው ፃፀይል ሊቩ፤ ዝቨድም ሲፍ የው ኣቓንስቅ በውዝ ቢቍሉ።

⁶ኣነጚ ኰረድ ፋንድ ፃምልዉ፤ ስርም ስቪየው ኣቓንስቅ ይዙ።

⁷ላው ላው ዚረድ ቈሽ ኣምቃነው ቍጥቋጥ ማኽሊል ሊቩ፤ ኣምቃነው ቍጥቋጠድም ሊግዝ ቢቈለድየንት ኻንቕ እዳዙ።

⁸ላው ላው ዚረድ ቀሰው ዝቨይል ሊቭ ቢቍሉ፤ ፍርም ፍርዙ፤ ላውድ ላ ፍር፣ ላውድ ዋልጥርጝን ፍር፣ ላውድ ሰውርጝን ፍር፣ ይዉ።

⁹ወሸው ቀርዝ ፃየውድቅ ወሽነ!»

¹⁰እንዝ ግረ ጝክንደጥድ ጝጐ ኣልትጝ፦ «ውር ቃጥ የጝ ኽዝቪዝ ተከዝ ዊግትረውድ?» ይ።

¹¹እየሱስም እንት ዩ፦ «ክታጭስ ምጝግስተሰማያትት ምስጢርድ ኣርቐነው ነይሽትኩ፤ ጛጭስ ግን ይውሽቲየውም።

¹²ፃየው እጅርዝ ቈሺት ይውሽተኵ፤ ጝጭስም ንቕፀኵ፤ እጀው እጅሪስ ግን ፃይ ዊነውድየንት እኳ ፊስሽተኵ።

¹³እንዝ ማጥን ቓልጛ ቓላቊ ኣጛንስቅ፣ ወሽጛም ወሻቊ ኣጛንስቅ፣ ዊንም ኣስክሳቊ ኣጛንስቅ፣ ጛጭስ ተከዝ ድቈኵን።

¹⁴እንዝም ነቭይ ይሳያስ፦ ‹ወሸነውድስ ወሽርነኵ፤ ዊገድ ግን ኣስክሳይርነቅም፤ ቓለነውድም ቓልድርነኵ፤ ዊገድ ግን ልብ ያይርነቅም።

¹⁵ምላሰንድም እኒን ኽዝቪዝ እዘንድ ዲንድንኩ፤ ጝቀርዝድም ወሻውም፤ ቓላየጘም ጝእልጣንድ ፅምርኩ፤ እኒን ኣየው ኣቓንስ ጝእሊዝ ቓል፣ ጝቀርዚዝም ወሽ፣ ጝእዘኒዝም ኣስክስ፣ ይጐ ዋጥርጠ ዊኑ፤ ያንም ጝት ቓዝጨ ዊኑን› የው ዊግተውድ ፋፅምሽጡ።

¹⁶ክትን ግን ክታእልጣንድ ቓለቍ ኣጛንስቅ፣ ክታቀርዝጣንድም ወሸቍ ኣጛንስቅ፣ ቀቫሽርነቅ የጝ።

¹⁷እማንዝ የኵን፤ ንቕፀቍ ነቭያታንዝመ ፃድቃንዝ ክትን ቓልድርነውድየንት ቓልጥጘ በንጝ ዊን፤ ዊገድ ግን ቓሊየቍም፤ ክትን ወሽርነውድየንትም ወሽጥጘ በንጝ ዊን፤ ዊገድ ግን ወሺየቍም።

¹⁸«ነስየ ክትን ዚረ ፊዘተይዙ ተከድ ወረጘ ኣቐጘ ወጭጥን።

¹⁹እደረት ምጝግስቲዙ ቃልድየንት ወሽ በር ልብታው እጅሪስቅ ሲጣን ተር ጝእዘኒል ፊተው ቃልድየንት ፊሰኵ፤ ጒደን ደዪል ሊቨው ዚረድ ቓሊሰውድ እኒንት የጝ።

²⁰ፃፀይል ሊቨው ዚረድ ቓሊሰውድ ቈሽ፣ ቃልድየንት ወሽ በውዝ ዲስተዝ ለምረው እጅርድየንት የጝ።

²¹ዊገድ ግን ስር ሲቪየው ኣቓንስቅ ንቕፀቍ ኰር ዊናውም፤ ቃሊዝ ምላሰንዝ ሚከረ ዊንም ስድት ተራንድ በውዝ ፅጋረኵ።

²²ኣምቃነው ቍጥቋጠ ማኽሊል ሊቨውድ ቓሊሰውድ ቈሽ ቃልድየንት እልቲዝ ወሸው እጅርድየንት የጝ፤ ኣነጚ እን ኣልሚዙ ኻሰቭዝመ ፃጀዙ ምርቕፀዝ ጝእዘኒል ጥወው ቃልድየንት ኻንቕ ፃያንስቅ ፍር እጀው እዳቐኵ።

²³ቀሰው ዝቨይል ሊቨውድ ቓሊሰውድ ቈሽ፣ ቃልድየንት ወሽ ኣስክሰው እጅርድየንት የጝ፤ ጘጝ ፍር ፍርዘኵ፤ ላውድ ላ፣ ላውድ ዋልጥርጝን፣ ላውድ ሰውርጝን፣ ፍር ይወኵ።»

²⁴እየሱስም ላየ ተከ እንት የው ዊግቱ፦ «ምጝግስተሰማያት ጝቺዝጚል ቀሰው ዚረ ፊዘው እጅርድ ተከች።

²⁵ዊገድ ግን እጅር እጝቅ ኽርያንድ ፃለት ተር ፊተው ዚርወይዝ ዲጊል እጝክርዳድ ፊዝ ፊሩ።

²⁶ዚርወድም ቢቍል ፍራንድ እጝክርዳደድም ኣይንድ እትሉ።

²⁷ቺዝጝ ወነይዝ ኣገልጋያንድም ጝጐ ኣልትጝ፦ ‹ኣደረወ! ክቺዝጚል ቀሰው ዚረ ኣየውቀ ፊዝር ዊንደውድ? እደስለ እጝክርዳደድ ኣዊስ ተሩ?› ይ።

²⁸ጘጝም፦ ‹እኒንት ፃቨውድ ፃለት የጝ› ዩ፤ ጝኣገልጋያንድም፦ ‹እደስለ ፊርን እጝክርዳደድ ብቝዝነ በንረኵመ?› ይ።

²⁹ጘጝ ግን፦ ‹ኣቓውም! እጝክርዳደድ ብቝዝርናንድ ዚርወድም ላብጠ ብቝዝርነኵ።

³⁰በጥን ማፅወይል ኣሽ ላብጠ ሊግዝጝነ፤ ማፅወይዝ ኰር ኣይረቍድዛት፦ <በዊል እጝክርዳደድ ብቝዝጥን፤ ልየዝ ቃጥልሻንስም ጝለ ሊድስርና እፁጥን፤ ዚርወድ ግን ኣኽቭርን ይቅፋነይል ድውጥን> ይጭር› ዩ።»

³¹ላየ ተከም እንት የው ዊግቱ፦ «ምጝግስተሰማያት ላው እጅር ፊስ ጝቺዝጚል ፊዘይ ስናፍጭ ዚረት ተከች።

³²ጚ ዚረይስቅ መልወ ጚ፤ ሊግዝራንድ ግን ኣታክልታኒስቅ ዲቍረይ ዘፍ ኣቐች፤ ዚልቅም ጝርቅርንጫፋኒል ጝታጕጂድ ተስጝ ሲፍርጘኵ።»

³³ነንም ላየ ተከ እንት የው ዊግቱ፦ «ምጝግስተሰማያት ላይ እውነ ፊስር ሸውን ሚክረነ ግዘን ጅቅ ፃቭር ምጭስረው ሚጨድ ተከች፤ ምጨድም ምኰተድየንትቅ ምጭትጠ ፃቩ።»

³⁴እየሱስም እኒንትቅ ኽዝቪዝ ተከዝ ዊግቱ፤ ተከ እጀው ግን ውረውረም ዊግቲየው።

³⁵እንም ነቭይድ፦ «ይዊገድ ተከዝ ጋልፅጭር፤ ኣልም ፋጥርሸት ኪርም ሲውርሸውድየንትም ዊግጭር» የው ዊግተውድ ፋፅምሻንስ የጝ።

³⁶እንዝ ግረ ኽዝቭድ በር ጝን ኣቒ ጥዉ፤ ጝክንደጥድም ጝጐ ኣልትጝ፦ «ቺዝጚዙ እጝክርዳደይዝ ተከድ ይናጭስ ቲርጕም» ይ።

³⁷ጘጝም እንት ዩ፦ «ቀሰው ዚረድ ፊዘውድ እጅር ዅር የጝ።

³⁸ቺዝጝድም እን ኣልምድ የጝ፤ ቀሰቍ ዚረድም እደረት ምጝግስቲዝ ቝር ጛይ፤ እጝክርዳድድም ሲጣኒዝ ቝር ጛይ።

³⁹እጝክርዳድ ፊዘው ፃለትድም ዳቪለውስ የጝ፤ ማፅወድም እን ኣልሚዝ ኻትሸነድ የጝ፤ ኣይረቍድም መላካንድ ጛይ።

⁴⁰ነስየ እጝክርዳድ ብቚት ልየይል ቃጥልሻንትጘ እን ኣልሚዙ ኻትሸነይዝም ጘጝት ኣጡ።

⁴¹ኣይንድ እጅር ዅር ጝመላካንድዛት እፃጡ፤ ጛይም ኽጥያትዝ ምላሰን ኣቐቊዝመ ጭቓ ሰቭ ሰራሸቊዝዛት እጝቅትቅ ሊቅምጝ ጝምጝግስቲስ ፊስጥቍ።

⁴²ኻዊተው ኽየው ልጂልም ማልጥቍ፤ ጝግልም ሊዝዝመ እርቍጣን ገጫዘው ሚከረዝ ኣጡ።

⁴³ፃድቃን ግን ጝታይርት ምጝግስቲዝ ኰረይዝጘ ኣቭርኽጥቍ፤ ወሸው ቀርዝ ፃየውድቅ ወሽነ።»

⁴⁴ቈሽም፦ «ምጝግስተሰማያት ቺዝጝ ማኽሊል ጭቭሽተው ኻፍት ተከች፤ ላው እጅርም እኒን ኻፍጥድየንት ችጝ በር ዊስ ጭቭሱ፤ ዲስተዝ ክራንስቅም ጝፃየውድየንትቅ ቂ እድየን ቺዝጝድየንት ጅቩ።

⁴⁵ቈሽም፦ «ምጝግስተሰማያት ቀሰው እቍ ደምዘው ንየረ ተከች።

⁴⁶ጝወየድ ጭቕጘ ኪብረው እቍ ችጛንድም ፊር ጝፃየውድየንትቅ ቂ እድየን እቍድየንት ጅቩ።

⁴⁷ቈሽም፦ «ምጝግስተሰማያት ባኽር ኣቒል ማልኑ ኻዘዝ ኣይንትድቅ ጥቅል ፃየው መረቭድየንት ተከች።

⁴⁸ኻዘ ፃውረጥድም መረብድየን እቻቓንድ ዊትርጝ ባኽር ደዪል ፊስ፤ ጝግልም ጐይጝ ቀሰው ቀሰው ኻዘድየንት ማርፅጛ ክቪል እቕር፤ ኻቨረ ኻቨረድየንት ግን እለ ማል።

⁴⁹ኣልሚዙ ኻትሸነይዝም ጘጝት ኣጡ፤ መላካንድ ተርጝ ጭቕድዛት ፃድቃኒስ ቲዝጝ፣

⁵⁰ኻዊተው ኽየው ልጂል ማልጥቍ፤ ጝጊስም ሊዝዝመ እርቍጣን ገጫዘው ሚከረዝ ኣጡ።»

⁵¹እየሱስም፦ «እኒንትቅ ኣስክስርኑመ?» የው ዋቕሩ፤ ጛይም፦ «የያ» ይ።

⁵²ጘጝም፦ «እንዝ ማጥን ምጝግስተሰማያትት ምስጢርድ ተረድሸው ወሪትት ኽግ ክንሰተድቅ ጝጐዝ ጝኒስ ኣይር ጐዘይዝመ ኣርጐው ጐዘይዝ ፊሰው ንቭርት ጕርየድየንት ተከኵ» ዩ።

⁵³እየሱስም እንዛይ ተከጥድ ዊግት ኻተት ግረ ጘጝ ስፍረይስ ጕ ፊሩ።

⁵⁴ጝኻግር ናዝሪት ፊር ጛይ ጊርምሽጥጚስቅ ጝታምኵራቫኒል ክንሳ ዊኑ፤ ጝት ወሸቍ እቅድም እጝቅ፦ «እን እጅርድ እኒን ጥቨቪዝመ እኒንት ፃቨነው ኻይልዝ ኣዊስ ችጙ?

⁵⁵እኒን ፃርቨተይዝ ዅርድ ኣየውቀ? ጝኘየንስ ማርያም የነይሸን ኣይረይመ? ጝፅንድስ ያይቈቭ፣ የውሳ፣ ስሙን፣ ይዅዳ ኣየቍመ?

⁵⁶እቍን ጝፅንድስ ይናጅቅ ፅበቍ ኣየቍመ? እደስለ እንቝጠ ጥቨቭ ኣዊስ ችጙ?» ይጛ ዊን።

⁵⁷እንዝም ፅጋርጝ ጝት ለምሪጝቀ እዳቕ፤ እየሱስ ግን፦ «ነቭይ በገዘ ጝኻግሪስ ጝበተሰቪስም ጭቝ የጝ ኪብራውድ» ዩ።

⁵⁸ኣምኒየቍ ኣጛንስቅም ጝግል ንቕፅቍ ታምራን ፃቪየውም።