Read xamtanga ማቲወስት ወንጌል 14 Bible Online

ማቲወስት ወንጌል 14 - xamtanga bible

ማቲወስት ወንጌል 14

¹ኣይንድ ገሊለ ክፍለ ኻግሪዝ ቅመተ ዊነው ኺረውድስ እየሱስት ጂጘድ ወሹ።

²ጝኣገልጋያንድዛትም፦ «እኒን ጣምቀተ ይዃንስ የጝ፤ ጘጝ ክርጘይስ ጕኩ፤ እንቝጥጝ ዲንቅሰቍ ታምራን ጝግዝ ፃቭሽትጘውድም እንዝ ማጥን የጝ» ዩ።

³ኺረውድስ ጝዝን ፊልበውስት እውነ ዊንደይ ኺረውድያደት ምላሰንዝ ይዃንስት ፃይስ ወኽኒ ጝንል እፁስ ዊኑ።

⁴ምላሰንድም ይዃንስ ኺረውድስት፦ «ክዝንት እውነት ድውተ ወሪትት ኽግ ፊቅዳውም!» ያ ዊኑ።

⁵ኺረውድስም ይዃንስት ቁጠ በን ዊኑ፤ ኣነጚ ኽዝቭድ ይዃንስት ነቭይ ፃቭ ለምር ዊናንስቅ ጐውቱ።

⁶ዊገድ ግን ኺረውድስ ጝእዅርሸው ግርየድየንት ኪብርዛንድ ኺረውድያደት ቝረ ጥውር ዚቭች፤ ኺረውድስትም ጭቕጘ ዲስ ሽች።

⁷እንዝ ማጥን ኺረውድስ ጚ በንረውድየንትቅ ይውጠ ፃርዝ ቃል ጥዉ።

⁸እፈረየንም ጝርኘ ጅቅ ማኽርሽር፦ «ጣምቀተ ይዃንስት ኣውርድየንት ሽኻንዝ ፃቭር ነን ነቅ!» ይች።

⁹ንጕስድም ኣይንድ እን ዊገይዝቍዝ ኻዝኑ፤ ኣነጚ ጝፃሪዝቍዝመ ጝጅቅ ዊነቍ ኣብኒዝቍዝ ይሉኝተ ፃቭ ጚ ዋቕርደውድየንት ይውጛንስ ኣዙ።

¹⁰ወኽኒ ጝኒልም እቅ እፃቕ ይዃንስት ኣውርድ ቀቭሱ።

¹¹ቀቭሽተው ኣውርድየንትም ሽኻንዝ ፃቭጝ ነስጝ እፈረየንስ ይው፤ ጚይም ለምትር ጝርኘስ ይውች።

¹²ይዃንስት ክንደጥድም ተርጝ ጝእርሸድየንት ዲቭ፤ ፊርጝም እየሱስስ እን ዊገድ ድቍ።

¹³እየሱስም ይዃንስት ክርጘድ ወሸጘ ጝዊነው ስፍረይስ ጕ ታኰዝ ተሳፍርሽ ላው ገለል የው ስፍረል ጝለ ፊሩ። ኽዝቭድም እኒንት ወሻንድ ኻትመ ጨቨቂስ ፋ ልኵዝ ቲክን ፊሩ።

¹⁴ጘጝም ታኰይስ ጊማንድ ንቕፀው ኽዝቭ ቓል ኣርኽርኹ፤ ፅውዝጅንጥድዛትም ቓዙ።

¹⁵ኵናንድም ጝክንደጥድ ጝጐ ኣልትጝ፦ «እኒን ስፍረድ በራኸ የጝ፤ ጊርቅድ ኵንኩ፤ እንዝ ማጥን ኽዝቭድ ጣቀቲዝቍ ኪቋኒል ፊር ዀነው ጅቫንስ ማጥን ሲነቭሽ» ይ።

¹⁶እየሱስም፦ «ክትን ዀነው ይውጥንጚ ዝም ይጝ ፊርጥጘ ጥውሻውም» ዩ።

¹⁷ጛይም፦ «እንል ይናግል ፅበቍድ ኣኰ ምጭዝመ ሊጘ ኻዝዝ ጭቝ ጛይ» ይ።

¹⁸እየሱስም፦ «እስቲ ጛት ይጐ ነስጥን!» ዩ።

¹⁹ኽዝቭድየንትም ሚስጊዙ ፃቀይል ጐያንስ ኣዙ፤ ኣኰ ምጪዝመ ሊጘ ኻዚዝም ጒ ሲመይ ትጐ ጭቅ የው ቓላ እደረት ሚዝየንዙ፤ ሚድየንትም ኪል ጝክንደጢዝ ይዉ፤ ክንደጥድም ኽዝቪዝ ኣድል።

²⁰እጝቅቅም ዅጝ እቭት፤ ቲርፈውድየንትም ክንደጥድዛይ ፅጭ ሊጘ ምስቫንዝ እቻዝጝ ጕይ።

²¹ዀቍ እቅድም እቍኒዝመ እፈሪዝ እጊቲጝቀ ግልቍድ ጭቝ ኣኰ ሽኽ ኣጥጘ ዊን።

²²እየሱስም ኣይንድ ጝክንደጥድዛት፦ «ያን ኽዝቭድ ሲነቭስጪስቅ ይት ቀድምርን ታኰዝ ተሳፍርሽርን እጂ ከትጥን» የው ኣዙ።

²³ጘጝም ኽዝቭድ ሲነቭስ በር ፃልይጠ ጝለ ኣበል ፉ፤ ኵናንድም ጝግል ጝለ ዊኑ።

²⁴ታኰየንም ባኽሪዝ ዚልቅር ፃጝራ ሲጝቀ በውዝ በው ፊግየ ዊናንስቅ ማቨልዝ ገልታሽራ ዊንች።

²⁵ኻር ፃይጨ ሳይዝ ግረ እየሱስ ባኽርድየንት ደዳ ጝክንደጢዝጐ ተሩ።

²⁶ጛይም ባኽርድየንት ደዳ ፃጛንድ ቓልጛንድ፣ ምታት የጝ ይጝ ኻውክሽ፤ ጐውትዝም ቓፅ።

²⁷እየሱስም በውዝ፦ «ኣይዝዀጥን ያን የጝ፤ ጐውትርነ!» የው ዊግቱ።

²⁸ኣይንድም ቢጥሮስ፦ «ኣደረወ! ክት ኣረውዝየስ ባኽርድየንት ደጣ ክጐ ተጨር ኣዝ» ዩ።

²⁹ጘጝም፦ «ለው!» ዩ፤ ቢጥሮስም ታኰይስ ጊም ባኽርድየንት ደዳ እየሱስ ትጐ ፊሩ።

³⁰ዊገድ ግን ፊግየይዙ ኻይልትድ ቓላንድ ጐውቱ፤ ኣይንድም ስርሽጠ ኪርሙ፤ እየሱስትም፦ «ኣደረወ! ይት ቓዛ!» የው ቓፁ።

³¹እየሱስም በውዝ ጝናንድ በርስ ፃይ በር፦ «እፈ እምንት ጒድልደር ክተ! ውርቃጥ ተጣርጥርሽሩ?» ዩ።

³²እየሱስስመ ቢጥሮስስም ታኰይል ጥውጛንድ ፊግየድ ፀጥ ዩ።

³³ታጝኰይል ዊነቍድም እየሱስት፦ «እማንዝ ክት እደረት ኵር የጝ» ይጝ ጝጭስ ሲግድ።

³⁴ጛይም ባኽርድየንት ከርጝ ጀንሰሪጥ የነው ዝቨይል ችጝ።

³⁵ጘጝ ብጣይዝቍ እቅድም እየሱስ ኣቐጘ ኣርቕጛንድ ጝታጅልወይዝቍ ኻግራኒልቅ እፃቕጝ ፅውዝጅንጥድዛትቅ ጝጐ ነስ።

³⁶ፅውዝጅንጥድዛይ ጝኣልቨይዙ ጫፍድየንት ጭቝ ዳቕጛንስ ማጥንም ጝት ጨው፤ ዳቐቍድዛይም እጝቅቅ ጝታፅውዘይስ ቓድ።