Read xamtanga ማቲወስት ወንጌል 15 Bible Online

ማቲወስት ወንጌል 15 - xamtanga bible

ማቲወስት ወንጌል 15

¹ኣይንድም እየሩሳልየምስ ተረቍ ፈሪሳንዝመ ወሪትት ኽግ ክንሰጥዝ እየሱስትጐ ኣልትጝ፦

²«ክክንደጥድዛይ ውርቃጥ የጝ ኣቅለ ባኽልድየንት ሸርጘውድ? ሚ ዅጛንድ ጝታናንጣንድ እቓራቍም» ይ።

³እየሱስም እንት የው ዊሱ፦ «ክትንስ ውርቃጥ የጝ ክታባኽሊዝ ማጥን ይርን እደረት ትዛዝድ ሸርድርነውድ?

⁴እደረ፦ ‹ኪር ክኘት ኪብርዝ፤ ጚርት ዊንም ጝኘት ጭቓዝ ዛሸውድቅ ክርነ› የውኩ።

⁵ክትን ግን፦ ‹ኣውማው እጅር ጚር ጝኘት፦ <ያን ክታጭስ ነቅጨ ጥውሸው ከቨድቅ እደረስ ሚቨ ፃቭ ይውኩን> ይሽ፣

⁶ጘጝ እጅርድ ጚር ጝኘት ኪብርዝጠ በንዛውም› ይርነኵ፤ እንዝ ኣይንትዝም ክታባኽሊዝ ማጥን ይርን እደረት ትዛዝድ ሸርድርነኵ።

⁷እፈ ተክዘጥ ክታትርነ! ይሳያስ ክታማጥን፦

⁸‹እኒን ኽዝቭድ ጝምቸይዝ ይት ኪብርዘኵ፤ ጝእዘንድ ግን ይጊስ እክልደው የጝ፤

⁹ይት ጊነዝ ኣምልክጘኵ፤ ጝታክንስጘው ክንድጝድም እቅ ፊስጘው ስረት የጝ› የው ትንቪት ዊግተውድ እማን የጝ»

¹⁰እየሱስም ኽዝቭድ ጝጐ ጭጝ፦ «ወጭጥን! ኣስክስጥንም!

¹¹እጅር ኣርክሰውድ እጅርዝ ምቸይስ ፈውድ የጝጚ፣ እጅርዝ ምቸይል ጥወውድም ኣየው» ዩ።

¹²እንዝ ግረ ጝክንደጥድ ጝጐ ኣልትጝ፦ «ፈሪሳንድዛይ እን ዊግትረው ዊገድ ወሽጝ ኻልክሽጘጘ ኣርቕሩመ?» ይጝ ዋቕር።

¹³ጘጝ ግን፦ «ሲመይ ፅበው ይር ቲክልየው ቲከለድቅ ኒቅልሽጡ።

¹⁴በጥን፤ ጛይ ኻርብ ቃወቍ ኻርብ ጛይ፤ ኻርቨ ኻርቨድየንት ቃዋን ጝታቪልጝቅ ቢል ሊቭጘኵ» ዩ።

¹⁵ቢጥሮስም፦ «ተከድየንት ይናጭስ ቲርጕም» ዩ።

¹⁶እየሱስም እንት ዩ፦ «ክትንም ነኳን ኣሽ ኣስክሲርነቅም የነትመ?

¹⁷ምቸዝ ጥወውድቅ ጊዝው ኣቒል ጥው በር ጝዝለ ቢዘ ፍጠጘድ ኣርቓይርነቅመ?

¹⁸ምቸይስ ፈውድ ግን እዘኒስ ፈኵ፤ እጅር ኣርክሰውድም እኒን የጝ።

¹⁹ጭቓ ኻሰቭ፣ ኒቭስ ድሰነው፣ ሚንዝረነው፣ ሻርሙጠነው፣ ቕፅጝ፣ ኻሽትዝ ሚዝርደነው፣ እቀ ሽ ድሰነው፣ እኒንቅ እዘኒስ ፈኵ።

²⁰እጅር ኣርክሰቍድ እንዛይ ጛይጚ ናን እቓሪጝቀ ዀነውስ እጅር ኣርክሳውም።»

²¹እየሱስም ጝጊስ ፍ ጢረውስስመ ሲዱነ ኻትምጢዝ ጅልወይዝቍ ኻግራኒዝጐ ፊሩ።

²²ጝጊስም ላይ ከናንወ እውነ እየሱስትል ተትር፦ «ኣደረወ! ዳዊትት ዅር! ኣለቀይ ሳቝጭ! ይቝረ እርኵስ መንፈስዝ ፃይሽር ጭቕጘ ተሰቃይሸች» ይር ቓፅር ጨውች።

²³ጘጝ ግን ላው ቃልም ዊግቲየው፤ ኣይንድ ጝክንደጥድ ጝጐ ኣልትጝ፦ «እኝቸን እውነየን ይናት ቲክንዳ ቓፅራ ጨወች፤ ኣለቀይ ሲነቭሽ!» ይጝ ጨው።

²⁴ጘጝም፦ «ያን እፃጨውድ ቢቂዝጘ ድዘቍ እስራየላኒል ጭቝ የጝ» ዩ።

²⁵እውነየን ግን ጝልኲል ሊቭር፦ «ኣደረወ! ኣለቀይ እርዲ ይ!» ይች።

²⁶እየሱስም፦ «ዅሊዙ ሚድ ጕይን ግፅጝዝ ማለነው ጥውሻውም» ዩ።

²⁷ጚይም፦ «ኣደረወ! እማን የጝ፤ ኣነጚ ግፅጝም ቃል ጝታወኒዙ መዲስ ሊቨው ፍርፋሪድ ዅጘኵ» ይች።

²⁸ኣይንድም እየሱስ፦ «እውነ ክተ! ክእምንትድ ኽየው የጝ፤ ክት በንረጘ ኣነ» ዩ። ጝርቝረየንም ጚ ሰትሸንቲስ ኪርምር ቓድች።

²⁹እየሱስም ጝጊስ ጕ ገሊለት ባኽሪዝ ጋቢዙ ስፍረይዝጐ ፊሩ፤ ኣበልም ፍ ጝግል ጐዩ።

³⁰ንቕፀው ኽዝቭም፣ ኻካዛንድ፣ ኻርብድ፣ ድውያንድ፣ ድደንድ፣ ላጥ ንቕፀቍ ፅውዝጅንጥም ፃይ እየሱስትል ተር ጝልኲዝ ጋቢል እቕሩ፤ ጘጝም ጝታፅውዘይስ ቓዙ።

³¹ኽዝቭድም ድደንድ ዊግትጛንድ፣ ድውያንድ ቓድጛንድ፣ ኻካዛንድ ዳኽነዝ ተግርጛንድ፣ ኻርብድ ቓለነው ቸልጛንድ፣ ቓላንስቅ ዲንቅሹ፤ እስራየልት ኣምላክትም ሚዝየንዙ።

³²እየሱስም ጝክንደጥድዛት ጝጐ ጭጝ፦ «ኽዝቭድ ውርቅ ዂጝቀ ሻቘ ግርቅ ይጅቅ ዊናንስቅ ጝጭስ ኻዝነኵን፤ ጒደነይስ ግድርዝ ዝላቕ ሊቫየጘ ፃም በርስጨ በነቅም» ዩ።

³³ጝክንደጥድም፦ «እንቝጠ ኽዝቭዝ ኣቐው ሚ እኒን በራኸይስ ኣዊስ ችጝና?» ይ።

³⁴እየሱስም፦ «ዋቐ ምጭ ፃይርንኵርኑ?» የው ዋቕሩ፤ ጛይም፦ «ላጝጠ ምጭዝመ ዊትቍ እጥልቃን ኻዝዛ» ይ።

³⁵እየሱስም ኽዝቭድ ዝቨይል ጐያንስ ኣዙ።

³⁶ላጝጠ ምጪዝመ ኻዚዝም ጒ እደረት ሚዝየንዝ በር፣ ኪል ጝክንደጢዝ ይዉ፤ ክንደጥድም ኽዝቪዝ ኣድል።

³⁷እጝቅም ዅጝ እፍት፤ ቲርፈውድየንትም ጝክንደጥድዛይ ላጝጠ ምስቫን እቻዝጝ ጕይ።

³⁸ዀቍ እቅድም እቍኒዝመ እፈሪዝ እጊቲጝቀ ግልቍድ ጭቝ ሲዘ ሽኽ ዊን።

³⁹እየሱስም ኽዝቭድ ሲነቭትዘት ግረ ታኰዝ ተሳፍርሽ መጊደውል ትጐ ፊሩ።