Read xamtanga ማቲወስት ወንጌል 16 Bible Online

ማቲወስት ወንጌል 16 - xamtanga bible

ማቲወስት ወንጌል 16

¹ፈሪሳኒዝመ ሰዱቃኒዝም እየሱስትል ተርጝ ጝት ፊትንጥጘ በንጝ ሲመይስ ምልክት ቓሊሳንስ ዋቕር።

²ጘጝም፦ «ኵናንድ፦ ‹ሲመይድ ሰርኩ፤ ብረ ኣጠ የጝ› ይርነኵ።

³ቅሻንድ ቈሽ፦ ‹ሲመይድ ድምንድ ሰርኩ፤ ንጭ ስወ ሊቭጠ የጝ› ይርነኵ፤ ሲመይዙ ሚልክድስ ቲዘነው ቸልድርነኵ፤ ዊገድ ግን እንዚምኒዙ ምልክትድ ቲዘነው ቸላይርነቅም።

⁴ጭቓ ሸርሙጠ ዅለድ ምልክት በነኵ፤ ዊገድ ግን የውናስት ምልክትነይድ ኣየውዝየ ላየ ምልክት ይውሽታውም» ዩ። እንዝ ግረ ጛት በር ፊሩ።

⁵ጝክንደጥድም ባኽርድየንት ከርጛንድ ሚርጝ ሚ ፃዪየቍም ዊን።

⁶እየሱስም ጛት፦ «ልብ ይጥን! ፈሪሳኒዝመ ሰዱቃኒዝዙ ምጨይስ ሊሚድጭጥን!» ዩ።

⁷ጛይ ግን ጛስ ጛይ፦ «ሚ ፃዪይነቅ ኣናንስቅ ኣጠት እንት የውድ» ይሽተይሽት።

⁸እየሱስም ጝታኻሰቭድ ኣርቕ፦ «እፈ እምንት ጒድልድርነቅ ክታትርነ! ውር ቃጥ የጝ ክታስ ክታይ፦ ‹ሚ ፃዪይነቅ ኣናንስቅ የጝ እንት የውድ› ይርና ዊግትርነውድ?

⁹ገነመ ኣስክሳይርነቀ? ኣኰ ምጭድ ኣኰ ሽኽ እቅ ዅጝ፣ ቲርፈውድየንት ዋቐ እቻቐቍ ምስቫን ጕይርነጘ ኣጃይርነቅመ?

¹⁰እኒዝጘስ ላጝጠ ምጭድ ሲዘ ሽኽ እቅ ዅጝ ቲርፈውድየንት ዋቐ እቻቐቍ ምስቫን ጕይርነጘ ኣጃይርነቅመ?

¹¹እደስለ ያን ዊግጠውድ ሚዝቍዝ ኣየው ኣቐጘ ውረ ልብ ያይርነቅ? ነንም ፈሪሳኒዝመ ሰዱቃኒዝዙ ምጨይስ ሊሚድጭጥን» ዩ።

¹²ኣይንድም ጝክንደጥድ ጘጝ ዊግተውድ ፈሪሳኒዝመ ሰዱቃኒዝዙ ክንድጚስ ሊሚድሽጛንስጚ፣ ምኰተል ድወነው ምጨይዝቍዝ ኣየው ኣቐጘ ኣስክስ።

¹³እየሱስም ፊልበውስ ቂሳርየ የነው ኻግሪል ችጛንድ ጝክንደጥድዛት፦ «እቅ እጅር ዅርት ኣው የጝ ይጘኵ?» የው ዋቕሩ።

¹⁴ጛይም፦ «ላው ላውድ ጣምቀተ ይዃንስ፣ ላው ላውድ ይልያስ፣ ላው ላው ቈሽ የርምያስ፣ ዊንም ነቭያታኒስ ላውድ የጝ ይጘኳ» ይጝ ዊስ።

¹⁵ጘጝም፦ «ክትንሰ ይት ኣው ይርና?» ዩ።

¹⁶ስሙን ቢጥሮስም፦ «ክት ዘላልም ፅበው እደረት ዅር ክርስቶስ የጝ» ዩ።

¹⁷እየሱስም፦ «የውነት ዅር ስሙንወ! ክት ቀቫሽረር የጝ፤ እኒንት ክጭስ ጋልፀውድ ሲመይቱ ይር የጝጚ እጅርም ኣየው።

¹⁸ያንም ክት የኵን፤ ክት ቢጥሮስ[11] የጝ፤ እኒን ፃፀይልም ይምከንሸንት ተስጭር፤ ገኻነምት ሚልድ ጝርት ኻቓቍም።

¹⁹ክጭስም ምጝግስተሰማያትት ቝልፋንድዛት ነቅጭር፤ ዝቨይስ እፁቍረውድ ሲመይስ እፅቍሸው ኣጡ፤ ዝቨይስ እክስረውድ ሲመይስ እኪተው ኣጡ» ዩ።

²⁰እንዝ ግረ ጝክንደጥድዛት ጘጝ ክርስቶስ ኣቐጘ ኣውማውስቅ ድቋይጘጘ ኣዙ።

²¹ኣይንት ግርየይስ ኪርም እየሩሳልየም ፊርጠጘ፣ ጝጊስም ሽመቅሊዝ፣ ካኽነጣነ ኻልቅጢዝመ ወሪትት ኽግ ክንሰጢዝዙ ናኒዝ ኽየው ሚከረ ለምርጠጘ፣ ቍውሽትጠጘ፣ ሸወትረ ግርየይዝም ክርጘይስ ጕጠ ጥውሸው ኣቐጘ፣ ጝክንደጢዝ ጋልፅጠ ኪርሙ።

²²ቢጥሮስም እየሱስት ጝጐ ፊስ፦ «ኣደረወ! እነየው ዊገ ክጭስ ኣቒነ!» ያ ኪልክልጠ ኪርሙ።

²³እየሱስም ቢጥሮስ ትጐ ዋጥር የው፦ «እፈ ሲጣን ክተ! እድጐ ፊጥ! እጅርዝውድጚ እደረትውድ ኻስቫርም፤ ክት ይጭስ ፅጋ ኣቕርኵሩ» ዩ።

²⁴እንዝ ግረ እየሱስ ጝክንደጥድዛት እንት ዩ፦ «ይት ቲክንጠ በነውድቅ ጝቕምት ኻዲነ! ጝሚስቅልድየንትም መውር ይት ቲክነ!

²⁵ጝርዅየሸንት ቓዝጠ በነውድቅ ጝርት ድስጡ፤ ጝርዅየሸንት ይማጥን ደሰውድ ግን ጝርት ቓዝጡ።

²⁶እጅር ኣልሚዙ ኻፍትድቅ ችጛን፣ ጝኒፍስሸት ግን ቓዚየውዝየ ውር ጣቅምሽጡ? ዊንስ እጅር ጝኒፍስሸንስ ማጥን ኪፍለው ወየድ ወረጘ የጝ?

²⁷እጅር ዅር ጚርት ክቭርዝ ጝመላካኒጅቅ ተርጡ፤ እጝቅ እጅርዝቅም ጝሰብ ጝሰቢዝጘ ጝወየድ ኪፍልጡ።

²⁸እማንዝ የኵን፤ እንል ችብረቍ እቂዝ ማኽሊስ እጅር ዅር ጝምጝግስቲዝ ተራንድ ቓልጥጚስቅ ክርጘ ቓላቍ እቅ እኵ።»