Read xamtanga ማቲወስት ወንጌል 17 Bible Online

ማቲወስት ወንጌል 17 - xamtanga bible

ማቲወስት ወንጌል 17

¹ዋልጠ ግርቅዝ ግረ እየሱስ ቢጥሮስት፣ ያይቈቭት፣ ያይቈቭትዝን ይዃንስት፣ ጝታለ ፃይ ላው ኽየው ኣበል ፉ።

²ጝጊስም ጝታበዊል ጝሚልክድ ላውጥሹ፤ ጝጋፅድም ኰረይዝጘ ኣቭርኹ፤ ጝኣልቨድም ፃር ብርኻኒዝጘ ኣቭርቅርቁ።

³ኣይንድም ሙሴስመ ይልያስስ እየሱስ ጅቅ ዊግሽጛ ጛጭስ እትል።

⁴ቢጥሮስም፦ «ኣደረወ! እንል ኣቐነው ይናጭስ ቀሰው የጝ፤ ክት ዊድረር ኣርሽ ክጭስ ላው፣ ሙሴስ ላው፣ ይልያስ ላው፣ ሻቘ ደፅ ተስጨ» ዩ።

⁵ጘጝም እኒንት ዊግታ ሲጝቀ ኣቭርኸው ድምነ ተር ጛት ሺፍኑ፤ ድምነይዝ ኣቒስም፦ «ያን ጝቍዝ ዲስ የው ይቀነው ይዅርድ እኒን የጝ፤ ጝት ወጭጥን» የው ድመ ተሩ።

⁶ጝክንደጥድዛይም እኒንት ወሽጛንድ ዳጝግፅጝ ጝታግምባሪዝ ዝቨይል ደፋሽ።

⁷እየሱስም ጝታግል ኣልት ጝናኒዝ ዳቕ በር፦ «ጕጥን ጐውትርነ!» ዩ።

⁸ጛይም ጭቅ ይጝ ቓልጛንድ እየሱስትለ ላየ ኣውማውትም ቓልየቍ።

⁹ጛይም ኣበይስ ጊምጛ ሲጝቀ እየሱስ፦ «እጅር ዅር ክርጘይስ ጕጢስቅ እን ቓልድርነውድየንት ኣውማውስቅ ድቍርነቅ» የው ኣዙ።

¹⁰ጝክንደጥድዛይም፦ «እደስለ፣ ወሪትት ኽግ ክንሰጥድ፦ ‹በዊል ይልያስ ተርጠ ጥውሸኵ› ይጘውድ ወረጘ የጝ?» ይጝ ዋቕር።

¹¹እየሱስም፦ «ይልያስመ እርግጥ በዊል ተር እጝቅትቅ ኣስተካክልዝጡ።

¹²ዊገድ ግን ይልያስ ተርኩ የኵን! ኣቕሽም ጛት ሸጘ ፃቭጚ ጝት ኣርቒየቍም፤ እኒዝጘም እጅር ዅር ጝታናኒዝ ሚከረ ለምርጡ» ዩ።

¹³ኣይንድ ጝክንደጥድ እየሱስ ዊግተውድ ጣምቀተ ይዃንስት ማጥን ኣቐጘ ኣስክስ።

¹⁴እየሱስስመ ሻቘ ክንደጢዝም ኽዝቪል ችጛንድ ላው እጅር እየሱስ ትጐ ኣልት ጝበዊል ግርቨቭሽ፦

¹⁵«ኣደረወ! ኣለቀይ ይዅርት ሳቝጭ፤ ማለው ፅውዘዝ ጭቕጘ ተሰቃይሸኵ፤ እክሰው ግርየ ልየል ሊቨኵ፤ ኣቚልም ጥወኵ።

¹⁶ክክንደጢዝጐም ነሱን፤ ጛይ ግን ቓዘነ ብ» ዩ።

¹⁷እየሱስም፦ «እፈ እምንት እጅረር ጠማም ዅለ ክተ! ኣውን ኣሽ ክታጅቅ ፅብጭር? ኣውን ኣሽስ ክታት ቸልጭር? እፈረድ እንጐ ነስጥን» ዩ።

¹⁸ኣይንድም ጋኒንድየት ጋስፅ እፈረይስ ፊሱ፤ እፈረድም ጚ ሰትሸንቲስ ኪርም ቓዱ።

¹⁹እንዝ ግረ ጝክንደጥድ ጝታለ እየሱስትል ኣልትጝ፦ «ይን ጋኒንድ ፊሰነ ብነውድ ወረጘ የጝ?» ይጝ ዋቕር።

²⁰እየሱስም፦ «ክታእምንትድ ጒድለው ኣቓንስቅ የጝ፤ እማንዝ የኵን፤ ስናፍጭ ፍረት ኵተ እምንትት ፃይርነቅ ኣቕርናን፣ እኒን ኣበድ፦ ‹እኒስ ጕር እድጐ ፊጥ› ይርናን ፊርጡ፤ ክታጭስ ቸልሻው ዊገ ዊናውም።

²¹እነየው ጋኒንድ ግን ፀለውትዝመ ፃምዝ ኣየውዝየ ፋውም» ዩ።

²²ጛይም ገሊለ ኣኽቭሽጝ ፅብጛ እየሱስ ጛጭስ፦ «እጅር ዅር እቀ ናንል ዲቍሽት ይውሽትጡ።

²³ጛይም ጝት ቁጥቍ፤ ሸወትረ ግርየይዝም ክርጘይስ ጕጡ» ዩ። ጝክንደጥድም ጭቕጘ ኻዝን።

²⁴እየሱስመ ጝክንደጢዝ ቅፍርናዀም ችጛንድ መቅደስ ጝኒዝ ግቭር ለምረቍ እቅ ቢጥሮስ ትጐ ኣልትጝ፦ «ክታክንሰተድ መቅደስ ጝኒዙ ግቭርድ ኪፍላውመ?» ይጝ ዋቕር።

²⁵ቢጥሮስም፦ «እረ ኪፍለኳ» ዩ፤ ቢጥሮስም ጝኒል ጥዋንድ እየሱስ በዊል፦ «ስሙን! ዝቨትቍ ንጕሳንድ ቀረጥ ዊንም ግቭር ለምርጘውድ በገዘ ጝታቝሪስመ ዊንስ ላጥ እቂስ የጝ?» የው ዋቕሩ።

²⁶ቢጥሮስም፦ «ላጥ እቂስጚ» ዩ፤ እየሱስም፦ «እደስለመ ጝታቝርድ ግቭር ኪፍለነዊስ ኻርነይ ፈቍ ጛይ የነት የጛ?

²⁷ኣቕሽም ጛት ፅጋሳይነጘ ባኽሪዝጐ ፊትር ክመንጠቈድየንት ባኽሪል ማል፤ በዊል ፃይረው ኻዘድየንት ጝምቸድ ብዝራንድ ቍርሻን ችጝትር፤ ጛት ፊስር ይጭስም ክጭስም ኪፍል» ዩ።