Read xamtanga ማቲወስት ወንጌል 18 Bible Online

ማቲወስት ወንጌል 18 - xamtanga bible

ማቲወስት ወንጌል 18

¹ኣይንድ ጝክንደጥድ እየሱስትል ኣልትጝ፦ «ምጝግስተሰማያትስ እጝቂስቅ ኽየው ኣቐው እጅርድ ኣው የጝ?» ይጝ ዋቕር።

²እየሱስም ላው ኽፃን ጭጝ ክታማኽሊል ችብስ እንት ዩ፦

³«እማንዝ የኵን፤ ላውጥሺርነውዝየ፣ ኽፃናታኒዝጘም ኣቒርነውዝየ ምጝግስተሰማያት ስሪስቅ ጥዋይርነቅም።

⁴እንዝ ማጥን ምጝግስተሰማያትስ ኽየው ኣቐውድ እኒን ኽፃኒዝጘ ጝቕምት ዝቅ ሸውድ የጝ።

⁵እነየው ኽፃንድየንት ይሽዝ ለምረውድቅ ይት ለምረኵ።

⁶ዊገድ ግን ላው እጅር ይት ኣምነቍ እንዛይ መልቍስ ላውድየንት ቀሳንቲስ ሽ ኽየው እጕ ጝቕልመይል እፁሸጘ ባኽር ልቢል ስርሻን ጝጭስ ቺዘኵ።

⁷እኝቸን ኣልምሸን ፅጋረነውዝ ምላሰነ ኣራንስቅ ጝርስ ወየው፤ መቸም ፅጋረነው ገቨ ተሪጝቀ እዳቓውም፤ ዊገድ ግን ፅጋረነውዝ ምላሰነ ኣቐው እጅሪዝ ወየው።

⁸ክናንድ ዊንም ክልኵድ ቀተዝ ምላሰነ ኣቕሽ ጛት ቀቭር ማል፤ ምላሰንድም ሊጘ ናንጣን ዊንም ሊጘ ልኵጣን ፃይረር ኣቕር ዘላልምት ልየይል ጥውራንቲስ ሽ ኻካዝ ዊንም ቈማጥ ኣቕር ዘላልምት ርዅየል ጥውራን ቺዘኵ።

⁹እኒዝጘም ክእልሸን ቀተዝ ምላሰነ ኣርሽ ጝርት ፊስር ማል፤ ምላሰንድም ሊጘ እልጣን ፃይረር ኣቕር ዘላልምት ልየይል ጥውራንቲስ ሽ ላው እል ፃይር ዘላልምት ርዅየል ጥውራን ቺዘኵ።

¹⁰እንዛይ መልቊስ ላውድየንት ነቅርነቅ ጣጝቅቅጭጥን፤ ምላሰንድም ሲመይ ፅበቍ ጝታመላካንድዛይ ሲመይ ፅበው ይርት ጋፅድየንት ቓልጘኵ የኵን!

¹¹እጅር ዅርም ተረውድ ድዘውድየንት ደምዝጠ የጝ።

¹²«እስቲ ድቍጥን፣ ላ ቢቅ ፃየው ላው እጅር ዊናን፣ ጛጊስ ላውድ ድዛን፣ ፃይጭርጝን ፃይጨድ ኣበይል ማል እድየን ድዘውድየንት ደምዝጠ ፊራውመ?

¹³እማንዝ የኵን፤ ችጛንድም እዛይ ድዚየቍ ፃይጭርጝን ፃይጨይስቅ እድየን ድዝ ችጝሸው ቢገይዝቍዝ ዲስ የኵ።

¹⁴እኒዝጘም እንዛይ መልቍስ ላውድ እኳ ድዝጠ ሲመይ ፅበው ክታይርድ በናውም።

¹⁵«ክዝንድ ክት ቢድልሽ ፊትር ክስመ ጝስ ክታይለ ኣቕርን ጘጝ ቢድለው ዊገድየንት ጝጭስ ድቍ፤ ኣይንድ ክት ወሽሽ፣ ክዝንድየንት ዊስር ክቕምቱ ፃቭሩ የነት የጝ።

¹⁶ክት ወሺዪሽ ግን ላው፣ ዊንም ሊጘ እቅ ፃይር ዊግሽ፤ ምላሰንድም ዊገድቅ ሊጘ፣ ዊንም ሻቘ ሚዝረጫንዝ ፀናቐኵ።

¹⁷ጛትም ወሺዪሽ ምከንስ ድቍ፤ ምከንትም ወሺዪሽ ኣኽዛቪዝጘዝመ ቀረጥ ቀቨዊዝጘዝ ፃቭር በጭ።

¹⁸«እማንዝ የኵን፤ ዝቨይስ እፅቍርነውድ ሲመይስ እፅቍሸው ኣጡ፤ ዝቨይስ እክስርነውድ ሲመይስ እኪተው ኣጡ።

¹⁹እንደ ገነ እማንዝ የኵን፤ ዝቨይስ ክታጊስ ሊጘድ ላው ዊገዝ ቲስመምጝ ጨውጝሽ ሲመይ ፅበው ይር ጛይ ጨውጘውድየንት ፃቭጡ።

²⁰ሊጘ ዊንም ሻቘ ኣቕጝ ይሽዝ ኣኽቭሽጘዊልቅ ያን ጝታማኽሊል ችጝጭር።»

²¹ኣይንድ ቢጥሮስ እየሱስትል ኣልት፦ «ኣደረወ! ይዝንድ ይት ቢድላን ዋቐን ይቅር ይጨ? ላጝጠን ኣሽመ?» የው ዋቕሩ።

²²እየሱስም እንት ዩ፦ «ላጝጠን ላጝጥርጝን ኣሽጚ፣ ላጝጠን ጭቝም የቅ።

²³«እንዝ ማጥን ምጝግስተሰማያት ጝኣገልጋያኒዝ ናኒል ዊነው ጝኺሳቭድ ተሳስቭሽጠ በነው ንጕስ ተከች።

²⁴ጘጝም ተሳስቭሸነው ኪርማንድ ፅቃ ሽኽ መክሊት[12] ቢን ፃየው እጅር ጝጐ ነስ።

²⁵ንጕስድም ኣገልጋይድየን ጝቢንድ ኪፍለነ ባንድ፣ ጘጝ፣ ጝውነ፣ ጝቝር፣ እጝቅ ጝፃየውድየንቅ ቂይሽ ቢንድ ኪፍልሽጥጘ ኣዙ።

²⁶ኣይንድ እኒን ቢን ጕርየ ኣገልጋይድ ጝኣደረይዝ በዊል ደፋሽ፦ ‹ኣደረወ! ኣለቀይ ግርየ ነቅ፤ እጝቅት ኪፍልጭር› የው ጨዉ።

²⁷ጝኣደረድም ጝጭስ ኻዝናንስቅ ሳቝሩ፤ ጝቢንድዛትም በሩ።

²⁸ዊገድ ግን እኒን ኣገልጋይድ ጝጊስ ፍ ፊራንድ ጝፃምጥ ኣገልጋያኒስ ላ ዲናር[13] ቢን ጝጊስ ፊስ ዊነው ላውድየንት ችጝ፦ ‹ቃሲ ፊስረቍ ይጊንዝቫንድዛት ኪፍል!› የው ጝቕልመድየንትም ኻንቕ ፃዩ።

²⁹ጝፃምረ ኣገልጋይድም ጝበዊል ደፋሽ፦ ‹ኣለቀይ ግርየ ነቅ፤ እጝቅትቅ ኪፍልጭር› የው ጨዉ።

³⁰ጘጝ ግን ግርየ ይውጠ በኒየውም፤ ጝፃምረ ኣገልጋይድየንት ወኽኒ ጝንል ፊስ እፁሱ።

³¹ላጥ ጝፃምጥ ኣገልጋያንድም እኒንት ቓልጛንድ ጭቕጘ ኻዝን፤ ፊርጝም እን እጅርድየን ፃቨው ገቨድየንት እጝቅትቅ ጝታኣደረይዝ ድቍ።

³²ኣይንድ ኣደረድ እድየን ኣገልጋይድየንት ጭጝ፦ ‹እፈ ጭቓ ኣገልጋይ ክተ! ክት ይት ጨውራንድ እንቝጠ ቢነድየንትቅ ሳቝጡን።

³³እደስለ ያን ክት ሳቝጠጘ ክትስ ክፃምረድየንት ሳቝርተ ጥውሻውመ?› ዩ።

³⁴ኣደረድየንም እነይ ቈጣሽ ጝቢንድ እጝቅትቅ ኪፍል ኻትጢስቅ ወኽኒ ጝንል ኣሰቃይዘቊዝ ዲቍስ ይዉ።

³⁵እንዝ ማጥን ክታጊስ ኣውማውድቅ ጝዝንድየንት ጝእዘኒዝ ይቅር ዪየውዝየ፣ ሲመይ ፅበው ይርም ክታት እኒዝጘ ፃቭጡ።»