Read xamtanga ማቲወስት ወንጌል 19 Bible Online

ማቲወስት ወንጌል 19 - xamtanga bible

ማቲወስት ወንጌል 19

¹እየሱስም እኒንት ዊግት ኻተት ግረ ገሊለት በር ዮርዳኖስት እጂዙ ይዅዳት ኣውራጀይዝጐ ፊሩ።

²ንቕፀው ኽዝቭም ጝት ቲክኑ፤ ጘጝም ጝጊስ ፅውዝጅንጥድዛት ቓዙ።

³ፈሪሳንም ጝት ፊትንጥጘ በንጝ ጝጐ ኣልትጝ፦ «እጅር ኣውማው ምላሰንዝቅ ጝውነት ዳቕርጠ ፊቅድሸኵመ?» ይጝ ዋቕር።

⁴ጘጝም፦ «ፈጣሪ በውገ ግልወዝመ እውነስ ፃቭ ፋጥረጘ ኣንቭቪርነቅመ?

⁵ቈሽም፦ ‹እንዝ ማጥን እጅር ጚር ጝኘት በረኵ፤ ጝውነ ጅቅም ጣምርሸኵ ጝታቪልም ላው ኣካል ኣጘኵ› ዩ።

⁶ኣቓንስቅም ነስየ ላው ኣካል ጛይጚ ሊጘም ኣየቍ፤ እንዝ ማጥን እደረ ጣምርዘውድየንት እጅር ቲዚነ» ዩ።

⁷ጛይም፦ «እደስለ ሙሴ ወረጘ የጝ ላው ግልወ ጝውነት ጝርድቕሪዙ ወረቂትድ ይው በርሳንስ ኣዘውድ?» ይ።

⁸ጘጝም፦ «ሙሴመ ክታእዚኒዙ ጭቕትድየንት ኣርቓንስቅ ክታእቍንድ ዳቕርድርናንስ ፊቅዱጚ ኽፅሚስ ግን እነየውም ኣየው ዊነውድ።

⁹ጝርጕርየት ዲጊል ሻርሙጢረውዝለ ጝውነት ዳቕር ላየ እውነት ድወውድቅ ሻርሙጠኵ፤ ጝርትም ሻርሙጥተ ፃበኵ፤ ዳቕርሽረይሸንት ድወውድም ሻርሙጠኵ የኵን» ዩ።

¹⁰ጝክንደጥድዛይም፦ «ባልና ምሽቲዙ ገቨድ እነየው ኣቐውዝየስ ገባሻይነው ቺዘኵ» ይ።

¹¹እየሱስ ግን፦ «እን ዊገድ እደረ ይወቊዝ ኣሽጚ እጝቅዝቅም ኣየው።

¹²ምላሰንድም ላው ላውድ እዅርሽጛንድ ስልቭ ኣቕጝ እዅርሽጘኵ፤ ላው ላውድ እቅ ሲልቭጙዝ ስልቭ ኣጘኵ፤ ላጥድ ቈሽ ምጝግስተሰማያትትቍዝ ይጝ ስልቫኒዝጘ ገባሸነው በርጘኵ፤ እኒንት ለምርጠ ቸለውድቅ ለምርነ» ዩ።

¹³ጝዝ ግረ ጝናንድየንት ጝታዲጊል ፃቭ ፀልያንስ ማጥን እቅ ኽፃናታንድዛት ጝጐ ነስ፤ ጝክንደጥድ ግን እቅድዛት ቃርሽ።

¹⁴እየሱስም፦ «ኽፃናታን ይጐ ተርጝነ፤ ምጝግስተሰማያት ጛት ተከቊዝ ኣራንስቅ ኪልክልትርነ» ዩ።

¹⁵ጝናንድየንትም ጝታዲጊል እቝር በርክ በር ጝጊስ ጕ ፊሩ።

¹⁶ጝዝ ግረ ላው እጅር እየሱስትል ተር፦ «ክንሰተወ! ዘላልምት ርዅየ ችጛንስ ማጥን ወረጘ ቀሰው ሰቭ ሰራጨ?» የው ዋቕሩ።

¹⁷እየሱስም፦ «ቀሰው ዊገዝቍዝ ወረጘ ይት ዋቕርዳ? ቀሰው ኣቐውድ ላው ኣምላክድ ጭቝ የጝ፤ ርዅየል ጡተ በንረውዝየ ግን ትዛዛንድዛት ፋፅም» ዩ።

¹⁸እጅርድየንም፦ «ኣውዛይ ትዛዛን?» የው ዋቕሩ። እየሱስም፦ «ቁተ፣ ሻርሙጥተ፣ ስተ፣ ኻሽትዝ ሚዝርድተ፣

¹⁹ኪር ክኘት ኪብርዝ፣ ክፃምረድየንት ክቕም ትጘ ቀን፣ የቍዳ» ዩ።

²⁰ውርጋጠ እጅርድየንም፦ «እንዛትመ ፋፅምኩን፤ ላየ ይጊስ ጒድለውድ ወረጘ የጝ?» የው ዋቕሩ።

²¹እየሱስም፦ «ፍፅም ኣተ በንረውዝየ ፊትር ክፃይረውድየንትቅ ቅይር ጊንዝቭድ ድኺዝ ይይ፤ ሲመይስም ኻፍት ችጝትር፤ ጝዝግረም ተትር ይት ቲክን» ዩ።

²²እድ ውርጋጠ እጅርድየንም ንቕፀው ኻፍት ጕርየ ዊናንስቅ እኒንት ወሻንድ ኻዝና ፊሩ።

²³እየሱስም ጝክንደጢዝ፦ «እማንዝ የኵን፤ ኻፍታምዝ ምጝግስተሰማያት ጥወነውድ ጭቕጘ ቺግርዘው የጝ።

²⁴ሊጘት የኵን! ኻፍታም ምጝግስተሰማያት ጥወነው ሽ ግምለ ሚርቨዙ እልዝ ጭልቓን ቀለኵ» ዩ።

²⁵ጝክንደጥድም እኒንት ወሽጛንድ ጭቕጘ ጊርምሽጝ፦ «እደስለ ኣው የጝ ቓድጠ ቸለውድ?» ይ።

²⁶እየሱስም ጛት ቓላ፦ «እኒን እጅርዝ ቸልሻውም፤ እደረስ ግን እጝቅቅ ቸልሸኵ» ዩ።

²⁷ቢጥሮስም፦ «ይን እጝቅትቅ በርን ክት ቲክንንኵኑን፤ እደስለ ወረጘ የጝ ችጝነውድ?» የው ዋቕሩ።

²⁸እየሱስም እንት ዩ፦ «እማንዝ የኵን፤ ተረው ኣይር ኣልሚዝ እጅር ዅር ጝክቭር ዙፋኒል ጐያንድ፣ ክትን ይት ቲክንድርነቅድም ፅጭ ሊጘ ዙፋናንል ጐይርን ፅጭ ሊጘ እስራየላነ ነገዳኒል ፊርድትርንቅ።

²⁹ይሽዝ ማጥን የው ጝጝንጥድ፣ ዊንም ጝፅንት፣ ዊንም ጝኣቅልድ፣ ዊንም ጝቝርት፣ ዊንም ጝቺዝጝድ በረውድቅ፣ ላ እፅፍ ድርቭ ለምርጡ፤ ዘላልምት ርዅየም ችጝጡ።

³⁰ዊገድ ግን ንቕፀቍ ነን በውጥ ኣቐቍ እገጥ ኣጥቍ፤ ነን እገጥ ኣቐቍም በውጥ ኣጥቍ።»