Read xamtanga ማቲወስት ወንጌል 2 Bible Online

ማቲወስት ወንጌል 2 - xamtanga bible

ማቲወስት ወንጌል 2

¹እየሱስ ንጕስ ኺረውድስት ዚምኒዝ ይዅዳ ኻግሪዝወ በተልኺምስ እዅርሸት ግረ፣ ፅግልውጥ ተመራምርሸቍ እቅ ምስራቂስ ጕጝ እየሩሳልየም ተርጝ፦

²«እዅርሸው ኣይዅዳነ ንጕስድ ኣውል የጝ? ጝፅግልወድየንት ምስራቂስ ቓልን ጝጭስ ሲግድነ ተርንኵኑን» ይጝ ዋቕር።

³ንጕስ ኺረውድስም እኒንት ወሻንድ ዳጝግፁ፤ እየሩሳልየም ኻትመየንም ምሉዝ ጝጅቅ ዳጝግፅች።

⁴ጘጝም ካኽነጣነ ኻልቅጢዝመ ኽዝቪዝቍ ወሪትት ኽግ ክንሰጢዝ እጝቅትቅ ጭጝ፦ «ክርስቶስ ኣውል የጝ እዅርሸውድ?» የው ዋቕሩ።

⁵ጛይም፦ «ይዅዳ ኻግሪዝወ በተልኺምስ የጝ።

⁶ምላሰንድም ነቭይዝ፦ ‹ይዅዳ ኻግሪዝወ በተልኺምወ! ይዅዳ ኻግሪዝቍ ኽየቍ ኻትምጢስ ውረውረዝቅ ፅጓርም፤ ይኽዝቭ እስራየልት ሊሚደው ቅመተ ክጊስ ፍጡ› ይሽት ፃፍሽኩ» ይጝ ድቍ።

⁷እንዝ ግረ ኺረውድስ እዛይ ፅግልውጥ ተመራምርሸቍ እቅድዛት ስውርዝ ጭጝስ ጝፅግለወድ እትለው ትክክልኘ ግርየድየንት ዋቕር ጛጊስ ተረድሹ።

⁸ጛትም፦ «ፊጥን ኽፃንድየንት ጥጝቅቀዝ ደምዝጥን፤ ችጝርናንድም ያንም ፊጥ ጝጭስ ሲግጣንስ ማጥን ዋጥርድርን ይጭስ ድቍጥን» የው በተልኺም በርሱ።

⁹ጛይም ንጕስድ የውድየንት ወሽጝ ጝታጒደነድ ቃጥል፤ እድየን ምስራቂስ ቓልጘው ፅግልወድም ጛት ቃዋⶖ ፊስ ኽፃንድ ፅበው ስፍረይል ችጛንድ ችብሩ።

¹⁰ፅግልወድየንት ቓልጛንድም ጭቕጘ ዲስ ይ።

¹¹ጝኒል ጥውጛንድም ኽፃንድ ጝኘ ማርያም ጅቅ ቓል፤ ጝታበዊዝም ደፋሽጝ ጝጭስ ሲግድ፤ ጝታሳፁንድም ብዝጝ ዊርቀ፣ እጣን፣ ከርቭየ፣ ይውት ይው።

¹²እደረም ኺረውድስ ትጐ ዋጥራይጘጘ ኒቪዝ ጣጝቅቅሳንስቅ ላየ ጒደነዝ ጝታኻግር ፊር።

¹³ፅግልውጥ ተመራምርሸቍ እቅድ ፊርጘት ግረ ኣደረት መላክ ዮሴፍስ ኒቪዝ እትል፦ «ኺረውድስ ኽፃንድ ቁጠ ደምዘኵነ ጕር ኽፃንድየንት ጝኘ ጅቅ ፃይር ግቭፅ ትጐ ሰይ፤ ያን ድቍጪስቅም ጝግል ጐይ» ዩ።

¹⁴ዮሴፍም ኻር ጕ ኽፃንድ ጝኘ ጅቅ ፃይ ግቭፅ ፊሩ።

¹⁵ኺረውድስ ክርጢስቅም ጝግል ጐዩ፤ እንም ኣቐውድ ነቭይዝ ኣደረቲስ፦ «ይዅርት ግቭፅስ ጭጙን» ይሽተው ቃልድ ፋፅምሻንስ የጝ።

¹⁶ኺረውድስም ፅግልውጥ ተመራምርሸቍ እቅድዛይ ጝት ኻጝስጘጘ ኣርቓንድ ጭቕጘ ቈጣሹ፤ ጛጊስ ተረድሸው ግርየይዝ ሚስርትዝም ጝታእድሚድ ሊጘምትዝመ ጝዝ ሳዝ ኣቐቍ በተልኺምስመ ጝርጅልወይዝቍ ኻግራኒል ዊነቍ ግልቍ ኽፃናታንድዛትቅ ዊተድር እፃቕ ቍውሱ።

¹⁷ኣይንድ ነቭይ የርምያስ፦

¹⁸«ሊዝዝመ እሪተዙ ድመዝ ራመስ ወይሽቱ፤ ራኺል ጝርቝርት ማጥን ሊዝች፤ ጝርቝርድ እጝቅቅ ኣቢትጛንስቅ ዲብሽተነው እምቢ ይች» የው ዊግተውድ ፋፅምሹ።

¹⁹ኺረውድስ ክረት ግረ ኣደረት መላክ ዮሴፍስ ግቭፅስ ኒቪዝ እትል፦

²⁰«ኽፃንድ ቁጥጘ በነቍ እቅድ ክርጛንስቅ ጕር ኽፃንድየንት ጝኘ ጅቅ ፃይር እስራየል ኻግሪል ዋጥር» ዩ።

²¹ዮሴፍም ጕ ኽፃንድ ጝኘ ጅቅ ፃይ እስራየል ኻግሪል ጥዉ።

²²ዊገድ ግን ኣርኪላወስ ጚር ኺረውድስት ፊንተ ይዅዳትል ኒግሰጘ ወሻንድ ጝጐ ፊረነውድ ጐውቱ፤ እደረም ጝጭስ ኒቪዝ ኣስርድዛንስቅ ገሊለት ኣውራጀይዝጐ ፊሩ።

²³ነቭያታንዝ፦ «ናዝሪትቱ ይሽትጡ» ይሽት ዊግሸውድ ፋፅምሻንስ ማጥን ናዝሪት የነይ ኻትመትል ፊር ጐዩ።