Read xamtanga ማቲወስት ወንጌል 20 Bible Online

ማቲወስት ወንጌል 20 - xamtanga bible

ማቲወስት ወንጌል 20

¹«ምጝግስተሰማያት ጝወይን ኣታክልቲዝ ሰራሸጥ ቃፅርጠ ግረቨዝ ፈው ኣታክልትዝ ወነ እጅር ተከች።

²ጘጝም ግርየዝ ላው ላው ዲናር ኪፍልጠ ቲስመም ሰራሸጥ ጝወይን ኣታክልቲል በርሱ።

³ሻቘ ሰት ኣጠይዝም ፍ ሰቭ ቀርጝ ኣርወይል ችብረቍ ላጥ እቅ ቓል

⁴‹ክትንም ይኣታክልቲል ፊትርን ሰራጭጥን፤ ክታጥውሸው ምኻየድም ኪፍልጭር› ዩ።

⁵ጛይም ፊር፤ ዋልጠ ሳይዝመ ፃይጨ ሳይዝም ፍ ላጥ ሰራሸጥ ቃፅሩ።

⁶ፅጭ ለው ሳይዝም ፍ ላጥ ችብረቍ እቅ ቓል፦ ‹ግርየ ምሉ ውር ቃጥ የጝ ሰቭ ቀትርን ችብትርን ፅብርነውድ?› የው ዋቕሩ።

⁷ጛይም፦ ‹ቃፅረው እጅር ብናንስቃ› ይጝ ዊስ፤ ጘጝም፦ ‹ክትንም ፊትርን ይወይኒዙ ኣታክልቲል ሰራጭጥን› ዩ።

⁸«ኵናንድም ወይን ኣታክልቲዝ ወነድ ሰራሸጢዝ ዲቈተድየንት፦ ‹ሰራሸጥድዛት ጭጝር እግርገ ተረቊስ ኪርምር በውጢል ኣሽ ጝታምኻየድ ኪፍል› ዩ።

⁹ፅጭ ለው ሳቲዝ ቃፅርሸቍ ሰራሸጥድ ተርጝ ላው ላው ዲናር ፊስ።

¹⁰በውግ ቃፅርሸቍድም ኣልትጛንድ፦ ‹እገጢስ ዲቈው ለምርንቅ› ይጝ ዊን፤ ዊገድ ግን ጛይም ላው ላው ዲናር ለምር።

¹¹ጛይም ጊንዝቭድ ለምርጝ በርጝ ወነይል ፊርጝ፦ ‹እንዛይ እግርገ ቃፅርሸቍድ ላው ሰት ጭቝ ሰራሽጝ ግረቨዝ ኪርምን ዝላና ኰረዝም ቃጥልሽና ግሪነቂጅቅ ኣወሽር የጝ እኵለ ኪፍልደውድ?› ይጝ ኣጕርምርም።

¹³ጘጝም ሰራሸጢስ ላውድየንት፦ ‹ይወደጅወ! ክት ቢድሊቀርም፤ ላው ዲናርዝ ሰራሽተ ቲስመምር ዊኒረርቀ?

¹⁴ነንም ኣሽ ክኣፍድ ፃይር ፊጥ፤ እግርገይዝ ተረዊዝም ክጭስ ኪፍለዊዝ ቝጠ ኪፍልጨ በነኵን።

¹⁵እደስለ በገዘ ይጊንዝቪዝ ይቕምት ሸጘቅ ፃቨነው ቸለቅመ? ዊንስ ክት ያን ቀሰር ኣቑዝ ተመቀኝሽሩ?› ዩ።

¹⁶«ኣቓንስቅም እገጥድ በውጥ ኣጥቍ፤ በውጥድም እገጥ ኣጥቍ።»

¹⁷እየሱስም እየሩሳልየም ፊርጠ ፃጛ ዊኑ፤ ጒደነይልም ፅብጛ ፅጭ ሊጘ ክንደጥድዛት ጝታለ ጝጐ ኣልስ፣

¹⁸«እንወ እየሩሳልየም ፊርና የጝ። እጅር ዅርም ካኽነጣነ ኻልቅጢዝመ ወሪትት ኽግ ክንሰጢዝ ዲቍሽት ይውሽትጡ፤ ጛይም ጝት ክርጘዝ ፊርድጥቍ።

¹⁹ኣኽዛቫኒዝም ዲቍስጝ ይውጥቍ፤ ኣኽዛቫንድም ጝት ተዘቫቭትሽጥቍ፤ ጊርፍጥቍ፤ ሲቅልጥቍ፤ ኣነጚ ሸወትረ ግርየይዝ ክርጘይስ ጕጡ» ዩ።

²⁰እንዝ ግረ ዘቭዲወስት ቝሪዝ ጝታኘ ጝርቝር ጅቅ እየሱስ ትጐ ተትር ጝርግርቪዝ ግርቨቭሽር ጝርስ ላው ዊገ ፃቫንስ ማጥን ጨውች።

²¹እየሱስም፦ «ወረጘ በንሩ?» ዩ። ጚይም፦ «እንዛይ ሊጘ ይቝርድዛይ ክት ኒግስራንድ ላውድ ክለዊዝ ላውድ ቈሽ ክፃግቪዝ ጐይጛንስ ፊቅጅ» ይች።

²²እየሱስም፦ «ወረጘ ጨውትርነጘ ኣርቓይርነቅም፤ ያን ዝቀው ሚከረዙ ፅወድየንት ዝየነው ቸልትርንቅመ?» ዩ። ጛይም፦ «የይ ቸልንቅ» ይ።

²³ጘጝም፦ «ይሚከረይዙ ፅወይስስ እርግጥ ዚትርንቅ፤ የለዊዝመ ይፃግቪዝ ጐየነውድ ግን ይር ጛጭስ ኣስለቍዝ ኣቐው የጝጚ፣ ያን ፊቅደው ገቨም ኣየው» ዩ።

²⁴ላጥ ፅቃ ክንደጥድም እኒንት ወሽጛንድ እንዛይ ሊጘ ዚን ክንደጥድዛት ኻልክሽ።

²⁵እየሱስም ጝታእጝቅትቅ ጭጝ፦ «ኣኽዛቫኒዝ ኣደርጥድ ጝታኽዝቭድ ቅምጥጘጘ፣ ጝታስልጣን ጕይጥድም ኻይልዝ ኣዝጥጘጘ ኣርቕርነኵ።

²⁶ክታጭስ ግን እነየው ኣጠ ጥውሻውም፤ ክታማኽሊስ ኣውማው ኽየው ኣጠ በነው እጅርድቅ ክታኣገልጋይ ኣነ።

²⁷ንየቱ ኣጠ በነውድም ክታት ኣግልግልነ።

²⁸እጅር ዅርም ተረውድ ጝት ኣግልግልጛንስ ኣዪጝቀ ላጥድዛት ኣግልግልጠ፣ ጝርዅየድየንትም ንቕፀቍዝ ማጥን ዲቍስ ይውጠ ይጝ።»

²⁹እየሱስስመ ጝክንደጢዝም እያሪኰስ ፍጝ ፊርጛንድ ንቕፀው ኽዝቭ ጛት ቲክኑ።

³⁰ጝግልም ሊጘ ኻርብ ጒደነይል ጐይጝ ዊን፤ እየሱስም ጝግዝ ዲቈው ኣቐጘ ወሽጛንድ፦ «ኣደረወ! ዳዊትት ዅር! ኣለቀይ ሳቝጭ!» ይጛ ቓፅ።

³¹ኽዝቭድም፦ «እፈ ዝም ይጥን» የው ቃርሹ፤ ጛይ ግን፦ «ኣደረወ! ዳዊትት ዅር! ኣለቀይ ሳቕጭ!» ይጛ ቐናዝጝ ቓፅ።

³²እየሱስም ችብር ጛት ጭጝ፦ «ውር ፃቭጨ በንርነኵ?» ዩ።

³³ጛይም፦ «ኣደረወ! ይናእልጣንድ ቢትጛንስ በነኵና» ይ።

³⁴እየሱስም ጛጭስ ኣርኽርኽ ጝታእልጣንድዛት ዳቑ፤ በውዝም ጝታእልጣንድ ቓድ፤ ጛይም እየሱስት ቲክን።