Read xamtanga ማቲወስት ወንጌል 21 Bible Online

ማቲወስት ወንጌል 21 - xamtanga bible

ማቲወስት ወንጌል 21

¹እየሱስስመ ጝክንደጢዝ እየሩሳልየምት ጣቅ ኣቐው ደቭረ ዘይት ኣበይል ችጝሽረይ በተፋግየ የነይ ኪውሸንትል ኣልትጛንድ፣ ጝክንደጢስ ሊጘድ፦

²«ክታበዊል ፅብረይ ኪውሸንትል ፊጥን፤ ጝጊስም ላይ እፁሽረይ ድዃረት ጝርእወልጅቅ ችጝትርንቅ፤ እክስርን ይጐ ነስጥን።

³ኣውማው እጅር ላው ዊገ ዊግትሽ፦ ‹ኣደረ በናንስቅ የጝ› ይጥን፤ ጘጝም በውዝ በርስጡ» የው እፃቑ።

⁴እንም ኣቐውድ ነቭይዝ፦ «ፂወንት ቝረስ፦ ‹እንወ ክንጕስድ ትዅት ኣቕ፣ ድዃረስመ ጝርእወልስ ድቃር ክጐ ተረኵ› ይርን ድቍጥን» ይሽት ፃፍሽ ዊነውድ ፋፅምሻንስ የጝ።

⁵

⁶ጝክንደጥድም ፊርጝ እየሱስ ኣዘጘ ፃቭ።

⁷ድዃረየንስመ ጝርእወልሸንስም ነስጝ ጝታኣልብድዛት ጝታዲጊል ጒዝጕዝ፤ እየሱስም ድቃሩ።

⁸ኽዝቪስም ኽይጠድ ጝኣልቨድየንት ጒደነይል ወፃቑ፤ ላጥድ ቈሽ ዘፋኒዝ ጫፍ ጫፍድየንት ጫጝቕዝጛ ጒደነይል ጒዝጕዝጛ ዊን።

⁹ጝበው በዊል ፃጛ ዊነው ኽዝቪዝመ ጝእግርገይል ቲክና ዊነው ኽዝቪዝም፦ «ዀሳይነ[14] ዳዊትት ዅርስ፤ ኣደረት ሽዝ ተረውድ በርክሸው የጝ፤ ኣርያምስ ዀሳይነ ኣነ» ያ ቓፃ ዊኑ።

¹⁰እየሩሳልየም ጥዋንድም ኻትመይዙ ኽዝቭድቅ፦ «እኒን ኣው የጝ?» የው ኒንቅሹ።

¹¹ጝት ኣጅቭ ተረው ኽዝቭድም፦ «እኒን ገሊለስ ችጝሽረይ ናዝሪትቱ ነቭይ እየሱስ የጝ» ዩ።

¹²ጝዝ ግረም እየሱስ መቅደስ ጝኒዝጐ ጥዉ፤ ጝጊስም ቅየቊዝመ ጅቨቊዝዛት እጝቅትቅ ጅግዙ፤ ቍርሻን ላውጠቊዙ ጠረበዘይዝመ ርግቫን ቅየቊዙ ወምበሪዝ ጊልብረነውዝ፦

¹³« ‹ይጝንድ ፀለውትዙ ጝን ይሽትጡ› ይሽት ፃፍሽኩ፤ ክትን ግን ዚርፈጢዙ ጋ ፃቭርኑ» ዩ።

¹⁴መቅደስ ጝኒዝ ኣቒስም ኻርብዝመ ኻካዛንዝ ጝጐ ተር፤ ጘጝም ጛት ቓዙ።

¹⁵ዊገድ ግን ካኽነጣነ ኻልቅጢዝመ ወሪትት ኽግ ክንሰጢዝ እየሱስ ፃቨቍ ታምራኒዝመ መቅደሲስም፦ «ዀሳይነ ዳዊትት ዅርስ» ይጛ ቓፀቍ ኽፃናታንድዛት ቓልጛንድ ጭቕጘ ኒድሽ።

¹⁶እየሱስትም፦ «እንዛይ ኽፃናታንድ ይጘውድየንት ወሽረኵመ?» ይ፤ ጘጝም፦ «የይ ወጨኵን፤ ‹ኽፃናታኒስመ እቍ ኒቨቍ ድድሚስ ክቕምስ ሚዝየነ ኣስልዱ› ይሽት ፃፍሸውድየንት ኣንቭቪርነቅመ?» ዩ።

¹⁷ጛትም በር ኻትመይስ ፉ፤ ቢታንየም ፊር ጝግል ጩ።

¹⁸እየሱስ ጛምርሲዝ ግረቨዝ ኻትመይዝጐ ዋጥር ፊራንድ ግድርዱ።

¹⁹ጒደን ደዪስም ላይ በለስ ዘፍት ቓል ጝርጐ ፊራንድ፣ ኻፀ ጭቝጚ ፍር እጅረይ ዊንች፤ ኣይንድም፦ «ነስየ ክጊስ ፍር ችጝሺነ» ዩ፤ በለስሸንም ኣይንድ በውዝ ይዝች።

²⁰ጝክንደጥድም እን ኣቐው ዊገድየንት ቓልጛንድ ጊርምሽጛ፦ «እኝቸን በለስሸን ኣወይር ሊንታፍተስ ይዝችፈ?» ይ።

²¹እየሱስም፦ «እማንዝ የኵን፤ እምንት ፃይርነቅ፣ ተጠራጥርሻይርነቅም ኣቕርንሽ፣ በለስሸንትል ኣቐዊዝጘ ፃቨነው ጭቝ ኣዪጝቀ፣ እኒን ኣበድየንት እኳ፦ ‹እኒስ ጕር ባኽሪል ፊጥ› ይርናን ክትን ይርነጘ ኣጡ።

²²እምንት ፃይርነቅ ኣርነውዝየ፣ ፀለውትዝ ዋቕርድርነውድየንትቅ ለምርትርንቅ» ዩ።

²³እየሱስም መቅደስ ጝኒል ጥው ክንሳ ሲጝቀ ካኽነጣነ ኻልቅጢዝመ ኽዝቪዝ ሽመቅሊዝ ጝጐ ኣልትጝ፦ «እኒንትቅ ፃቭረወድ ወረጘዙ ስልጣንዝ የጝ? እኒን ስልጣንድየንት ክጭስ ነየውድስ ኣው የጝ?» ይጝ ዋቕር።

²⁴እየሱስም ዊስ ጛት፦ «ያንም ክታት ላው ዊገ ዋቕርጨ፤ ክትን ዊስርንሽ ያንም እኒንት ፃቨውድ ወረጘዙ ስልጣንዝ ኣቐጘ ድቍጭር።

²⁵ይዃንስት ጥምቅትድ ተረውድ ኣዊስ የጝ? ሲመይስመ? ዊንስ እጅሪስ የጝ?» የው ዋቕሩ፤ ጛይም ጛስ ጛይ ዊግሽጛ፦ « ‹ሲመይስ የጝ› ይንሽ፦ ‹እደስለ ውረ ኣምኒርነቅ?› ይጠ የጝ።

²⁶‹እጅሪስ የጝ› ይንሽ ቈሽ ኽዝቭድ እጝቅቅ ይዃንስት፦ ‹ነቭይ የጝ› የው ኣምናንስቅ ጐውትነኵን።»

²⁷እንዝ ማጥን፦ «ይን ኣርቓይነቅም» ይጝ ዊስ። እየሱስም፦ «እደስለስ ያንም እኒንት ፃቨውድ ወረጘዙ ስልጣንዝ ኣቐጘ ድቈቅም» ዩ።

²⁸እየሱስም እንት ዩ፦ «ወረጘ ይርነኵ? ሊጘ ዅል ፃየው ላው እጅር ዊኑ፤ ጛጊስ ላው ኽየዊል ኣልት፦ ‹ያልም! ንጭ ወይን ኣታክልቲል ፊትር ሰራጭ› ዩ።

²⁹እፈረድም፦ ‹እምቢ ፊጠቅም› ዩ፤ እግረ ግን ኣኑሽ ሰራሽጠ ፊሩ።

³⁰ኣይርድም ሊጘትረ ጝዅሪል ፊር ጘጝት ኣዙ፤ እፈረድም፦ ‹ቀሰው ፊጭር› ዩ፤ ዊገድ ግን ፊሪጝቀ እዳቑ።

³¹ጝታቪልቲስ ጚርት ፍቃድድ ፋፅመውድ ኣውየን የጝ?» የው ዋቕሩ። ጛይም፦ «በውረድ የጝ» ይጝ ዊስ። ጘጝም፦ «እማንዝ የኵን፤ ቀረጥ ቀቨቊዝመ ሸርሙጣኒዝ እደረት ምጝግስትል ጠወነውዝ ክታት ቀድምጥቍ።

³²ጣምቀተ ይዃንስ ፅድቅዙ ጒደነድየንት ክታጭስ ቓሊስጠ ተሩ፤ ክትን ግን ጝት ኣምኒርነቅም፤ ቀረጥ ቀቨቊዝመ ሸርሙጣኒዝ ግን ጝት ኣምን፤ እኒን ኣቐው ዊገድ ቓልድርናንድ እኳ ንስኻ ጥውርን ኣምኒርነቅም።»

³³«ላየ ተከ ቈሽ ወጭጥን! ወይንዙ ኣታክልት ቲክለው ላው ቺዝጝ ጕርየ እጅር ዊኑ፤ ጘጝም ጝኣታክልቲዙ ጅልወድ ኻፅሩ፤ ወይን ድቝዘነው ቢም ፃሩ፤ ሊሚደነው ደዘም ተሱ። ጝዝለ ቺዝጝድየንት ኣርጭዝ ኣከራይዝ ላየ ኻግርል ፊሩ።

³⁴ፍር ፍረነ ግርየድ ችጛንድም ፍርድ ለምርጛንስ ማጥን ጝኣገልጋያንድዛት እዛይ ኣርጪል እፃቑ።

³⁵ኣርጭድ ግን ጝኣገልጋያንድዛት ፃይጝ ላውድየንት ድድብ፤ ላውድየንትም ቍው፤ ላውድየንት ቈሽ ቕርጘዝ ድድብ።

³⁶ኣታክልቲዝ ወነድም በውጢስ ንቕፀቍ ላጥ ኣገልጋያን በርሱ፤ ኣርጭድ ግን ጛትም በውጢዝጘ ፃቭ።

³⁷ኻትሸነይዝም፦ ‹ይዅርትስ ኪብርዝጥቍ› የው ጝዅርት በርሱ።

³⁸ኣርጭድ ግን ጝዅርት ቓልጛንድ፦ ‹እኒንመ ወራሽድ የጝ፤ ላቝጥን ጝት ቍውን ጝርስትድ ዊርስነ› ይ።

³⁹ጝዅርድየንትም ፃይጝ ኣታክልቲዝ ቢዘይል ፊስጝ ቍው።

⁴⁰«ነስየ ኣታክልቲዝ ወነድ ተራንድ እዛይ ኣርጭድዛት ወረጘ ፃቭጡ ተከኵ?» ዩ።

⁴¹ጛይም፦ «እዛይ ጭቕ ኣርጭድዛት ጭቓ ስቃያትዝ ቍው ኣታክልቲዙ ቺዝጝድየንት ጝፍረድየንት ጝወቅቲዝ ይወቍ ላጥ ኣርጭዝ ኣከራይዝጡዋ» ይ።

⁴²እየሱስም፦ «ቅዱሳን መፃፋኒዝ ‹ግምብኝጥ ነቅጘው ቕርጘድ ማይዘኒዙ ኣውር ኣቑ፤ ኣደረ እኒንት ፃቭኩ፤ ጝሰቭድም ይናእሊዝ ዲንቅሰው የጝ› ይሽት ፃፍሸውድየንት ኣንቭቪርነቅመ?

⁴³እንዝ ማጥንም ክታጭስ የኵን፤ እደረት ምጝግስትየን ክታጊስ ፊስሽትቲ፤ ጝርፍረድየንት ፍርዘው ላየ ኽዝቭዝም ይውሽትቲ።

⁴⁴እኒን ቕርጘይል ሊቨውድቅ ኪልድሽጡ፤ ጝቕም ቕርጘድየን ጝዲጊል ሊቨውድም ጫፍልቕሽጡ» ዩ።

⁴⁵ካኽነጣነ ኻልቅጢዝመ ፈሪሳኒዝም ተከጥድዛት ወሽጛንድ እየሱስ ዊግተውድ ጝታማጥን ኣቐጘ ኣስክስ።

⁴⁶ኣቓንስቅም ጝት ፃይጥጘ በን፤ ዊገድ ግን ኽዝቭድ እየሱስት ነቭይ ፃቭ ቓላ ዊናንስቅ ጐውት።