Read xamtanga ማቲወስት ወንጌል 22 Bible Online

ማቲወስት ወንጌል 22 - xamtanga bible

ማቲወስት ወንጌል 22

¹እየሱስም እንደ ገነ ጛጭስ ላየ ተከ እንት የው ድቁ፦

²«ምጝግስተሰማያት ጝዅርት ቅየንዝጠ ዲግሰው ንጕስ ተከች።

³ጭጝሸቍ እቅድዛትም ቅየኒል ተርጛንስ ማጥን ጝኣገልጋያንድዛት እፃቑ። ጭጝሸቍ እቅድ ግን ቅየኒል ፊርጥጘ በኒየቍም።

⁴እንደ ገነም ላጥ ኣገልጋያን፦ « ‹እንወ ይሰጝግጢዝመ ስወቍ ይሲዝፂዝ ዝውሽትጝኵ፤ እጝቅቅ ኣስልሽኩ፤ ቅየኒል ላቝጥን› ይርን ድቍጥን» የው እፃቑ።

⁵ጭጝሸቍ እቅድ ግን ጭጝንድየንት ቸለል ይጝ ላውድ ጝቺዝጝል፣ ላውድ ጝኒግርንል ፊሩ።

⁶ላጥ እዳቐቍድ ቈሽ ጝኣገልጋያንድዛት ፃይጝ በርጝ ድድብጝ ቍዉ።

⁷ኣይንድም ንጕስድ ቈጣሽ ዊተድር በርስ ጝኣገልጋያንድዛት ቍወቍ እቅድዛት ድሱ፤ ጝታኻትመድየንትም ልየዝ ዀሱ።

⁸ጝዝ ግረም ጝኣገልጋያንድዛት፦ ‹ቅየኒዙ ድግስድ እንወ ኣስልሽኩ፤ ጭጝሸቍድ ግን ድግሲዝ ጥውሸቍ ኣቕጝ ችጝሺየቍም።

⁹እንዝ ማጥን ዋጥርጥረነው ጒደነይልቅ ፊትርን ችጝርነው እጅርድቅ ጭጝጥን› ዩ።

¹⁰ጝኣገልጋያንድም ጒደን ጨቨቅ ፊርጝ ጭቓድም ቀሰውድም ችጘውድቅ እጝቅትቅ ጭጝጝ ቅየኒዝ ደዘድየንት ኣብንዝ እቻዝ።

¹¹ንጕስድም ጭጝሸቍ እቅድዛት ቓልጠ ደዘይል ጥዋንድ ቅየንዙ ኣልቨ ሲሪየው ላው እጅር ጝጊስ ቓሉ።

¹²ንጕስድም፦ ‹ይወደጅወ! ቅየን ኣልቨ ሲሪጝቀ ኣወይር እንል ጥውሩ?› ዩ፤ እጅርድየን ግን ዝም ዩ።

¹³ንጕስድም ጝኣገልጋያንድዛት፦ ‹ጝናን ልኵድ እፅቍርን ቢዘይዙ ጥመይል ፊስርን ማልጥን፤ ጝግልም ሊዝዝመ እርቍጣን ገጫዘው ሚከረዝ ኣጡ› ዩ።

¹⁴ጭጝሸቍድ ንቕፀቍ ጛይ፤ ማርፅሽተቍድ ግን ዊትቍ ጛይ።»

¹⁵እንዝ ግረ ፈሪሳንድ ፍጝ ፊርጝ፣ እየሱስት ጝዊግተው ዊገይዝ ኣወሽጝ ፃውርጥጘጘ ማኽርኽርሽ።

¹⁶ጝታክንደጥድዛትም ኺረውድስት ዊግኒጅቅ ላብጠ ፃቭጝ እየሱስትል፦ «ክንሰተወ! ክት እማንተው እጅር ኣረጘ፣ እደረት ጒደነድም እማንዝ ክንስረር ኣረጘ ኣርቕነኵን፤ ኣውማውስቅ ኣድልዊጝቀ እጝቅትቅ እኵለዝ ቓልደር የጝ።

¹⁷እስቲ ድቍ፤ ወረጘ ተከኵ? ቂሳርስ ግቭር ኪፍለነው ጥውሸኵመ ጥውሻው?» ይጝ እፃቕ።

¹⁸እየሱስ ግን ጝታተኰልድ ኣርቓንስቅ፦ «እፈ ተክዘጥ ክታትርነ! ወረጘ የጝ ይት ፊትንትድርነውድ?

¹⁹እስቲ ግቭርዝ ኪፍልሸው ጊንዝቭድየንት ቓሊስጥን?» ዩ። ጛይም ላው ዲናር ነስጝ ጝጭስ ቓሊስ።

²⁰ጘጝም፦ «እኒን ጊንዝቪል ቃርፅሸተው ሚልኪዝመ ፃፍሸው ፅፈቲዝ ኣውቱ የጝ?» ዩ።

²¹ጛይም፦ «ቂሳርቱዋ!» ይ፤ ጘጝም፦ «እደስለስ ቂሳርትውውድ ቂሳርስ ይውጥን፤ እደረትውድም እደረስ ይውጥን» ዩ።

²²ጛይም እኒንት ወሽጛንድ ጊርምሽጛ ጝት በርጝ ፊር።

²³ጘጝ ግርየይዝ ሰዱቃን እየሱስትል ተር፤ ሰዱቃንድ ክርጘይስ ጐነዝ ኣምናቍ ዊን፤ ጛይም፦

²⁴«ክንሰተወ! ሙሴ፦ ‹ላው እጅር ዅር እዅሪቀ ክርሽ ጝዝንድ ክረው ጝዝኒዝ እውነየንት ድው ክረዊዝ ዚረ ቲኪነ› የውኩ።

²⁵ይናግል ላጝጠ ዚን ዊን፤ በውረድ እውነት ድው እዅሪጝቀ ክራንስቅ ጝሳትውድ ክረው ጝዝኒዝ እውነየንት ድዉ።

²⁶ጘጝም ክረዊዝ ዚረ ቲክዪጝቀ ክሩ፤ ሸወትረድም ጘጝት ክሩ፤ እነይጛ ላጝጠትረይል ኣሽ ቲረ ቲረዝ ድውጛ እጝቅቅ ክር።

²⁷ኻትሸነይዝም ጝርቕም እውነየን ክርች።

²⁸እንዝ ማጥን ጝርት እጝቅቅ ድውጛንስቅ ክርጘይስ ጐነይዝ ኰር እኝቸን እውነየን ኣዊዝ እውነ ኣተ ጚ?» ይጝ ዋቕር።

²⁹እየሱስም፦ «ቅዱሳን መፃፋኒዝመ እደረት ኻይሊዝ ኣርቓይርነቅ ኣቕርናንስቅ ቀትርነኵ።

³⁰ክርጘይስ ጐነይዝ ግረ እቅ ሲመይትቍ መላካኒዝጘ ኣጥቍጚ ድዋቍም፤ ገባሻቍም።

³¹ክርጘይስ ጐነይዝቍዝ ግን እደረ ክታጭስ፦ ‹ያን ኣቭርኻምት ኣምላክ፣ ይሳቅት ኣምላክ፣ ያይቈቭት ኣምላክ የጝ› የው ዊግተውድየንት ኣንቭቪርነቅመ? እደረ ፅበቍዝ ኣምላክ የጝጚ ክረቍዝ ኣምላክም ኣየው» የው ዊሱ።

³³ኽዝቭድም እኒንት ወሻንድ ጝክንስኒዝቍዝ ዲንቅሹ።

³⁴ፈሪሳንድም እየሱስ ሰዱቃንድዛት ዝም ሸጘ ወሽጛንድ ላው ኣቕጝ ኣኽቭሽ።

³⁵ጛጊስም ላው ወሪትት ኽግ ክንሰተ እየሱስት ፊትንጠ በን፦

³⁶«ክንሰተወ! ወሪትት ኽጊስ እጝቂስቅ ዲቈውድ ኣውየን የጝ?» የው ዋቕሩ።

³⁷እየሱስም፦ «‹ክኣምላክ ኣደረት ክእዘኒዝ፣ ክኒፍሲዝ፣ ክኻሰቪዝ፣ ምሉበምሉዝ ቀን።›

³⁸እጝቂስቅ ዲቈው በወትረ ትዛዝድ እኒን የጝ።

³⁹ሊጘትረድም ጝት ተከኵ፤ እንም፦ ‹ክፃምረድየንት ክቕምትጘ ቀን› የው የጝ።

⁴⁰ወሪትት ኽግዝመ ነቭያታኒዝ እጝቅቅ እንዛይ ሊጘይዝ ጥቅልሽጝኵ» ዩ።

⁴¹ፈሪሳንድ ኣኽቭሽጝ ፅብጛ እየሱስ ጛት፦

⁴²«ክርስቶስት ማጥን ወረጘ ይርና? ጘጝ ኣውት ዅርስ የጝ?» የው ዋቕሩ። ጛይም፦ «ዳዊትት ዅራ» ይጝ ዊስ።

⁴³ጘጝም፦ «እደስለ፣ ዳዊት እደረት መንፈሲዝ ኻይልዝ ዊግታንድ፦ ‹ይኣደረ› የው ጭጘውድ ወረጘ የጝ?

⁴⁴‹እደረ ይኣደረት <ክፃለታንድዛት ክልኲዝ ደደነ ፃቭጪስቅ፣ የለዊል ጐይ> ዩ።›

⁴⁵ነስየ ዳዊት ጝቕም፦ ‹ይኣደረ› የው ጭጘውዝየ ኣወይ የጝ ጝዅር ኣጠ ቸለውድ?» ዩ።

⁴⁶እን ዋቕረይዝ ላው ቃል እኳ ዊስጠ ቸለው እጅርም ዊኒየው፤ ኣይንቲስ ግረ ኣውማውቅ ጝት ዋቕርጠ ዲፍሪየውም።