Read xamtanga ማቲወስት ወንጌል 23 Bible Online

ማቲወስት ወንጌል 23 - xamtanga bible

ማቲወስት ወንጌል 23

¹እንዝ ግረ እየሱስ ኽዝቪዝመ ጝክንደጢዝ እንት የው ዊግቱ፦

²«ወሪትት ኽግ ክንሰጢዝመ ፈሪሳኒዝ ሙሴት ወምበሪል ጐይጝኵ።

³እንዝ ማጥን ጛይ ክታት ኣዝጘውድየንትቅ ፃቭጥን፤ ሊሚድጥንም፤ ዊገድ ግን ጛይ ዊግትጛንትጘ ሰራሻቍምነ ጝታግቭሪዝጘ ፃቭትርነ።

⁴ቸልሻው ኻይሉ መውር እፅቍጝ እቀ ጅውሪል መውስጘኵ፤ ጝታቕም ግን ጝታናኒዙ ዘፍርነይዝ እኳ ዳቓቍም።

⁵እቅ ጛት ቓልጛንስ ማጥን ይጝ ጝታሰቭድቅ እቀ በዊል ሰራሽጘኵ፤ ጝታኽተቭድ ኽየው ፃቭጘኵ፤ ጝታኣልቨይዙ ዘርፍድየንትም ሊጊስጘኵ።

⁶ድግስ ጭጝሽጛንድ ኪብረው ስፍረ ፃየነው ቀንጘኵ፤ ምኵራቪስም በውዝ በዊዙ ወምበርድ ፃየነው ቀንጘኵ።

⁷እኒዝጘ ቈሽ ኣሪ ስፍረይስ እጅርድቅ ጛት ሲለም ያንስመ፦ ‹ክንሰተ!› የው ጭጛንስ በንጘኵ።

⁸«ክትን ግን ክታክንሰተድ ላውድ ጭቝ ኣቓንስቅ፣ ክትንም ክታስ ክታይ ዚን ኣቕርናንስቅ፦ ‹ክንሰተ!› ይሽትርን ጭጝሽትርነ።

⁹ቈሽም ክታይርድ ላው ሲመይ ፅበውድ ጭቝ የጝ፤ ኣቓንስቅም ዝቨት ዲጊስ ኣውማውትቅ፦ ‹ኣየ› ይርን ጭጝትርነ።

¹⁰ክታሊቅድ ላው ክርስቶስ ጭቝ ኣቓንስቅ፦ ‹ሊቃውንት!› ይሽትርን ጭጝሽትርነ።

¹¹ክታማኽሊስ ክታጊስ ኽየውድ ክታኣገልጋይ ኣጡ።

¹²ጝቕምት ንየስ ንየስ ሸውድቅ ዝጥቅ ይጡ፤ ጝቕምት ዝጥቅ ሸውድቅ ግን ንየስ ይጡ።

¹³«እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! እጅር ጥዋየጘ ምጝግስተሰማያትትት ሚረድየንት ዲቭርነኵ፤ ክትንም ጥዋይርነቅም፤ ጥውጥጘ በነቍድዛትም ኪልክልድርነኵ።

¹⁴እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! ታይተዝ ፃቭርነው ክታፀለውትድ ሊጊስርና ልጀጊርዳኒዝ ጝንጥድ ቢዝብዝርነኵ፤ እንዝ ማጥን ክትን ወሰው ፍርድ ለምርትርንቅ።

¹⁵እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! ላው እጅርዝ ክታኻይማነውትድ ኣምንስትርነ ባኽርዝመ ዝቨዝ ጅልውርነኵ፤ ኣምነት ግረ ግን ክታጊስ ሊን ወሰው ገኻነምት ዅር ፃቭርነኵ።

¹⁶«እፈ ኻርቭርነቅ ቃወጥ ክታትርነ! ወየው! ‹መቅደስ ጝኒዝ ፃረው ኣውማው እጅርድቅ ውርም እጀው፤ መቅደስ ጝኒዙ ዊርቀይዝ ፃረውድ ግን ጝፃርድ ችጝጡ› ይርነኵ።

¹⁷እፈ ኻርቭርነቅ ኻጘፃን ክታትርነ! ዊርቀይስመ ውርቀድየንት ቀድሰው መቅደስ ጝኒስ ኣውየን የጝ ዲቈውድ?

¹⁸እኒዝጘም፦ ‹መሰውየዝ ፃረው ኣውማው እጅርድቅ ውርም እጀው፤ መሰውየይዝ ዲጊዙ ሚቨይዝ ፃረውድ ግን ጝፃርድ ችጝጡ› ይርነኵ።

¹⁹እፈ ኻርብ ክታትርነ! ሚቨይስመ ሚቨድየንት ቀድሰው መሰወየይስ ኣውየን የጝ ዲቈውድ?

²⁰እንዝ ማጥን መሰዊየይዝ ፃረውድቅ፣ መሰዊየይዝመ ጝዲጊል ፅበዊዝቅ ፃረኵ።

²¹መቅደስ ጝኒዝ ፃረውድም መቅደስ ጝኒዝመ ጝግል ዘላልም ፅበው እደረስ ፃረኵ።

²²ሲመይዝ ፃረውድም እደረት ዙፋኒዝመ ጝዲጊል ጐየዊዝ ፃረኵ።

²³«እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! ኣዝሙድ፣ እንስላል፣ ከሙን፣ የነቍ ቅመማኒስ እደረስ ኣስራት ይውርነኵ፤ ዊገድ ግን ኽጊል ፅበቍ ዋንጥድ የነትም ጭቅ የው ፍርድ ፊርደነውድ፣ ስቝርት ፃቨነውድ፣ ኣምንሽተነውድ፣ እንዛትቅ በትርንኵርኑ፤ እዛት በሪጝቀ እንዛት ፃቭትርነ ጥውሸው ዊኑ።

²⁴እፈ ኻርቭርነቅ ቃወጥ ክታትርነ! ክታዝይርነዊስ ብወረት ዊር ሽርን ማልድርነኵ፤ ግምለድ ግን ዝርቕ ሽርነኵ።

²⁵«እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! ፅወይዝመ ድስቲዝዙ ዲግድየንት ዊርሽርነኵ፤ ኣቒድየን ግን ቀመነውዝመ ስቭርየዝ እቻቕኩ።

²⁶እፈ ኻርቨ ፈሪሳነው ክተ! በውገ ፅወይዝመ ድስቲዝዙ ጝኣቒድየንት ዊር ሽ፤ ኣይንድ ዲግድም ዊር ይጡ።

²⁷«እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! ጝታዲግድ ነጭመረቅዝ ሊልቅሽጝ ቀሰቍ ኣቕጝ እትለቍ መቃቭራን ተክርነኵ፤ ጛይ ጝታኣቒድ ክረቍዙ ጛፅዝመ ስኽፍሸው ዊገዝቅ እቻቐቍ ጛይ።

²⁸ክትንም ቢዘድ ፃድቃን ተክርነኵ፤ ክታኣቒድ ግን ተክዘነውዝመ ጭቕትዝ እቻቕኩ።

²⁹«እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! ነቭያታኒዝ መቃቭርድ ተስርና፣ ፃድቃኒዝ መቃቭርድም ገይፅስርና፦

³⁰‹ኽፅም ይናኣቅለ ዚምኒዝ ዊናን ነቭያታኒዝ ብርድ ቅብሰነውዝ ይናኣቅሊጅቅ ተቫቭርሻይነቅም ዊኑን› ይርነኵ።

³¹እንዝም ነቭያታንድዛት ቍወቍ እቂዝ ቝር ኣቐነውድ ክታቕም ሚዝርድርነኵ።

³²እደስለመ ክትንም ክታኣቅልድ ኪርመጘውድየንት ፋፅምጥና!

³³እፈ ሲቭረይዝ ቝር ሳብል ክታትርነ! ግኻነምት ፍርዲስ ኣወይርን ኣምልጠነው ቸልትርንቅ?

³⁴እንዝ ማጥን ነቭያታን፣ ጥቨቭኝጥ፣ ክንሰጥ፣ ክታጐ እፃጭር፤ እንዛጊስም ላው ላውድ ቁትርንቅ፤ ላው ላውድ ሲቅልትርንቅ፣ ላው ላውድ ክታምኵራቪል ጊርፍትርንቅ፣ ኻትመዝ ኻትመም ጅግዝትርንቅ።

³⁵ኣቓንስቅም ፃድቅ ኣቭየልቲስ ኪርም መቅደስ ጝኒዝመ መሰወየይዝ ማኽሊል ቍውርነው በራክዩት ዅር ዘካርያስት ብሪል ኣሽ ዝቨይል ቅብስርነው ፃድቃኒዙ ብረይዝቅ ክትን ዋቕርሽርነቅ የጝ።

³⁶እማንዝ የኵን፤ እንዝቍዝቅ እን ዅለድ ዋቕርሽጡ።

³⁷«እየሩሳልየም! እየሩሳልየም! ነቭያታንድዛት ቁረር ክተ! ክጐ እፃሸቝድዛትም ቕርጘዝ ድድብረር ክተ! ጅርወ ጝርጨጭንድዛት ጝርኪፊዝ ኣቍልዳንትጘ ክቝርድዛት ኣኽቭጨ ዋቐን በን ዊኑን? ክትን ግን በኒርነቅም።

³⁸ነስየ እንወ! ክታጝንድ በድመ ኣቕ እዳጡ።

³⁹እንዝ ማጥን፦ ‹ኣደረት ሽዝ ተረውድ በርክሸው የጝ› ይትርኒስቅ ይት ሊጘት ቓላይርነቅም የኵን።»