Read xamtanga ማቲወስት ወንጌል 24 Bible Online

ማቲወስት ወንጌል 24 - xamtanga bible

ማቲወስት ወንጌል 24

¹እየሱስም መቅደስ ጝኒስ ፍ ፊራንድ ጝክንደጥድዛይ ጝጐ ኣልትጝ፦ «እኒን መቅደስ ጝንድ ኣወይ ተሲተጘ ቓልደኵመ?» ይ።

²ጘጝ ግን፦ «እኒንትቅ ቓልድርነኵመ? እማንዝ የኵን፤ ቕርጘዝ ዲጊል ቕርጘ ኲንሸጘ ፋይሪጝቀ እዳቓውም» ዩ።

³ጘጝም ደቭረ ዘይት ኣበይል ጐይ ፅባ ጝክንደጥድ ጝታለ ጝጐ ኣልትጝ፦ «እስቲ ድቍ! እን ዊግትረውድቅ ኣቐው ግርየድ ኣውን የጝ? ክተረነይዝመ ኣልሚዙ ኻትሸነይዙ ምልክትድስ ወረጘ የጝ?» ይጝ ዋቕር።

⁴እየሱስም ዊስ እንት ዩ፦ «ኣውማውቅ ቀሳየጘ ጣጝቅቅጭጥን።

⁵ንቕፀቍ፦ ‹ያን ክርስቶስ የጝ› ይጛ ይሽዝ ተርጥቍ፤ ንቕፀቍድዛትም ቀስጥቍ።

⁶ኣጭነዝመ ኣጭነዙ ጂጘዝ ወሽትርንቅ፤ እንቅ ኣጠ ግድ የጝ፤ ዊገድ ግን ኻትሸነድ ገነ ኣቓንስቅ እንዝ ዳጝግፅርነቅ ጣጝቅቅጭጥን።

⁷ኽዝቭ ኽዝቭዝ ዲጊል ጕጡ፤ ምጝግስትም ምጝግስትዝ ዲጊል ጕጡ፤ ጝሉ ጝሉ ስፍረይልቅ ግድርዝመ ዝቨዙ ኒንቅሸነዝ ኣጡ።

⁸እንቅ ቅምትዙ ጭጝቅት ኪርምሸነ የጝ።

⁹«ኣይንድ ክታት ሚከረል ዲቍስጝ ይውጥቍ፤ ቁጥቍ፤ ይሽዝቍዝም እጅርዝቅ ሽክሽርነቅ ኣትርንቅ።

¹⁰ኣይንድም ንቕፀቍድ ፅጋርጥቍ፤ ጛስ ጛይ ላውድ ላየድየንት ዲቍስ ይውጡ፤ ጛስ ጛይም ጐርትጥቍ።

¹¹ንቕፀቍ ኻሽወጥ ነቭያታን ጕጥቍ፤ ንቕፀቍድዛትም ቀስጥቍ።

¹²ኣመፂዙ ንቕፀይስ ጐውም ንቕፀቍ እቅዙ ፍቅርድ ቓዝቕዝጡ።

¹³ኻትሸነይል ኣሽ ፀናቐው ግን ጘጝ ቓድጡ።

¹⁴ኽዝቭዝቅ ሚዝር ኣቓንስ ማጥንም እኒን እደረት ምጝግስትዙ ወንጌልድ ኣልሚልቅ ሲቭክሽጡ፤ ጝዝ ግረም ኻትሸነድ ተርጡ።

¹⁵«ነስየ ነቭይ ዳንየል ዊግተው ድዘርዙ እርኵስነድ ቀድስሽተው ስፍረይል ችብር ቓልድርናንድ ኣንቭቨው እጅርድ ኣስክስነ።

¹⁶ኣይንድ ይዅዳ ፅበቍድ ኣብቒዝጐ ሰይጝነ።

¹⁷ኽድም ዲጊል ዊነውድም ጝን ኣቒዝቍ ጝጐዝድ ፊስጠ ጊሚነ።

¹⁸ቺዝጝል ዊነውድም ጝኣልቨድ ጕይጠ እግርገ ዋጥሪነ።

¹⁹ኣይንትቍ ግርቂዝ ጊዙረቍዝመ ኒቭሰቍ መሉጅንጥዝ ወየው።

²⁰ዊገድ ግን ክታሰይተድ ጫረዝ ዊንም ቅዳምሲንቭት ግርየዝ ኣቓየጘ ፃልይጥን።

²¹ኣይንድ ኣልም ፋጥርሸት ኪርም ነኳን ኣሽ ኣቕ ኣርቓው፣ ነስየይስቅም ጝት ተከው ተራው ኽየው ሚከረ ኣጡ።

²²ጛይ ግርቅድ እጅጛቍ ኣጛን ላው እጅርም ቓዳው ዊኑ፤ ዊገድ ግን ጛይ ግርቅድ ማርፅሽተቍ እቂዝ ማጥን እጅጝጥቍ።

²³«ኣይንድ ኣውማው እጅር፦ ‹እንወ ክርስቶስ እንል እኩ› ዊንም፦ ‹እድል እኩ› ይሽ ኣምንትርነ።

²⁴ኻሰትኝጥ ክርስቶሳንዝመ ኻሽወጥ ነቭያታንዝ ጕጥቍ፤ ጛጭስ ቸልሻንስ ማርፅሽተቍድ እኳ ቀስጛንስ ማጥን ዲንቅሰቍ ታምራንዝመ ምልክታንዝ ቓሊስጥቍ።

²⁵ነስየ እኒንትቅ በውግስ ድቍኩን።

²⁶«እንዝ ማጥን፦ ‹እንወ በራኸይል እኩ› ይጝሽ ፍትርነ፤ ‹እንወ እትላው ስፍረይል እኩ› ይጝሽም ኣምንትርነ።

²⁷መቭረቅ ምስራቂስ ፍ ምእራቪል ኣሽ ኣቭርኻንትጘ እጅር ዅርት ተረነድም ጘጝት ኣጡ።

²⁸ቢድን ፅበዊል ኣሞጥ ኣኽቭሽጘኵ።

²⁹ጛይ ሚከረዝቍ ግርቂዝ ግረ በውዝ ‹ኰረየን ጥምትቲ፤ ኣርቨየንም ጝርብርኻንድ ይዋይም፤ ፅግልውጥድም ሲመይስ ሊቭጥቍ፤ ሲመይ ፅበቍ ኻይላንድም ተናውጥሽጥቍ።›

³⁰ጝዝ ግረ እጅር ዅርት ምልክትድ ሲመይስ እትልጡ፤ ኣይንድም ዝቨት ዊግንድቅ ዋይ ዋይ ይጛ ሊዝጥቍ፤ እጅር ዅርም ኻይልዝመ ኽየው ክቭርዝ ኣቕ ሲመይቱ ድምነዝ ተራንድ ቓልጥቍ።

³¹ኽየው መለከትዙ ድመ ወይሰቍ ጝመላካንድዛትም እፃጡ፤ ጛይም ኣልሚዝቍ ሲዘ ማይዘናኒስ ሲመይት ደርቸይስ ኪርምጝ ላየ ደረችይል ኣሽ ጝማርፅሸተቍ እቅድዛት ኣኽቭጥቍ።

³²«እን ዊገድየንት ተረድሽትርናንስ ማጥን በለስ ዘፍ ተከ ኣቕርነ፤ ጝርኝጫፋንድ ጭጭቭጛንድ ጝርኻፅድም ሊልምድጛንድ ኣይንድ እየ ችጘጘ ኣርቕርነኵ።

³³እኒዝጘም እንዛትቅ ቓልድርናንድ እጅር ዅርት ተረነድ ችጘጘ ኣርቕጥን።

³⁴እማንዝ የኵን፤ እንቅ ኣጢስ ኣሽ እን ዅለድ ዲቋውም።

³⁵ሲመይስመ ዝቨስ ዲቍጥቍ ይቃልድ ግን ስሪስቅ ዲቋውም።»

³⁶«እቸን ግርየየንስመ ሰትሸንት ግን ኣይር ኣሽጚ ሲመይ ፅበቍ መላካንድም ኣጝሽ ዅርም ኣቕሽ ኣውማውቅ ኣርቓውም።

³⁷ልክ ነዅት ዚምኒዝ ኣቐጘ እጅር ዅርት ተረነይዝም ጘጝት ኣጡ።

³⁸ድሰው ኣቘድ ተረነዊስ በውገ ነዅ ሚርክቪል ጥወው ግርየይል ኣሽ እቅድ ዅጛ፣ ዚይጛ፣ ድውጛ፣ ገባሽጛ ዊን።

³⁹ኣይንትል ኣሽ ውርቅ ተርጠጘ ኣርቒጝቀ ድጝግት ድሰው ኣቘድ ተር ፃርግ ፊሰጘ፣ እጅር ዅርት ተረነድም ጘጝት ኣጡ።

⁴⁰ኣይንት ግርየይዝ ሊጘ እቅ ላው ቺዝጝል ላው ኣቕጝ ውላጥቍ፤ ላውድ ፊስሽትጡ ሊጘትረድ እዳጡ።

⁴¹ሊጘ እቍን ላው ኣቕጝ እጕ ዛጥቍ፤ ላይሸን ፊስሽትቲ ሊጘትረየን እዳቲ።

⁴²ነስየ ክታኣደረት ተረነ ግርየድ ኣርቓይርነቅ ኣቕርናንስቅ ነቃቕርን ሊሚድጥን።

⁴³«ዊገድ ግን እኒንት ኣርቕጥን፦ ቓፅጘ ኻሪዝ ኣውየን ሰትዝ ተርጠጘ ወነድ ኣርቓን ነቃቕ ሊሚድጠ ዊኑ፤ ጝጝንድም ዲፍርሽጢስቅ በራውም ዊኑ።

⁴⁴እጅር ዅር ተረውድ ኻስቪርነው ግርየይዝ ኣቓንስቅ ክትንም ኣስልሽርን ፅብጥን።

⁴⁵«ጝታዅረድየንት ጝሰት ጝሰቲዝ ይዋንስ ማጥን ወነድ ጝበተሰቪል ይመው ኣምንሸው ብልኽ ኣገልጋይድ ኣው የጝ?

⁴⁶ወነድ ተራንድ እነይ ጝውላድየንት ፋፅማ ችጝሸው እድየን ኣገልጋይድ ቀቫሸው የጝ።

⁴⁷እማንዝ የኵን፤ ወነድየን ጝት ጝንቭርቲልቅ ይምጡ።

⁴⁸ዊገድ ግን እድየን ኣገልጋይድ ጭቓ ኣቓን፣ ‹ይኣደረድ፤ ደይጡ፤ ነን ተራውም› የው ኻስቫን፣

⁴⁹ላጥ ኣገልጋያን ጝፃምጥድዛትም ጣዝጠ ኪርማን፣ ራቐጢጅቅም ዃን ዚያን፣

⁵⁰ጘጝ ኻስቪየው ግርየይዝመ ኣርቒየው ሰቲዝ ጝኣደረድ ተር፣

⁵¹ጝት ሊጘትል ቀቭ ማልጡ፤ ጝእድል ፊንተድም ተክዘጢጅቅ ፃቭጡ፤ ጝግልም ሊዝዝመ እርቍጣን ገጫዘው ሚከረዝ ኣጡ።»