Read xamtanga ማቲወስት ወንጌል 25 Bible Online

ማቲወስት ወንጌል 25 - xamtanga bible

ማቲወስት ወንጌል 25

¹እየሱስም ቈሽ እንት ዩ፦ «ኣይንድ ምጝግስተሰማያት ጝታመቭራትድየንት ፃይጝ ኣስንድ ለምርጥጘ ፈቍ ፅቃ ፅጐንድዛት ተክቲ።

²ጛጊስም ኣኰድ ኻጘፃን፣ ኣኰድ ቈሽ ብልኻን ዊን።

³ኻጘፃንድ ጝታመቭራትድ ፃይጝ፣ ተጠቫቨቅሸነ ዘይት ፃዪየቍም ዊን።

⁴ብልኻንድ ግን ጝታመቭራቲጅቅ ተጠቫቭቅሸነው ዘይት ፃይጝ ዊን።

⁵ኣስንድም ደይያንድ እጝቅቅ ዝመውዝ ፃይሽጛንስቅ ኽርይ።

⁶«ኻረ ግቨሪዝም፦ ‹ኣስንድ ተሩ! ጕርን ለምጥን!› የነው ውከተ ኣቑ።

⁷ኣይንድ ፅጐንድዛይ እጝቅቅ ጕጝ ጝታመቭራትድ ኻውሽጛ ኣስልሸነው ኪርም።

⁸ኻጘፃንድም ብልኻንድዛት፦ ‹ኣለቀይጥን ይናመቭራትድ ስትጠ የጝ ክታዘይቲስ ነቅጥን› ይ።

⁹ብልኻንድዛይ ግን፦ ‹ይን ፃይነውድ ምናልቫች ይናጭስም ክታጭስም ኣቒይሽሳ? ኽሽስ ቅየቊል ፊትርን ክታቕምስ ጅቭጥን› ይጝ ዊስ።»

¹⁰«እዛይ ኻጘፃንድም ዘይት ጅቭጥጘ ፊርጘጘ ኣስንድ ተሩ፤ እዛይ ኣስልሽጝ ዊነቍ ፅጐንድም ኣስኒጅቅ ኣደራሺል ጥው፤ ቢለድም ዲቭሽቱ።

¹¹ጝዝ ግረ እዛይ ኻጘፃንድ ተርጝ፦ ‹ኣደረወ! ኣደረወ! ቢለድ ብዝ› ይ።

¹²ጘጝ ግን፦ ‹እማንዝ የኵን፤ ክታት ኣርቐቅም› ዩ።

¹³እንዝ ማጥን ግርየይዝመ ሰቲዝ ኣርቓይርነቅ ኣቕርናንስቅ ኣስልሽርን ሊሚድጥን።»

¹⁴«ምጝግስተሰማያት ጝኣገልጋያንድዛት ጭጝ ጝፃየው ንቭርትድቅ ኽድር ይው ላየ ኻግርል ፊርጠ ጐው እጅር ተከች።

¹⁵ጘጝም ጝታእጝቅዝቅ ጝታይተኣቅሚዝጘ ኣድለነውዝ፣ ላዊዝ ኣኰ መክሊታን፣ ላዊዝ ሊጘ መክሊታን፣ ላዊዝ ቈሽ ላው መክሊት ይው ላየ ኻግርል ፊሩ።

¹⁶ኣኰ መክሊታን ለምረው እጅርድም ፊር ኒግር ላጥ ኣኰ መክሊታን ቲርፍዙ።

¹⁷ሊጘ መክሊታን ለምረውድም እኒዝጘ ላጥ ሊጘ መክሊታን ቲርፍዙ።

¹⁸ላው መክሊት ለምረውድ ግን ፊር ጝኣደረይዝ ጊንዝቭድየንት ዝቨድ ፃር ዲቩ።

¹⁹«ጛይ ኣገልጋያኒዝ ወነድም እክሰው ግርየ ዊነት ግረ ዋጥር ተር ጝኣገልጋያንድዛት ተሳስቭሹ።

²⁰ኣኰ መክሊታን ለምረውድም ላጥ ኣኰ መክሊታን ፃይ ተር፦ ‹ኣደረወ! ይጭስ ነይረውድ ኣኰ መክሊታን ዊኑ፤ እንወ ላጥ ኣኰ መክሊታን ቲርፍዝኩን› ዩ።

²¹ጝኣደረድም፦ ‹ኣምንሽረር ቀስረር ኣገልጋይ ክተ! ቀሰው ፃቭርኵሩ፤ ዊቱዝ ኣምንሽረር ኣራንስቅ ያን ቈሽ ክት ኽየውል ይምጭር፤ ክኣደረይዙ ዲስተይዝ ዲስ ይራንስ ጢ› ዩ።

²²ሊጘ መክሊታን ለምረውድም ኣልት፦ ‹ኣደረወ! ይጭስ ነይረውድ ሊጘ መክሊታን ዊኑ፤ እንወ! ላጥ ሊጘ መክሊታን ቲርፍዝኩን› ዩ።

²³ጝኣደረድም፦ ‹ኣምንሽረር ኣገልጋይ ክተ! ቀሰው ፃቭርኵሩ፤ ዊቱዝ ኣምንሽራንስቅ ያን ቈሽ ክት ኽየውል ይምጭር፤ ክኣደረይዙ ዲስተይዝ ዲስ ይራንስ ጢ› ዩ።

²⁴ላው መክሊት ለምረውድ ቈሽ ኣልት፦ ‹ኣደረወ! ክት ፊዚረዊስ ኣይርደር፣ ቢትኒረዊስም ኣኽቭረር ጨካኝ እጅር ኣረጘ ኣርቐኵን።

²⁵ኣቓንስቅም ጐውጥ ክመክሊትድየንት ዝቨይል ፃር ዲቩን፤ ኣስ ክጊንዝቭድ› ዩ።

²⁶ጝኣደረድም፦ ‹እፈ ጭቓ ሲዝወረ ኣገልጋይ ክተ! ፊዚቀዊስ ኣይረር፤ ቢትኒቀዊስ ኣኽቨር ኣቐጘ ኣርቐረውዝየ፣

²⁷ውረ ይጊንዝቭድየንት እዅርሰቍዝ ይዊረር? ያንም ተጥ ይጊንዝቭድየንትን ጝእዀለይጅቅ ፊስጨ ዊኑን።

²⁸ፈርጥን ጝመክሊትድየንት ፊስርን ፅቃ መክሊታን ፃየዊዝ ይውጥን።

²⁹ፃየው እጅርዝ ቈሺተኵ፤ ጝጭስም ንቕፀኵ፤ እጀው እጅሪስ ግን ጝፃየውድ እኳ ፊስሽተኵ።

³⁰እኒን እርቫነ እጀው ኣገልጋይድየንትም ሊዝዝመ እርቍጣን ገጫዘው ሚከረዝ ፅበው ቢዘቱ ጥመይል ፊስርን ማልጥን› ዩ።»

³¹«እጅር ዅር እጝቅ ጝመላካኒጅቅ ጝክቭሪዝ ተራንድ ጝክቭሪዙ ዙፋኒል ጐይጡ።

³²ኽዝቭድቅም ጝበዊል ኣኽቭሽጡ፤ ጘጝም ምቓ ቢቅድ ፍጭሪስ ቲዛንትጘ ጛስ ጛት ቲዘቲዝጡ።

³³ቢቅድዛት ጝለዊዝ፣ ፍጭርድዛት ቈሽ ጝፃግቪዝ ችብስጡ።

³⁴«ኣይንድ ንጕስድ ጝለዊዝቍድ፦ ‹እፈ ይር በርከቍ ክታትርነ! ላቝጥን፤ ኣልም ፋጥርሸት ኪርም ክታጭስ ኣስልሸው ምጝግስትድ ዊርስጥን።

³⁵ምላሰንድም ግድርጣን ዀስርንኵርኑ፤ ዝቛንጣን ዚስርንኵርኑ፤ ኣቭን ኣቕ ተጣን ለምትርንኵርኑ።

³⁶ዝባጣን ሲስርንኵርኑ፤ ፅዊጣን ኣሙዝርንኵርኑ፤ እፁጫን ተትርን ዋቕርድርንኵርኑ።› ይጡ።

³⁷ፃድቃንም ዊስጝ፦ ‹ኣደረወ! ኣውን ግድርድር ቓልን ዀስኑን? ኣውንስ ዝቛንድር ቓልን ዚዝኑን?

³⁸ኣውን ኣቭን ኣቕር ቓልን ለምርኑን? ኣውንስ ዝባትር ቓልን ሲስኑን?

³⁹ኣውንስ ፅዊትር ዊንም እፁሽር ቓልን ዋቕርኑን?› ይጥቍ።

⁴⁰ንጕስድም፦ ‹እማንዝ የኵን፤ እንዛይ እጝቂስቅ መልቍ ኣቐቍ ይፅኒስ ላዊዝ ፃቭርነውድ ይጭስ ፃቭርኑ የነት የጝ› የው ዊስጡ።

⁴¹«እንዝ ግረ ጝፃግቭይዝቍድዛት፦ ‹እፈ ክትን እፂትርነቅ ክታትርነ! ዳቪለውስስመ ጝመላካኒዝ ኣስልሸው ዘላልምት ልየይል ፊጥን!

⁴²ምላሰንድም ግድርጣን ዀሲርነቅም፤ ዝቛንጣን ዚሲርነቅም፤

⁴³ኣቭን ኣቕ ተጣን ለምሪርነቅም፤ ዝባጣን ሲሲርነቅም፤ ፅዊጣን እፁጫን ዋቕሪርነቅም።› ይጡ።

⁴⁴ጛይም ዊስጝ፦ ‹ኣደረወ! ግድርድር ዊንም ዝቛንድር፣ ኣቭን ኣቕር ዊንም ዝባትር፣ ፅዊትር ዊንም እፁሽር ኣውን ቓልን የጝ ክት ኣግልግሊነውድ?› ይጥቍ።

⁴⁵ንጕስድም፦ ‹እማንዝ የኵን፤ እንዛይ እጝቂስቅ መልቍ ኣቐቍ ይፅኒስ ላዊዝ ፃቪርነውድ ይጭስ ፃቪርነቅም የነት የጝ› ይጡ።

⁴⁶እንዝ ግረ እንዛይ ዘላልምት ቕፃርል ፊርጥቍ፤ ፃድቃን ግን ዘላልምት ርዅየል ፊርጥቍ።»