Read xamtanga ማቲወስት ወንጌል 26 Bible Online

ማቲወስት ወንጌል 26 - xamtanga bible

ማቲወስት ወንጌል 26

¹እየሱስም እንዛትቅ ዊግት ኻተት ግረ ጝክንደጥድዛት፦

²«ሊጘ ግርቅዝ ግረ ፈዝየ በል ኣቐጘ ኣርቕርነኵ፤ እጅር ዅርም ሲቅልሻንስ ዲቍሽት ይውሽትጡ» ዩ።

³ኣይንድ ካኽነጣነ ኻልቅጢዝመ ኽዝቪዝ ሽመቅሊዝ፣ ቀያፈ የነው ካኽነጣነ ኻልቀይዝ ኻፅሪል ኣኽቭሽ።

⁴እየሱስትም ተኰልዝ ፃይስጥጘ፣ ቁጥጘም ማኽርኽርሽ።

⁵ዊገድ ግን፦ «ኽዝቪዝ ማኽሊል ኹክት ጒሻይየጘ ኣምርበሊዝ ኣቒነ» ይ።

⁶እየሱስም ቢታንየስ ለምፃም ስሙን የነው እጅሪዝ ጝኒል ፅባ፣

⁷ላይ እውነ ጝወየድ ጭቕጘ ኪብረው ሽቱ ፃየው ኣልቫስጥረውስ ብልቃጥ ፃይር ጝጐ ተርች፤ ጘጝም መድል ጐይ ፅባ ሽቱድየንት ጝኣውሪል ቅብስች።

⁸ጝክንደጥድዛይም እኒንት ቓልጛንድ ኻልክሽጝ፦ «እንቝጠ ቢክንዘነው ወረጘ የጝፈ?

⁹እኒን ሽቱድ ቅይሽ ጝወየድ ድኺዝ ኣጠ ዊኑ ኣየውቀ!» ይ።

¹⁰እየሱስም ጛይ ይጘውድየንት ኣርቕ እንት ዩ፦ «እኝቸን እውነየንት ውር ቃጥ ችግዝርና? ጚ ይጭስ ቀሰው ሰቭ ፃቭርኵች።

¹¹ድኽድ ዊትርቅ ክታጅቅ ጛይ፤ ያን ግን ዊትርቅ ክታጅቅ ፅበቅም።

¹²ሽቱድየንት ይዲጊል ቅብሰነውዝ ይዲቭኒዝ ኣስልተ የጝ።

¹³እማንዝ የኵን፤ እኒን ወንጌልድ ሲቭክሸው ኣውማው ስፍረይልቅ ጚ ፃቭረውድ ጝርት ኻልየነ ኣቓንስ ማጥን ድቍሽትጡ» ዩ።

¹⁴ኣይንድ ፅጭ ሊጘ ኻወርየታኒስ ላውድ ኣስቈረትቱ ይዅዳ ይሽተው እጅርድ ካኽነጣነ ኻልቅጢል ፊር፦

¹⁵«እየሱስት ዲቍስ ነቃን ወረጘ ነይትርንቅ?» ዩ። ጛይም ሰውርጝን ቍርሻን ይው።

¹⁶ይዅዳም ኣይንቲስ ኪርም እየሱስት ዲቍስ ይውጠ ሚቸው ግርየ ደምዛ ዊኑ።

¹⁷ቅጣ ዀነው በሊዙ በወትረ ግርየይዝ ጝክንደጥድ እየሱስ ትጐ ኣልትጝ፦ «ፈዝየ በሊዙ ድረይድየንት ዅራንስ ማጥን ኣውል ኣስልነ በንራ» ይጝ ዋቕር።

¹⁸ጘጝም፦ «ኻትመይል ጥውርናንድ ችጝርነው እጅሪዝ ጝኒል ፊትርን፦ ‹ክንሰተድ፦ <ይግርየድ ችጛንስቅ ይክንደጢጅቅ ፈዝየ በሊዙ ድረይድየንት ዀውድ ክጝን የጝ> የኵ› ይጥን» ዩ።

¹⁹ጝክንደጥድም እየሱስ ኣዘጘ ፃቭ፤ ፈዝየ በሊዙ ድረይድየንትም ጝግል ኣስል።

²⁰እየሱስም ኵናንድ ጝክንደጢጅቅ መድል ጐዩ።

²¹ዅጛ ሲጝቀም፦ «እማንዝ የኵን፤ ክታጊስ ላውድ ይት ዲቍስ ይውጡ» ዩ።

²²ጝክንደጥድም እንዝ ጭቕጘ ኻዝንጝ ቲረ ቲረዝ፦ «ኣደረወ! ያንመ ኣጭር ኣጢ? ያንመ ኣጭር ኣጢ?» ይጛ እየሱስት ዋቕርጥጘ ኪርም።

²³እየሱስም፦ «ይት ዲቍስ ይውጡድ ጝናንድየንት ይጅቅ ዝቭዲል በርሰውድ የጝ።

²⁴እጅር ዅርስ ጝማጥን ፃፍሸጘ ክርጡ፤ ዊገድ ግን እጅር ዅርት ዲቍስ ይወው እድ እጅሪዝ ወየው። እድ እጅርድ እዅርሺጝቀ እዳቕ ዊናን ቺዝጠ ዊኑ» ዩ።

²⁵ጝት ዲቍስ ይውጡድ ይዅዳም፦ «ክንሰተወ! ያንመ ኣጭር ኣጢ?» ዩ፤ እየሱስም፦ «ክት ይረጘ የጝ» ዩ።

²⁶ዅጛ ሲጝቀም እየሱስ ሚድ ጒ በርኩ፤ ኪልም ጝክንደጢዝ፦ «ኣስጥን ዅጥን፤ እኒን ይስየድ የጝ» የው ይዉ።

²⁷ፅወድየንትም ጒ እደረት ሚዝየንዙ፤ ጝክንደጢዝም፦ «ክታእጝቅቅ እኒስ ዚጥን።

²⁸ንቕፀቊዙ ኽጥያትዝ ይቅርተዝ ማጥን ቅብረቍ ኣይር ኪዳንዝቍ ይብርድ እንዛይ ጛይ።

²⁹ይርት ምጝግስቲዝ ክታጅቅ ኣይር ወይኒዙ ፍረይስ ዝቅጪስቅ ነስየ እኒን ወይኒዙ ፍረይስ ሊጘት ዝቀቅም የኵን» የው ይዉ።

³⁰መዝሙርም ዚምርጘት ግረ ደቭረ ዘይት ኣበይል ፍ።

³¹እየሱስም ጝክንደጢዝ፦ «ክታእቅቅ እኝቸን ኻርሸንስ ፅጋርትርንቅ፤ ምላሰንድም ‹ምቓድየንት ጣዝጭር፤ ጝመጝገድም ቢትንሽጡ› ይሽት ፃፍሽኩ።

³²ዊገድ ግን ያን ክርጘይስ ጐት ግረ ክታት ቀድም ገሊለ ፊጭር» ዩ።

³³ኣይንድ ቢጥሮስ፦ «ላጥድ እጝቅ ፅጋርጝሽ እኳ ያን ግን ስሪስቅ ፅጋጠቅም!» ዩ።

³⁴እየሱስም፦ «እማንዝ የኵን፤ እኝቸን ኻርሸንስ ጅርወ ዋቒጝቀ ይት ሸውን ኻዲትር» ዩ።

³⁵ቢጥሮስ ግን፦ «ክጅቅ ክረነው ኣቕሽ እኳ ክጭርጚ ኻድየቅም!» ዩ። ላጥ ክንደጥድም እጝቅቅ እት ይ።

³⁶እንዝ ግረ እየሱስ ጝክንደጢጅቅ ጀተሰማኒ የነው ስፍረል ፊሩ፤ ጝክንደጥድዛትም፦ «ያን እድጐ ፊጥ ፃልይጪስ እንል ጐይጥን» ዩ።

³⁷ጝጅቅም ቢጥሮስስመ ሊጘ ዘቭዲወስት ቝሪዝ ቲክንዝ ፊሩ፤ ጘጝም ቲክዝጠ ጨጝቅሽጠም ኪርሙ።

³⁸ጛትም፦ «ይኒቭስሸን ክርጘል ኣሽ ጭቕጘ ኻዝንድርኵች፤ እንል ኣቕርን ይጅቅ ቲጊጥን» ዩ።

³⁹ጛጊስም ዊቱ ዲቍ የው ጝግምባሪዝ ዝቨይል ደፋሽ፦ «ኣየወ! ቸልሸው ኣቕሽ እኒን ሚከረዙ ፅወድ ይጊስ ዲቍነ፤ ዊገድ ግን ያን ዊደውድ ኣዪጝቀ ክት ዊድረውድ ኣነ» ዩ።

⁴⁰ጝጊስም ዋጥር ሻቘ ክንደጢል ተራንድ፣ ኽርይጝ ዊን፤ ቢጥሮስትም፦ «እፈ ላይ ሰትትኳመ ይጅቅ ቲግየነ ብርኑ?

⁴¹ፊተነል ጥዋይርነጘ ቲግይርን ፃልይጥን፤ መንፈስ ኣስልሸው የጝ፤ ስየ ግን ዝላቐረ የጝ» ዩ።

⁴²እንደ ገነም ሊጘት ፊር፦ «ኣየወ! እኒን ሚከረዙ ፅወድ ያን ዝቂጝቀ ዲቋው ኣቕሽ ክፍቃድድ ኣነ» ዩ።

⁴³ቈሽም ጝክንደጢል ዋጥር ተራንድ ጝታእልጣንድ ዝምወዝ ፅጐውሽጝ ዊንጛንስቅ ኽርይጝ ዊን።

⁴⁴እንደ ገነም ጛት በር ፊር ጘጝ በውረ ፀለውትድየንት ፃልዩ።

⁴⁵እንዝ ግረ ጝክንደጢል ተር፦ «ነንምመ ገነ ፈውርን ኽሪርንኵርኑ? እንወ ሰትድ ችጝኩ፤ እጅር ዅርም ኽጥያትኝጥዝ ናኒል ዲቍሽት ይውሽትጡ።

⁴⁶ጕጥን ፊርነ፤ ይት ዲቍስ ይወውድ ተራ የጝ» ዩ።

⁴⁷እየሱስም ገነ ዊግታ ሲጝቀ እንወ ፅጭ ሊጘይስ ላውድ ይዅዳ ተሩ፤ ካኽነጣነ ኻልቅጢስመ ኽዝቪዝ ሽመቅሊስ እፃሸቍ ንቕፀቍ እቅም ሰይፍዝመ ዱለዝ ፃይጝ ጝጅቅ ተር።

⁴⁸ይዅዳም እቂዝ፦ «ክትን ደምዝርነው እጅርድ ያን እምቘውድ የጝ፤ ጝት ፃይጥን» የው ምልክት ይው ዊኑ።

⁴⁹ጘጝም ጭቅተ እየሱስትል ፊር፦ «ክንሰተወ! ዳኽነመ?» የው እምቑ።

⁵⁰እየሱስም፦ «ይወደጅወ! ክተትረው ውላድየንት ፋፅም» ዩ፤ ኣይንድም እቅድ እየሱስትል ኣልትጝ ፃይጝ እፅቍ።

⁵¹እየሱስ ጅቅ ዊነቊስም ላውድ ጝሰይፍድየንት ምዝ ካኽነጣነ ኻልቀይዝ ኣገልጋይድየንት ጣዝ ጝቀርዝድየንት ቅዝ ማሉ።

⁵²እየሱስ ግን፦ «ፈር ክሰይፍድየንት ጝስፍረይል ዊሽ፤ ሰይፍ ጕየቍድቅ ሰይፍዝ ድዝጥቍ።

⁵³በንዘውዝየ ያን ይርት ዋቕራን ፅጭ ሊጘ ክፍለ ጠውሪስ ንቕፀቍ መላካን በርሳውመ ይርኵሩ?

⁵⁴እነየው ኣቐውዝየስ ቈሽ ቅዱሳን መፃፋንዝ ሚከረ ለምርጠጘ ፃፍሸውድ ኣወይ ፋፅምሽጠ የጝ?» ዩ።

⁵⁵ኣይንድም እየሱስ ኽዝቭድየንት፦ «ወምበዲ ፃየቊዝጘመ ይት ፃይትርነ ሰይፍዝመ ዱለዝ ፃይርን ተትርኑ? ግሪ ጨቨቅ መቅደሲስ ክንሳ ክታጅቅ ዊናንድ ፃዪርነቅም።

⁵⁶ዊገድ ግን እንቅ ኣቐውድ ነቭያታኒዝቍ መፃፋኒዝ ዊግሸውድ ፋፅምሻንስ የጝ» ዩ። ኣይንድ ጝክንደጥድ እጝቅቅ ጝት ማልጝ ሰይ።

⁵⁷እየሱስት ፃየቍ እቅድም ወሪትት ኽግ ክንሰጢዝመ ኽዝቪዝ ሽመቅሊዝ ኣኽቭሽጝ ዊንጘው ካኽነጣነ ኻልቀ ቀያፈት ኻፅሪል ፊስ።

⁵⁸ቢጥሮስ ግን እክልድ የው ካኽነጣነ ኻልቀይዝ ኻፅሪል ኣሽ እየሱስት ቲክና ዊኑ፤ ኣቒ ጥውም ዊገይዙ ኻትሸነድየንት ቓልጠ ዘቨኝጢጅቅ ጐዩ።

⁵⁹ካኽነጣነ ኻልቅጢዝመ ኣይዅዳኒዝ ሸጐዊዝ ኣቫላንድም እጝቅቅ እየሱስት ቍውስጥጘ ኻሽትዙ ሚዝር ደምዝጛ ዊን።

⁶⁰ንቕፀቍ ኻሽትዝቍ ሚዝረጫን ኣልትጝሽም፣ ክርጘ ፊርድሰው ማስረጀ ችጚየቍም፤ እግረ ግን ሊጘ እቅ ኣልትጝ፦

⁶¹«እን እጅርድ፦ ‹እደረት መቅደስ ጝንድ ፋዝ ሻቘ ግርቅዝ ተስጨ ቸለኵን› የውኩ» ይ።

⁶²ኣይንድም ካኽነጣነ ኻልቀድ ጕ፦ «እንዛይ እቅድ ክግል ሚዝርድጘዊዝቅ ውረ ዊሰ ይዋር?» ዩ።

⁶³እየሱስ ግን ዝም ዩ። ካኽነጣነ ኻልቀድም፦ «ዘላልም ፅበው እደረስ ፃይስኩን፤ ክት ክርስቶስ እደረት ዅር ኣርሽ ድቍ» ዩ።

⁶⁴እየሱስም፦ «ክት ይረጘ የጝ፤ ዊገድ ግን ክታእጝቅዝቅ ድቈኵን፤ ነንስ ኪርም እጅር ዅር ኻይሉ እደረት ለዊል ጐያንድ፣ ድምነዝ ኣቕ ሲመይስ ተራንድም ቓልትርንቅ» ዩ።

⁶⁵ኣይንድ ካኽነጣነ ኻልቀድ ኻልክሽ ጝቕምት ኣልቨድየንት ቀድ፦ «እንወ! እደረት ዛሽትኩ፤ እንዝለ ውርት ሚዝር በንዝጣ? እደረት ዛሻንድ ክታቕም ወሽርንኵርኑ።

⁶⁶ነስየ ወረጘ ይርና?» ዩ፤ ጛይም፦ «ክርጠ ጥውሸኵ!» ይ።

⁶⁷ኣይንድ ጝታብፅቕንድ ጝግል ትፍ ይጛ ጝታናኒዝ ጣዝ፤ ላጥድ ቈሽ ጥፊዝ ጣዝጛ፦

⁶⁸«ክርስቶስወ! ክት ጣዘውድ ኣው የጝ? እስቲ ትንቪት ዊግጨ» ይጛ ዊን።

⁶⁹ቢጥሮስም ካኽነጣነ ኻልቀይዝ ኻፅር ኣቒል ጐይ ፅባ ላይ ጊርድ ጝጐ ኣልትር፦ «ክትም ገሊለቱ እየሱስ ጅቅ ዊንዱ» ይች።

⁷⁰ጘጝ ግን፦ «ያን ክት ይረውድየንት ኣርቐቅም» የው ጝታእጝቅዝቅ በዊል ኻድዩ።

⁷¹ቢጥሮስም ሚረይዝጐ ፋንድ ላየ ጊርድ ቓልችነ፣ ጝግል ዊነቍ እቂዝ፦ «እን እጅርድ ናዝሪትቱ እየሱስ ጅቅ ዊኑ» ይች።

⁷²ጘጝም ፃራ፦ «ጘጝ እጅርድየንት ኣርቐቅም» የው ሊጘት ኻድዩ።

⁷³ዊቱ ዊን የው ቈሽ ጝግል ዊነቍ እቅድ ቢጥሮስትል ኣልት ይጝ፦ «ክዊገድ ኣረሰኵ፤ ክትም ጛጊስ ላውድ የጝ» ይ።

⁷⁴ኣይንድ ቢጥሮስ፦ «እኒን እጅርድየንት ኣርቐቅም» ያ ጝቕምት እፅፃ ፃርጠ ኪርሙ። ኣይንድም ጅርወ ዋቑ።

⁷⁵ቢጥሮስም፦ «ጅርወ ዋቒጝቀ ይት ሸውን ኻዲትር» የው እየሱስ ዊግተው ዊገድ ኣጁ። ቢዘይልም ፍ ኽርር የው ሊዙ።