Read xamtanga ማቲወስት ወንጌል 27 Bible Online

ማቲወስት ወንጌል 27 - xamtanga bible

ማቲወስት ወንጌል 27

¹ቅሻንድም ካኽነጣነ ኻልቅጢዝመ ኽዝቪዝ ሽመቅሊዝ እጝቅቅ እየሱስት ቁጥጘ ማኽርኽርሽ።

²ጝትም እፅቍጝ ቅመተ ቢላጠውስስ ዲቍስጝ ይው።

³ዲቍስ ይወው ይዅዳም እየሱስ ክርጘ ፊርድሸጘ ቓላንድ ኣኑሹ፤ ፊሰቍ ቍርሻንድዛትም ካኽነጣነ ኻልቅጢዝመ ሽመቅሊዝ ፊስ ይው በር፦

⁴«ንፅዅ እጅር ክርጘል ዲቍስ ነየነውዝ ቢድልኩን» ዩ። ጛይ ግን፦ «እደስለ ክቕመስ ወሱጚ ይናጭስ ውር ይናኻለይ?» ይ።

⁵ጘጝም ጊንዝቫንድዛት መቅደስ ጝኒል ቢትን ጛት በር ፉ፤ ፊርም ኻንቕሽ ክሩ።

⁶ካኽነጣነ ኻልቅጥድም ጊንቫንድ ጕይጝ፦ «ብርዙ ወየ ኣቓንስቅ ሚቨይል ቈሽነ ጥውሻውም» ይ።

⁷ማኽርኽርሽጝም እንዛይ ጊንዝቫኒዝ፣ ኣብንዙ መቃቭር ስፍረ ኣቓንስ ማጥን ሻኽለ ተሰተይዙ ቺዝጝድየንት ጅቭ።

⁸እንዝ ምላሰንዝ ጘጝ ዝቨድ ነኳን ኣሽ፦ «ብረዙ ዝቨ» ይሽታ ጭጝሸኵ።

⁹እንዝም ነቭይ የርምያስትዝ፦ «እስራየልት ቝር ጊምትጘውድየንት ጝጭስ ጝወየ ኣቓንስ ማጥን ሰውርጝን ቍርሻን ኪፍል።

¹⁰ኣደረም ይት ኣዘጘ ሻኽለ ተሰተይዙ ዝቨዝ ኪፍል» ይሽት ዊግሸው ትንቪትድ ፋፅምሹ።

¹¹ኣይንድም እየሱስ ቅመተ ቢላጠውስት በዊል ችብሩ፤ ቢላጠውስም፦ «ክት ኣይዅዳነ ንጕስመ?» የው ዋቕሩ። እየሱስም፦ «ክት ይረጘ የጝ» ዩ።

¹²ካኽነጣነ ኻልቅጢዝመ ሽመቅሊዝ ጝት ዊኝጅልዝጛንድ ግን ውርቅ ዊሲየውም።

¹³ኣይንድ ቢላጠውስ፦ «ጛይ ክት ዋቐ ዊገዝቅ ኪስጛንድ ወሻርመ?» ዩ።

¹⁴እየሱስ ግን ቢላጠውስ ዲንቅሽጢስቅ ላይ ዊገት እኳ ዊሲየውም።

¹⁵ቅመተድም ፈዝየ በሊዝ ኣምረ ኣምረዝ ኽዝቭድ ላው እፁሸው እጅር እክሳንስ ዋቕረውድየንት እክሰነው ክንስ ዊኑ።

¹⁶ኣይንድ ኣመፅ ጕየነውዝ ኣርቕሽተው በርቫን የነው ላው እፁሸው እጅር ዊኑ።

¹⁷ኽዝቭድም ኣኽቭሸጘ ቢላጠውስ፦ «በርቫንቲስመ ክርስቶስ ይሽተው እየሱስቲስ ኣውት እክስጨ በንርነኵ?» የው ዋቕሩ።

¹⁸ምላሰንድም ቢላጠውስ እየሱስት ቅንየዝ ዲቍስጝ ይውጘጘ ኣርቕ ዊኑ።

¹⁹ጘጝም ፍርድ ወምበርል ጐይ ፅባ ጝውነ፦ «ንጭ ኻር ኒቪዝ ጝማጥን ጭቕጘ ተሰቃይጭኩንነ እኒን ንፅዅ እጅሪል ውረውረ ዊገቅ ፃቭረር» ይር እፃ በርስች።

²⁰ዊገድ ግን ካኽነጣነ ኻልቅጢዝመ ሽመቅሊዝ፦ «በርቫን እኪትነ እየሱስ ግን ቍውሽትነ» የው ጨዋንስ ማጥን ኽዝቭድየንት ኣቭልቭል።

²¹ቅመተድም፦ «ጝታቪልቲስ ኣውየን እኪትጠ በንርነኵ?» የው እንደ ገነ ዋቕሩ። ኽዝቭድም፦ «በርቫንት እኪትጠ በንነኵን!» የው ዊሱ።

²²ቢላጠውስም፦ «እደስለ፦ ‹ክርስቶስ› ይሽተው እየሱስት ወረጘ ፃቭጨ?» ዩ። ጛይም እጝቅቅ ሊንስ፦ «ሲቅልሽነ!» ይ።

²³ቅመተድም፦ «ውረይ? ጘጝ ፃቨው በደልድ ወረጘ የጝ?» ዩ። ጛይ ግን፦ «ሲቅልሸነ! ሲቅልሽነ!» ይጛ ቓፅ።

²⁴ቢላጠውስም ኹክት ጒሽትጠ ኣቕሽጚ ላየ ውርም ገቨ እጀው ኣቐጘ ቓላንድ፦ «ያን እኒን እጅሪዝ ብሪስ ንፅዅ የጝ፤ ዲቍትድ ክታቕምቱ የጝ!» የው ኽዝቪዝ በዊል ጝናንጣንድ እቓሩ።

²⁵ኽዝቭድም እጝቅቅ፦ «ጝብርድ ይናግልም ይናዅሊልም ኣነ!» ዩ።

²⁶ኣይንድ በርቫንት እክስ በርሱ፤ እየሱስት ግን ጊርፍ በር ሲቅልጛንስ ማጥን ጛጭስ ዲቍስ ይዉ።

²⁷ኣይንድ ቅመተይዝ ዊተድርድ እየሱስት ፃይጝ ቅመተይዝ ኻፅሪል ፊስ፤ ላጥ ዊተድርድዛትም እጝቅትቅ ጝጅልወይል ኣኽቭ።

²⁸ጝኣልቨድየንትም ጊፍጝ ላየ ሰረው ኣልቨ ሲስ።

²⁹ኣሚዙ ኣክሊልም ጒንጕንጝ ጝኣውሪል ደፋቕ፤ ኣቲነዙ ዚግም ጝለወ ናኒዝ ፃይስ፤ ጝበዊልም ግርቨቭሽጛ፦ «ኣይዅዳነ ንጕስወ! ዲግተ ክጭስ ኣነ» ይጛ ኣሹፍ።

³⁰ጝታብፅቕንድም ጝዲጊል ትፍ ይጛ ዊን፤ ዚግድየንትም ጝናኒስ ለምርጝ ጝኣውርድየንት ደግምግምጛ ጣዝ።

³¹ኣሹፍጘት ግረ ሰረው ኣልቨድየንት ጭውዝጝ ጝኣልቨድየንት ሲስ፤ ሲቅልጥጘም ፃይጝ ፊር።

³²እየሱስት ፃይጝ ፊርጛንድም ስሙን ይሽተው ቀሪነቱ እጅር ችጝጝ ሚስቅልድየንት መውርጠ ኣስገድድዝ።

³³ጝትርጕምድ፦ «ኣውር በወ» ኣቐው ጐልጐተ የነው ስፍረይል ችጛንድም፣

³⁴ኻሙት ጅቅ ዲቭልቅሸው ወይንዙ ሚዝ ዝያንስ ይው፤ እየሱስ ግን ጣም በር ዝየነው በኒየውም።

³⁵እየሱስትም ሲቅልጘት ግረ ጝኣልቨድየንት እፀ ማልጝ ኣድልሽ።

³⁶ጝግልም ጐይጝ ጝት ሊሚድጛ ዊን።

³⁷ጝኣውሪዝ ንየይልም፦ «እኒን ኣይዅዳነ ንጕስ እየሱስ የጝ» የው ጝኪስሽተዊዙ ፅፈሽ እቝር።

³⁸ኣይንድ እየሱስ ጅቅ ሊጘ ወምበዲጥ ላውድየንት ጝለዊዝ፣ ላውድየንት ጝፃግቪዝ ሲቅል።

³⁹ጝግዝ ዲቈዲቈቍድም ጝታኣውርድ ኒንቅጛ ዛሽጛ፦

⁴⁰«መቅደስ ጝንድየንት ፋዝር ሸወትረ ግርየዝ ተስረር ክተ! እስቲ ነን ክቕምት ቓዝ! እደረት ዅር ኣረውዝየ እስቲ ሲቅልሽረው ሚስቅሊስ ጊም!» ይጛ ዊን።

⁴¹እኒዝጘም ካኽነጣነ ኻልቅጥድ ቈሽ ወሪትት ኽግ ክንሰጢዝመ ሽመቅሊዝጅቅ ኣቕጝ ኣሹፍጛ፦

⁴²«ላጥድ ቓዙ፤ ጝቕምት ግን ቓዝጠ ቸላውም፤ እስራየልት ንጕስ ኣቐውዝየ ይንም ጝት ኣምናንስ! እስቲ ነን ሚስቅሊስ ጊምነ!

⁴³እደረት ኣምንኩ፤ ‹ያን እደረት ዅር የጝ› ያ ዊኑ፤ እደረ ጝት ቀነውዝየ እስቲ ነን ቓዝነ!» ይጛ ዊን።

⁴⁴ጝጅቅ ሲቅልሸቍ ወምበዲጥድም እደይጝ ዛሽጛ ዊን።

⁴⁵ዋልጠ ሳይስ ኪርም ፃይጨ ሳይል ኣሽም ዝቨይልቅ ጥመ ኣቑ።

⁴⁶ፃይጨ ሰት ኣቓንድም እየሱስ ጝድመድ ኣጕስ ሸው፦ «የለዅየ! የለዅየ! ላማ! ሰቨቅታኒ?» የው ቓፁ፤ ጝትርጕምድም፦ «ይኣምላክወ! ይኣምላክወ! ውረ ይት በትሩ?» የነት የጝ።

⁴⁷ጝግል ችብርጝ ዊነቊስ ላው ላውድ እየሱስ ቓፃንድ ወሽጛንድ፦ «ይልያስት ጭጘኵ!» ይ።

⁴⁸በውዝም ጛጊስ ላውድ ውጥያ ፊር ሰፍነግ[15] ነስ ዃምጥጠው ወይንዙ ሚዚል ናኽሩ፤ ሰፍነግድየንትም ኣቲነ ዚግዝ ጫፊል እፅቍ እየሱስ ዝያንስ ፊስ ኣልሱ።

⁴⁹ላጥድ ግን፦ «በጥን እስቲ፤ ይልያስ ተር ቓዛንድ ቓልነር!» ይ።

⁵⁰እየሱስም እንደ ገነ ጝድመድ ኣጕስ ሸው ቓፁ፤ ኣይንድም ጝፈውጥድ ፍ።

⁵¹ኣይንድም መቅደስ ጝኒዙ ገርደነድየን ንየ ጫፊስ ኪርም ሳ ጫፊል ኣሽ ሊጘትል ቀድሹ፤ ዝቨም ተናውፅሽትች፤ ፃፅቕድም ስንጥቅጥቅ ይ።

⁵²መቃቭራንም ቢት፤ ክርጝ ዊነቍ ቅዱሳን እቂስም ንቕፀቍ ክርጘይስ ጕ።

⁵³መቃቭሪስም ፍጝ እየሱስ ክርጘይስ ጐት ግረ ቀድስሽትረይ ኻትመየንትል ጥውጝ ንቕፀቍ እቅዝ እትል።

⁵⁴ላዝ ኻልቀይዝመ ጝጅቅ እየሱስት ሊሚድጛ ዊነቊዝ፣ ዝቨይዙ ተናውፅሽተነዊዝመ ኣቐው ዊገይዝድቅ ቓልጛንድ ጭቕጘ ጐውት፤ ጝትም፦ «እማን እደረት ዅር የጝ» ይ።

⁵⁵እየሱስት ኣግልግልጛ ገሊለስ ቲክንጛ ዊነቍ ንቕፀቍ እቍንም ጝግል ዊን፤ ጛይም እን ገቨድየንት እክልድ ይጝ ቓልጛ ዊን።

⁵⁶እንዛይ እቍኒዝ ማኽሊስ መግደላዊት ማርያም፣ ያይቈቭስመ ዮሴፍስታኘ ማርያምስመ ዘቭዲወስት ቝሪዛኘየንታይ ችጝሽጘኵ።

⁵⁷ኵናንድም ዮሴፍ ይሽተው ኣርማትያስቱ ኻፍታም እጅር ጝጐ ተሩ፤ ጘጝ ጝቕምም እየሱስት ክንደተ ዊኑ።

⁵⁸ጘጝ እጅርድ ቢላጠውስትል ኣልት፦ «ኣለቀይ እየሱስት እርሸድ ነቅ» የው ጨዉ፤ ቢላጠውስም እርሸድየንት ጝጭስ ይውጛንስ ኣዙ።

⁵⁹ዮሴፍም እርሸድየንት ኣይር ፃረው ኻር ኣልቨዝ ጊንዙ።

⁶⁰ጝቕምስ የው ፃፀድየንት ፊልፍል ተሰው ኣይር መቃቭርልም ዲቩ፤ መቃቭሪዝ ሚረድየንትም ኽየው ቕርጘ ትጕለልዝ ዲቭ ፊሩ።

⁶¹ኣይንድም መግደላዊት ማርያምስመ ላየ ማርያምስ መቃቭሪዝ በውዝ በዊል ጐይጝ ዊን።

⁶²ጛምርስ ቅዳምሲንቭቲዝም ካኽነጣነ ኻልቅጢዝመ ፈሪሳኒዝ ቢላጠውስትል ፊርጝ፦

⁶³«ኣደረወ! እድ ቀሰተ እጅርድየን ገነ ርዅየዝ ፅባ፦ ‹ሻቘ ግርቅዝ ግረ ክርጘይስ ጕጭር› የው ዊግተው ዊገድ ትዝ ይኑን።

⁶⁴እንዝ ማጥን ጝክንደጥድ ፊርጝ እርሸድየንት ስይጘጘ፣ ኽዝቪዝም፦ ‹እንወ ክርጘይስ ጕኩ› ይጝ ጂጝዛይጘጘ መቃቭርድ ሻቘ ግርቂል ኣሽ ሊሚድሻንስ ትዛዝ ዲቍሽ፤ ኣለዝየ በውግቱ ቀተይስ እግረ ተረውድ ወሰው ኣቐኵ» ይ።

⁶⁵ቢላጠውስም፦ «እንወ ሊሚደቍ ዊተድር ፃይርንኵርኑ፤ ፊትርን ክታኣርቕርነጘ ሊሚድስጥን» ዩ።

⁶⁶ጛይም ፊርጝ መቃቭሪዙ ቕርጘድየንት ማኽተምዝ ኻትምጝ መቃቭርድየንት ዊተድርዝ ሊሚድስ።